ការព្យាយាមស្វែងរកយុត្តិធម៌ពីអ្នកភូមិបឹងកក់
អ្នកភូមិបឹងកក់នៅតែបន្តសកម្មភាពតស៊ូមតិជានិច្ចជាមួយអាជ្ញាធរ រាជធានីភ្នំពេញ និងក្រុមហ៊ុនស៊ូកាគូអ៊ីនដែលជាអ្នកអភិវឌ្ឍន៍តំបន់បឹងកក់ ទោះបីជាការតស៊ូនេះហាក់គា្មនអ្នកណាអើពើក៏ដោយ។
នៅក្នុងសន្និសីទកាសែតមួយនៅព្រឹកនេះ ក្រុមអ្នកភូមិបានស្នើសុំដីចំនួន១៥ ហិចកតាពីក្រុមហ៊ុន និងពីអាជ្ញាធរដើម្បីសាងសង់លំនៅស្ថាននៅនឹងកន្លែង។ តាមការអះអាងរបស់អ្នកភូមិទាំងនោះ សំណើររបស់ពួកគេបានដាក់ជូនសាលារាជធានី និងក្រុមហ៊ុនរួចហើយកាលពីថ្ងៃទី៦កុម្ភៈ ឆ្នាំ២០១១នេះ។ ក៏ប៉ុន្តែការស្នើសុំអភិវឌ្ឍន៍នៅនឹងកន្លែងនៅតំបន់បឹងកក់ ចំនួន ១៥ ហិកតានោះ ត្រូវបានអភិបាលរាជធានីភ្នំពេញ លោក កែប ជុតិម៉ា បានសម្រេចបដិសេធ ក្នុងលិខិត កាលពីថ្ងៃទី១៧កុម្ភៈ ឆ្នាំ២០១១។ លោក កែប ជុតិម៉ា លើកឡើងថា ការសុំដីទំហំ ១៥ ហិកតា នៅក្នុងតំបន់បឹងកក់ ជាការស្នើសុំក្រៅពីគោលការណ៍ទាំងបីរបស់រាជរដ្ឋាភិបាល។ សាលារាជធានីភ្នំពេញ និងក្រុមហ៊ុន ធ្វើការអភិវឌ្ឍន៍នៅហ្នឹងកន្លែង ស្របតាមប្លង់គោល ដែលនឹងអនុម័តដោយក្រុមប្រឹក្សាអភិវឌ្ឍន៍កម្ពុជា។
គួរកត់សម្គាល់ថា អ្នកភូមិបឹងកក់ទាំងនោះ បានតស៊ូមតិគ្រប់រូបភាពអស់ហើយ តែពួកគេមិនទទួលបានលទ្ធផលអ្វីទេ។ ពួកគេទំនងជាគ្មានជម្រើសអ្វីក្រៅពីចាកចេញពីទីនោះឡើយ ពីព្រោះអាជ្ញាធរ និងក្រុមហ៊ុនហាក់ដូចជាមិនចាប់អារម្មណ៍នឹងការតវ៉ានេះឡើយ៕
No comments:
Post a Comment
yes