មានករណីគ្រោះថ្នាក់ចរាចរមួយគួរឲ្យរន្ធត់ដោយឪពុកម្ដាយនិងកូនៗជិះម៉ូតូមួយគ្រឿងមានគ្នារហូតទៅដល់៥នាក់ពេលម៉ូតូបែកកង់មុខក៏ដួលបោកក្បាលស្លាប់ពីរនាក់៣នាក់របួសធ្ងន់ធ្ងរសន្លប់គ្មានដឹងខ្លួន។
ករណីគ្រោះថ្នាក់ចរាចរគួរឲ្យរន្ធត់ខាងលើបានកើតឡើងកាលពីថ្ងៃទី ២៩ ខែ កញ្ញា ឆ្នាំ ២០១១វេលាម៉ោង១១ព្រឹក លើកំណាត់ផ្លូវជាតិលេខ ១ត្រង់ចំណុច ភូមិ សង្កែចុង ឃុំក្រាំងស្វាយ ស្រុកកំពង់ត្របែកខេត្តព្រៃវែង។
ប្រភពព័ត៌មានបានឲ្យកម្ពុជាថ្មីដឹងថា ជនរងគ្រោះជិះម៉ូតូម៉ាក HONDA C125 ស៊េរី ២០០៦ ពណ៍ខ្មៅ អ្នកជិះមានប្ដីប្រពន្ធ កូន ទាំងអស់ចំនួន ៥នាក់ចេញពីភូមិភ្នំស្រូវ ឃុំ រាជ្យមន្ទីរ ស្រុក កំពង់រោទិ៍ ដោយធ្វើដំណើរទៅពីស្រុកកំណើតទៅធ្វើការនៅភ្នំពេញវិញ លុះមកដល់ចំណុចកើតហេតុខាងលើក៏ស្រាប់តែបែកកង់ខាងមុខរេចង្កូតដួលបោកក្បាលទៅនឹងផ្លូវជាតិលេខ ១ ហើយក៏មានរថយន្តមួយគ្រឿងមកកៀរបណ្ដាលឲ្យបែកក្បាលស្លាប់ប្ដីនៅនឹងកន្លែង និង របួសធ្ងន់ចំនួន ៤នាក់ ក៏ប៉ុន្តែកន្លះម៉ោងក្រោយមកទើបមានរថយន្តសង្គ្រោះទៅដល់ដឹកជនរងគ្រោះទៅសង្គ្រោះនៅមន្ទីរពេទ្យខេត្តស្វាយរៀង តែពេលមកដល់ពាក់កណ្ដាលផ្លូវត្រូវស្លាប់ម្នាក់ទៀត។ ប្រភពខាងលើបានឲ្យកម្ពុជាថ្មីដឹងថាជនរងគ្រោះខាងលើទី១ ឈ្មោះ តូច សុខុម អាយុ ៣៨ឆ្នាំ ត្រូវជាប្ដី ស្លាប់នៅកន្លែងកើតហេតុទី២ ឈ្មោះ ហួយ ច្រិប អាយុ ៣៥ឆ្នាំ ត្រូវជាប្រពន្ធជនរងគ្រោះខាងលើ របួសបែកក្បាល និង បាក់ចង្កេះ ទី៣ ឈ្មោះ ពេជ្រ សាវឌី ភេទប្រុសអាយុ ១៤ឆ្នាំ ត្រូវជាកូន ស្លាប់នៅពាក់កណ្ដាលផ្លូវ ទី៤ ឈ្មោះ ចិន្តា ភេទប្រុសអាយុ១២ឆ្នាំ ត្រូវជាកូនរបួសបែកក្បាល បាក់ជើងឆ្វេង បាក់ដៃឆ្វេង ទី៥ ឈ្មោះ ពេជ្រ សុវណ្ណរដ្ឋ ភេទប្រុសអាយុ១ខួប រងរបួសបែកក្បាលត្រូវបញ្ជូនជាបន្ទាន់ទៅសង្គ្រោះនៅមន្ទីរពេទ្យគន្ធបុប្ផា ភ្នំពេញ។ មានគ្រោះថ្នាក់ចរាចរមួយផ្សេងទៀត ដោយម៉ូតូបុកបណ្ដាលឲ្យបែកក្បាលត្រង់ចិញ្ចើមផុងលាលាដ៏ចេញខួរ សន្លប់ ស្ដូកស្តឹងដេកក្នុងមន្ទីរពេទ្យ។ ករណីនេះបានកើតឡើងកាលពីថ្ងៃទី២៩ខែ កញ្ញា ឆ្នាំ ២០១១ វេលាម៉ោង ១១ព្រឹកដូចគ្នា។ ជនរងគ្រោះ មានឈ្មោះ អន ឆាវ ភេទប្រុស អាយុ ១០ឆ្នាំ។តាមប្រភពព័ត៌មានពីអ្នកឃើញហេតុការណ៍នេះបានឲ្យដឹងថា នៅវេលាម៉ោងកើតហេតុខាងលើកុមាររូបនេះរត់លេងតាមផ្លូវលំជាមួយបងប្អូនពេលនោះ ម៉ូតូបើកលឿនមកបុកយ៉ាងពេញទំហឹងបណ្ដាលឲ្យរងរបួសត្រូវបានគេបញ្ជូនទៅកាន់មន្ទីរពេទ្យខេត្តពុំដឹងថាមានសង្ឃឹមឬអត់នោះទេ៕
គឹមសេង
ពីគេហទំព័រ៖ កម្ពុជាថ្មី
No comments:
Post a Comment
yes