ប្រិយមិត្តគាំទ្រក្រុមហ៊ុន Apple ចាប់ពីបុរីញូវយ៉ករហូតដល់ប្រទេសអូស្ត្រាលី បានប្រមូលផ្ដុំគ្នាកាន់ទុក្ខចំពោះមរណភាពលោក ស្ទីវ ចប ដែលដាក់ផលិតផល Apple កម្រងផ្កា និងសាររំលែកទុក្ខនៅកាន់បុរសម្នាក់ ដែលបានផ្លាស់ប្ដូរឧស្សាហកម្មកុំព្យូទ័រ តន្ត្រី និងទូរស័ព្ទ។
ទង់ជាតិនៅខាងក្រៅទីស្នាក់ការកណ្ដាលរបស់ក្រុមហ៊ុន Apple នៅសង្កាត់ 1 Infinite Loop នៅទីក្រុងឃ្យូភើធីណូ រដ្ឋកាលីហ្វ័រញ៉ា ត្រូវបានគេបង្ហូតចុះពាក់កណ្ដាលដង ខណៈក្រុមអ្នកចូលរួមកាន់ទុក្ខ បានប្រមូលផ្ដុំគ្នានៅតាមទីលានជិតៗនោះ។ ប្រិយមិត្តរបស់ក្រុមហ៊ុន Apple ដែលស្ថិតក្នុងទឹកមុខក្រៀមក្រំ បានដាក់កម្រងផ្កាសម្ដែងមរណទុក្ខ ហើយបុរសម្នាក់ផ្លុំត្រែបន្លឺសំឡេងសោកសៅ។
បុរសម្នាក់ឈ្មោះ ចិត្រា អាប់ដុលហ្សាដេះ បុគ្គលិកសុខាភិបាលនៅទីក្រុងឃ្យូភើធីណូ បាននិយាយថា៖ «ក្នុងចិត្តរបស់ខ្ញុំ គ្មានអ្វីខុសប្លែកគ្នារវាងលោក ស្ទីវ និងអ្នកវិទ្យាសាស្ត្របារាំង ល្វីស ប៉ាស្ទ័រ នោះឡើយ»។ បុរសម្នាក់នេះថ្លែងដូច្នេះដោយប្រៀបកេរ្តិ៍ដំណែលលោក ស្ទីវ ទៅនឹងកេរ្តិ៍ដំណែលរបស់គីមីវិទូជនជាតិបារាំងលោក ល្វីស ប៉ាស្ទ័រ។បុរសឈ្មោះ បេន ឈីស ជាវិស្វករអាយុ ២៩ឆ្នាំម្នាក់នៅក្រុមហ៊ុនអ៊ីនធឺណិត Yelp និងធ្លាប់ជាអ្នកហ្វឹកហាត់ការងារនៅក្រុមហ៊ុន Apple បានធ្វើដំណើរពីទីក្រុងសាន់ហ្វ្រាន់ស៊ីស្កូ មកកាន់ទីស្នាក់ការកណ្ដាលរបស់ Apple ភ្លាមៗបន្ទាប់ពីចប់ម៉ោងធ្វើការ។ គាត់បានដាក់កម្រងផ្កា និងបាននិយាយថា៖ «នេះគឺជារឿងត្រឹមត្រូវដែលត្រូវធ្វើ»។
នៅហាងលក់របស់ក្រុមហ៊ុន Apple នៅសង្កាត់ពាណិជ្ជកម្មមួយក្នុងទីក្រុងសាន់ហ្វ្រាន់ស៊ីស្កូ មនុស្សម្នាបានដាក់តាំងរូបថតរបស់លោក ចប នៅលើកុំព្យូទ័របន្ទះស្ដើង iPad របស់ពួកគេ និងបិទសន្លឹកស្វាគមន៍ និងបំពាក់វាទៅនឹងបង្អួចហាង ដោយនិយាយថា «អរគុណលោក ស្ទីវ» និង «ខ្ញុំស្អប់ជំងឺមហារីក»។ នៅមានការដុតទាន និងដាក់ផ្លែប៉មក្រហមនៅខាងក្រៅហាងថែមទៀត។
បុគ្គលិកម្នាក់នៅហាង Apple នៅទីក្រុងសាន់ហ្វ្រាន់ស៊ីស្កូ លោក ខូរី ម៉ូល បានចាត់ទុកលោក ចប ជាបុគ្គលដ៏គំរូម្នាក់។ ដោយដៃកាន់សន្លឹក iPad មួយដែលរំលឹកលោក ចប នោះ លោក ម៉ូល និយាយថា៖ «យើងមានសំណាងដែលបានធ្វើការងារជាមួយគាត់អស់រយៈពេលជាយូរ។ អ្វីដែលគាត់បានធ្វើសម្រាប់ពួកយើងជាទម្លាប់នោះ វាបានស្ថិតនៅក្នុងចិត្តមនុស្សគ្រប់គ្នា។ សូម្បីតែពួកគេមិនធ្លាប់ប្រើប្រាស់ផលិតផល Apple ក៏ដោយ ក៏ឥទ្ធិពលដែលពួកគេមាន គឺមានសារសំខាន់ខ្លាំងណាស់»៕
No comments:
Post a Comment
yes