បុរសវ័យចំណាស់ម្នាក់ត្រូវកូនប្រុសបង្កើតអារ.កនឹងកាំបិតបម្រុងផ្ដាច់សង្ខារព្រោះតែសុរា ដែលកូនប្រុសអកតញ្ញូម្នាក់នេះផឹករហូតបាត់បង់ស្មារតី តែសំណាងល្អត្រូវបានកូនប្រុសបង្កើតម្នាក់ទៀតឃើញទាន់ចូលទៅជួយចាប់យកកាំបិតនោះចេញ ទាន់ ហើយនាំជនរងគ្រោះមកព្យាបាលនៅមន្ទីរពេទ្យខេត្ដកំពង់ចាម ។ រីឯកូនប្រុសវង្វេងស្មារតីត្រូវក្រុមគ្រួសារចាប់ចងនៅលើផ្ទះរបស់ខ្លួនដោយសុំអង្វរសមត្ថកិច្ចនគរបាលកុំឱ្យយកទោសពៃរ៍អ្វីឡើយ ។
ហេតុការណ៍នេះបានកើតឡើងកាលពីវេលាម៉ោង១៩ ថ្ងៃទី២៤ ខែកញ្ញា ឆ្នាំ២០១១ នៅលើលំនៅឋានរបស់ជនរងគ្រោះ ស្ថិតក្នុងភូមិព្រែកផ្ដៅ ឃុំវិហារធំ ក្រុងកំពង់សៀម ខេត្ដកំពង់ចាម ។
ជនរងគ្រោះឈ្មោះឡេង ចក់ ភេទប្រុស អាយុ៧៥ឆ្នាំ មានទីលំនៅភូមិ-ឃុំកើតហេតុ កំពុងសម្រាកព្យាបាលនៅមន្ទីរពេទ្យកំពង់ចាម ដោយមានស្នាមរបួសត្រង់បំពង់.ក បានផ្ដល់បទសម្ភាសន៍ដោយសំឡេងខ្សាវៗតិចៗថា នៅថ្ងៃទី២៤ ខែកញ្ញា ឆ្នាំ២០១១ វេលាម៉ោង ប្រហែល៧យប់ លោក(ឡេង ចក់) កំពុងដេកមើលទូរទស្សន៍នៅផ្ទះរបស់ខ្លួនជាមួយកូនប្រុសឈ្មោះចក់ ម៉េងឈុន អាយុ៣៩ឆ្នាំ ។
លោកឡេង ចក់ បន្ដថា ពេលនោះលោកបានឃើញកូនប្រុសឈ្មោះចក់ ម៉េងឈាង អាយុ៣០ឆ្នាំ ឡើងមកលើផ្ទះដោយសភាពស្រវឹងស្រា។ ឃើញដូច្នោះលោកបានស្ដីឱ្យកូនប្រុសនោះថា “អ្ហែងរវល់តែឈឺ អញខំមើលឯងយ៉ាងលំបាកទម្រាំបានជា ហើយឯងដើរផឹកបែបនេះឱ្យអញមើលម្ដេចជា”។ ពេលឮលោក(ឡេង ចក់)ស្ដីបន្ទោសដូច្នេះ កូនប្រុសឈ្មោះចក់ ម៉េងឈុន ស្រែកយំហើយដើរទៅក្រោមចូលចង្ក្រានបាយយកកូនកាំបិតដើរមកជិតគាត់ ហើយយកកាំបិតនោះសង្កត់លើបំពង់.ករបស់គាត់។ ភ្លាមនោះគាត់បានចាប់ដៃកូនប្រុសរុញចេញ ស្របពេលជាមួយគ្នានោះមានកូនប្រុសច្បងឈ្មោះចក់ ម៉េងឈុន ដែលកំពុងអង្គុយមើលទូរទស្សន៍ក្បែរនោះបានស្ទុះមកជួយចាប់យកកាំបិតចេញពីឈ្មោះចក់ ម៉េងឈាង ហើយយកខ្សែចាប់ចងកូនឈាង រួចនាំលោកមកកាន់មន្ទីរ ពេទ្យ ។
ជនរងគ្រោះឈ្មោះឡេង ចក់ បន្ដថា កូនប្រុសឈ្មោះចក់ ម៉េងឈាង បានដើរផឹកស្រារៀងរាល់ថ្ងៃ។ មានពេលខ្លះផឹករហូតសន្លប់ខ្លួនឯងធ្វើឱ្យខ្លួនគេក្លាយជាមនុស្សប្រមឹកបាត់បង់ស្មារតីវង្វេងវង្វាន់ចេះតែរត់ហើយស្រែកថា“គេដេញចាក់វា”។ លោកឡេង ចក់ បញ្ជាក់ថា វាក៏ដើរផឹកទៀតទើបខូចសតិបែបនេះ ។
គ្រូពេទ្យខេត្ដកំពង់ចាមបានបញ្ជាក់ថា ជនរងគ្រោះឈ្មោះឡេង ចក់ រងរបួសដាច់សរសៃតូចៗត្រង់បំពង់.កតែប៉ុណ្ណោះ ឯបំពង់ខ្យល់ពុំមានប៉ះពាល់មិនប៉ះពាល់ទេ ។
លោកអនុសេនីយ៍ឯក ចក់ សុខកៅ អធិការរងនគរបាលស្រុកកំពង់សៀមបានឱ្យដឹងថា ចំពោះករណីខាងលើនេះក្រុមគ្រួសាររបស់ជនរងគ្រោះសុំសមត្ថកិច្ចយកជនសង្ស័យឈ្មោះចក់ ម៉េងឈាង ទៅរកគ្រូព្យាបាលដោយមិនឱ្យសមត្ថកិច្ចចាត់ការឡើយ ៕
ពីគេហទំព័រ៖ នគរវត្ត
No comments:
Post a Comment
yes