ប្រទេសកាន់តែច្រើន ហាមឃាត់ការនាំចូល
គ្រឿងឧបភោគបរិភោគពីជប៉ុន
ដោយ អៀង សុខម៉ិញ
បន្ទាប់ពីអនុសាសន៍របស់រដ្ឋាភិបាលជប៉ុន ហាមឃាត់មិនឲ្យទារកបរិភោគទឹកម៉ាស៊ីន នៅថ្ងៃម្សិលមិញមក ជាបន្តបន្ទាប់ ប្រទេសជាច្រើននៅលើពិភពលោក បាននិងកំពុងត្រួតពិនិត្យយ៉ាងខ្លាំង លើផលិតផលចំណីអាហារ បន្លែសាច់គ្រឿងសមុទ្ទ ដែលនាំចូលពីប្រទេសជប៉ុន ខ្លាចមានឆ្លងសារធាតុវិទ្យុសកម្ម។ នាំមុខដោយសហរដ្ឋ អាមេរិក ថ្ងៃនេះប្រទេសអូស្ត្រាលី កាណាដា ហុងកុង សិង្ហបុរី រុស្ស៊ី នាំគ្នាសម្រេចផ្អាក និងហាមឃាត់ការនាំចូលគ្រឿងឧបភោគបរិភោគជប៉ុន មកពីតំបន់ជិតមជ្ឈមណ្ឌលនុយក្លេអ៊ែរ ហ្វ៊ូគុស្ហ៊ីម៉ាដៃហ្ស៊ី។
ចំការផ្ទីរ épinard នៅ Ibaraki តាមបណ្តោយឆ្នេរខាងកើតប្រទេសជប៉ុនReuters/Jo Yong-Hak
ការពារប្រសើរជាងព្យាបាល ! ដោយផ្អែកលើពាក្យស្លោកនេះហើយបានជាអាជ្ញាធរ ប្រទេសអូស្ត្រាលី កាណាដា សិង្ហបុរី រុស្ស៊ី ហុងកុង បានសម្រេច នៅថ្ងៃនេះ ហាមឃាត់ និងផ្អាក ការនាំចូលគ្រឿងឧបភោគបរិភោគជប៉ុនមួយចំនួន ដែលមក Fukushima Gunma Ibaraki Tochigi មិនឲ្យចូលក្នុងប្រទេសរបស់ខ្លួន ដោយខ្លាចមានឆ្លងសារធាតុវិទ្យុសកម្ម។ ព្រោះសូមបញ្ជាក់ថាតំបន់ទាំងបួននេះស្ថិតនៅជិតបង្កើយនឹង មជ្ឈមណ្ឌលនុយក្លេអ៊ែរ ហ្វ៊ូគុស្ហ៊ីម៉ា-ដៃហ្ស៊ី។
ផលិតផលហាមឃាត់មានជារួម បន្លែផ្លែឈើស្រស់ ទឹកដោះគោ ចំណីអាហារធ្វើពីទឹកដោះគោ គ្រឿងសមុទ្ទ ត្រី បង្គា មឹក គ្រំងាវ សារាយសមុទ្ទ ។ល។ និង។ល។
ទាំងស្រស់ទាំងកក។ ក្រៅពីការហាមឃាត់ និងកាត់បន្ថយ ឬផ្អាកមួយរយៈការនាំចូល នៅថ្ងៃនេះ ប្រទេសកាណាដាបានបង្កើនការត្រួតពិនិត្យយ៉ាងខ្លាំងលើរាល់ទំនិញដែល នាំចូលពីជប៉ុន និងបានរក្សាសិទ្ធិចាត់វិធានការបន្ថែមទៀតប្រឆាំងនឹងគ្រោះឆ្លង ធាតុវិទ្យុសកម្ម ទៅតាមស្ថានការណ៍ជាក់ស្តែងនៅជប៉ុន។
បន្ទាប់ពីបានរកឃើញមានសារធាតុវិទ្យុសកម្មជាប់នៅនឹងនាវាដែលធ្វើ ដំណើរមកពីប្រទេសជប៉ុនមក ប្រទេសរុស្ស៊ី ក៏បានសម្រេចហាមឃាត់ការនាំចូលផលិតផលអាហារពីតំបន់ទាំងបួនរបស់ ជប៉ុន ដែលស្ថិតនៅជាប់មជ្ឈមណ្ឌលនុយក្លេអ៊ែរនោះដែរ។
ជាចំណែកមួយរបស់ចិន ហុងកុងជាប្រទេសទីមួយនៅអាស៊ី ដែលបានសម្រេចហាមឃាត់ការនាំចូលផលិតផលអាហារពីជប៉ុន តាំងពីថ្ងៃពុធម្សិលមិញមក។ ចំណែកប្រទេសសិង្ហបុរី ទើបចាត់វិធានការដូចគ្នានៅថ្ងៃព្រហស្បតិ៍នេះ។ ការិយាល័យត្រួតពិនិត្យសុខភាពចំណីអាហារនៃក្រសួងកសិកម្មហ្វីលីពីន ចេញបំរាមមិនឲ្យនាំចូលសូកូឡាជប៉ុន។
រីឯសហរដ្ឋអាមេរិកវិញ បានអនុម័តមុនគេ មិនឲ្យនាំចូលចូលផលិតផលអាហារជប៉ុន ខាងលើ តាំងពីថ្ងៃអង្គារមក។ គេពុំទាន់ឃើញមានសេចក្តីសម្រេចអ្វីចេញពីប្រទេសបារាំងនៅឡើយទេ ប៉ុន្តែបារាំងបានស្នើសុំទៅគណៈកម្មការអឺរ៉ុបរួចហើយ ដើម្បីដាក់ឲ្យមានប្រព័ន្ធត្រួតពិនិត្យ ដោយគ្មានចន្លោះ រាល់គ្រប់ផលិតផលអាហារស្រស់របស់ជប៉ុនទាំងអស់ មុននឹងអនុញ្ញាតឲ្យឆ្លងព្រំដែនចូលអឺរ៉ុប៕
ពីវិទ្យុ បារាំង អន្តរជាតិ RFI
No comments:
Post a Comment
yes