ក្មេងប្រុសម្នាក់បានស្លាប់ភ្លាមៗ នៅនឹងកន្លែង ហើយយុវជនម្នាក់ទៀតរងរបួសយ៉ាងធ្ងន់ធ្ងរ បន្ទាប់ពីគេទៅឃ្វាលគោនៅក្នុងចំការប្រេងខ្យល់មួយកន្លែង ហើយប្រទះឃើញគ្រាប់បែកមានសណ្ឋានរាងដូចជាកណ្តឹងគោមួយចង្កោមប្រមាណជាង១០គ្រាប់ ដែលគេមិនស្គាល់មុខបង្កៃចោល នាំគ្នារើសកាន់លេង ក៏ផ្ទុះលាន់កក្រើកដី បណ្តាលឱ្យស្លាប់ម្នាក់ និងរបួសធ្ងន់ម្នាក់។
ហេតុការណ៍នោះបានកើតឡើងកាលពីវេលាម៉ោង៣និង១០នាទីរសៀលថ្ងៃទី២៩ កញ្ញា ២០១១ នៅក្នុងចំការប្រេងខ្យល់ទួលតាឯក ស្ថិតក្នុងភូមិប្រសាទ សង្កាត់ស្នោរ ខណ្ឌដង្កោ ជាយរាជធានីភ្នំពេញ ។
យុវជនដែលរងរបួសធ្ងន់ធ្ងរនោះឈ្មោះស្តើង មករា ហៅវ៉ិត អាយុ២២ឆ្នាំ មុខរបរកសិករ រងរបួសដាច់ដៃទាំងសងខាង ហើយផ្ទៃមុខ និងខ្លួនប្រាណរងរបួសស្ទើរសុសសាច់ត្រូវបានគេនាំយកទៅសង្គ្រោះបន្ទាន់នៅមន្ទីរពេទ្យចោមចៅ និងម្នាក់ទៀតដែលស្លាប់បាត់បង់ជីវិតឈ្មោះធឿន វុត្ថា អាយុ១៣ឆ្នាំ ត្រូវអំបែងគ្រាប់បែកចំកណ្តាលថ្ងាស និងខ្លួនប្រាណស្លាប់ភ្លាមៗនៅនឹងកន្លែងកើតហេតុ ពួកគេមានទីលំនៅភូមិស្នោរខាងកើត សង្កាត់ស្នោរ ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះទាំង២នាក់នេះបាននាំគ្នាទៅឃ្វាលគោនៅក្នុងចំការប្រេងខ្យល់ខាងលើហើយពួកគេក៏បានប្រទះឃើញគ្រាប់បែកមួយចង្កោមជាង១០គ្រាប់ដែលក្នុង១គ្រាប់ៗ មានចងខ្សែនីឡុងដូចខ្សែយឺតចម្ពាមកៅស៊ូ និងមានសណ្ឋានរាងដូចជាកណ្តឹងគោ។ ខណៈនោះ ពួកគេបាននាំគ្នារើសយួរលេង ស្រាប់តែផ្ទុះលាន់យ៉ាងកក្រើកដី បណ្តាលឱ្យស្លាប់បាត់បង់ជីវិតម្នាក់ និងម្នាក់ទៀតរងរបួសយ៉ាងធ្ងន់ធ្ងរ ហើយសង្ឃឹមរស់រានមានជីវិតតិចតួចបំផុត ៕
ពីគេហទំព័រ៖ កោះសន្តិភាព
No comments:
Post a Comment
yes