ធនាគារពិភពលោក អំពាវនាវឲ្យរដ្ឋាភិបាលខ្មែរ
បញ្ឈប់ការបណ្តេញចេញ
សកម្មភាពបង្ក្រាបយ៉ាងប្រទាញប្រទង់របស់អាជ្ញាធររាជធានីភ្នំពេញ ទៅលើពលរដ្ឋបឹងកក់ដែលតវ៉ារឿង
ជម្លោះដីធ្លី នៅមុខសាលារាជធានី កាលពីថ្ងៃទី២៨
ខែកុម្ភៈកន្លងមកនេះ។
រូបថត ស្រេង ម៉េងស្រ៊ុ
រូបថត ស្រេង ម៉េងស្រ៊ុ
ធនាគារពិភពលោក បានអំពាវនាវដល់រដ្ឋាភិបាលកម្ពុជា នៅថ្ងៃពុធ ទី០៩ មីនានេះ ឲ្យបញ្ឈប់ការបណ្តេញចេញនូវប្រជាពលរដ្ឋចំនួន ១ម៉ឺននាក់ទៀត នៅលើទីតាំងអភិវឌ្ឍន៍អចលនទ្រព្យដ៏ចម្រូងចម្រាសមួយ និងបានស្នើផ្តល់ជំនួយដល់មនុស្សទាំងនោះ ដែលបានបាត់បង់ផ្ទះសម្បែងរបស់ពួកគេ។
ជម្លោះនេះបានផ្តោតសំខាន់ទៅលើដីធ្លីនៅតំបន់បឹងកក់ នៅកណ្តាលរាជធានីភ្នំពេញ។ ក្រុមសកម្មជន បាននិយាយថា ប្រជាពលរដ្ឋប្រហែល ២០០០គ្រួសារ ត្រូវបានគេបណ្តេញចេញ និងបង្ខំឲ្យទទួលយកសំណងតិចតួចរួចរាល់ហើយ បន្ទាប់ពីរដ្ឋាភិបាលបានជួលដីនេះទៅឲ្យក្រុមហ៊ុនអភិវឌ្ឍន៍ឯកជនមួយ។
លោក រ៉ូប៊ឺត ហ្សូល្លិក នាយកធនាគារពិភពលោក បាននិយាយនៅក្នុងសេចក្តីថ្លែងការណ៍មួយថា៖ «យើងមានក្តីបារម្ភយ៉ាងជ្រាលជ្រៅ និងខកចិត្តសម្រាប់ប្រជាពលរដ្ឋទាំងឡាយ ដែលកំពុងត្រូវបានបង្ខំឲ្យចាកចេញពីផ្ទះសម្បែងរបស់ពួកគេ»។
លោក បានឲ្យដឹងទៀតថា ធនាគារពិភពលោកនឹងជួយដល់ជនទាំងនោះ ដែលកំពុងប្រឈមមុខនឹងការបណ្តេញចេញ ហើយថា ធនាគារបានស្នើផ្តល់ឲ្យរដ្ឋាភិបាល នូវប្រឹក្សាផ្នែកហិរញ្ញវត្ថុ និងបច្ចេកទេស។
លោក ហ្សូល្លិក បន្ថែមថា៖ «យើងបើកទូលាយទៅរកមធ្យោបាយដទៃទៀតដើម្បីជួយដល់ប្រជាពលរដ្ឋទាំងនេះ។ យើងបានអំពាវនាវម្តងហើយម្តងទៀតដល់រដ្ឋាភិបាលឲ្យបញ្ចប់ការបណ្តេញចេញ។ យើងកំពុងស្វែងរកការឆ្លើយតបបែបវិជ្ជមានមួយពីរដ្ឋាភិបាល»៕
No comments:
Post a Comment
yes