កាលពីព្រឹកថ្ងៃទី២៦ខែ កញ្ញា ឆ្នាំ ២០១១ សមត្ថកិច្ចកងរាជអាវុធហត្ថរាជធានីភ្នំពេញដឹកនាំដោយលោក ឧត្តមសេនីយ៍ទោ យ៉ា គឹមអ៊ី មេបញ្ជាការកងរាជអាវុធហត្ថលើផ្ទៃប្រទេសនិងមេបញ្ជាការកងរាជអាវុធហត្ថរាជធានីភ្នំពេញបាននាំខ្លួនអតីតឯកឧត្តមចំនួន៣រូប ទៅកាន់តុលាការក្រុងភ្នំពេញពាក់ព័ន្ធពីបទក្លែងបន្លំឯកសារសាធារណៈ ប្រើប្រាស់ឯកសារសាធារណៈ និងផ្ដល់ឯកសារដោយទុច្ចរិត។
យោងតាមប្រភពព័ត៌មានពីមន្ត្រីអាវុធហត្ថមួយរូប ដែលសុំមិនឲ្យបញ្ចេញឈ្មោះ បានឲ្យដឹងថា ការនាំខ្លួនអតីត ឯកឧត្តមទាំងបីរូបនេះ គឺយោងតាមបទបញ្ជាពីឯកឧត្តមនាយឧត្តមសេនីយ៍ផ្កាយ៤ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និង ជាមេបញ្ជាការកងរាជអាវុធហត្ថលើផ្ទៃប្រទេសបានបញ្ជាឲ្យលោក ឧត្តមសេនីយ៍ទោ យ៉ា គឹមអ៊ី មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញបានដឹកនាំកម្លាំងចុះផ្ទាល់ដោយសហការជាមួយស្នងការស្រាវជ្រាវកងរាជអាវុធហត្ថលើផ្ទៃប្រទេសនិងដោយមានការបញ្ជាផ្ទាល់ពីព្រះរាជអាជ្ញារង មាស ចាន់ពិសិដ្ឋ បានកោះហៅ និង នាំខ្លួនអតីតឯកឧត្តម ទាំងបីរូបទៅកាន់តុលាការ ក្រុងភ្នំពេញ ដោយក្នុងនោះ មានឈ្មោះ ទី១. ឈ្មោះ ពន្លកហូ ភេទប្រុស អាយុ ៥៨ឆ្នាំ រស់នៅសហរដ្ឋអាមេរិក«រដ្ឋបុសស្តុន» ទី២. ឈ្មោះ ចាន់ កុសល ភេទប្រុស អាយុ៦៦ឆ្នាំ មានទីលំនៅផ្ទះលេខ ៩ ផ្លូវ ១៣៤ ក្រុមទី១៨សង្កាត់ វាលវង់ ខណ្ឌ៧មករា រាជធានីភ្នំពេញ និង ទី៣ ឈ្មោះ វៀវ បូរ៉ា ភេទប្រុស អាយុ ៥០ឆ្នាំ មានទីលំនៅផ្ទះលេខ ១១Bo សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ទាក់ទិននឹងការឃាត់ខ្លួនអតីតឯកឧត្តមទាំងបីរូបនេះ ត្រូវបានអ្នកសារព័ត៌មានទាំងទូរទស្សន៍ និង កាសែត បានធ្វើការសាកសួរទៅលោកឧត្តមសេនីយ៍ទៅ យ៉ា គឹមអ៊ី ដែលដឹកនាំកម្លាំងចុះឃាត់ខ្លួនអតីត ឯកឧត្តមទាំងបីរូប ទៅតុលាការ តែត្រូវលោកឧត្តមសេនីយ៍មានប្រសាសន៍យ៉ាងខ្លីថា ការឃាត់ខ្លួន ឯកឧត្តមទាំងបីរូបនេះ គឺសមត្ថកិច្ចយើងខ្ញុំអនុវត្តន៍តាមបញ្ជាពីព្រះរាជអាជ្ញាអមសាលាដំបូងរាជធានីភ្នំពេញ ដោយជននេះពាក់ព័ន្ធពីបទក្លែងបន្លំឯកសារ សាធារណៈ ផ្ដល់ឯកសារដោយទុច្ចរិត។
តាមប្រភពព័ត៌មានមួយទៀតដែលគួរឲ្យទុកចិត្តបានឲ្យដឹងថា អតីតឯកឧត្តម ទាំងបីរូបនេះ ត្រូវបានបញ្ឈប់មុខងារដោយព្រះរាជក្រឹត្យ ពីខែមេសានិងខែកញ្ញា ថ្មីៗនេះ ម្ល៉េះ។ នេះជាលើកទី២ ហើយដែលគេឃើញវត្តមានលោក ឧត្តមសេនីយ៍ទោ យ៉ា គឹមអ៊ីនាំខ្លួនជនសង្ស័យទៅតុលាការដោយផ្ទាល់ និង ដោយមានការការពារយ៉ាងប្រុងប្រយ័ត្នបំផុត ហើយអតីតឯកឧត្តមទាំងបីរូបនេះត្រូវបានតុលការសម្រេចចេញដីកាឃុំខ្លួននៅពន្ធនាគារព្រៃសរហើយដែរ។
គួរបញ្ជាក់ថាពាក់ព័ន្ធនិងការឃាត់ខ្លួនមន្ត្រីធំៗកន្លងមកលោក ឧត្តមសេនីយ៍ យ៉ា គឹមអ៊ី មិនងាយផ្ដល់ព័ត៌មានដល់អ្នកកាសែតឡើយដូចជាករណីឃាត់ខ្លួនអតីតផ្កាយបី ឈឿន ចាន់ថន នេះស្រាប់៕
ពីគេហទំព័រ៖ កម្ពុជាថ្មី
No comments:
Post a Comment
yes