ប្រជាពលរដ្ឋចំនួន ១២នាក់ ក្នុង ២២នាក់ រស់នៅភូមិទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានឆ្លើយបំភ្លឺក្នុងអង្គសវនាការកាលពីថ្ងៃសុក្រ ទី២៨ ខែតុលា ថា ពួកគេពុំបានប្រព្រឹត្តដូចការប្ដឹងចោទប្រកាន់នោះទេ។
មេធាវីការពារក្ដីភាគីពលរដ្ឋជាចុងចោទបានស្នើសុំឲ្យសាលាដំបូងខេត្តបន្ទាយមានជ័យ ពិចារណា និងលើកលែងការចោទប្រកាន់ទៅលើអ្នកភូមិចំនួន ២២នាក់ ឲ្យបានរួចផុតពីការឃុំខ្លួននៅក្នុងពន្ធនាគារ។
អ្នកភូមិទាំង ២២នាក់ត្រូវបានលោក តុប ចន្ទសេរីវុឌ្ឍ អតីតព្រះរាជអាជ្ញាតុលាការខេត្តពោធិ៍សាត់ ចោទប្រកាន់ពីបទធ្វើឲ្យខូចខាតដោយចេតនាលើទ្រព្យសម្បត្តិរដ្ឋ កាលពីឆ្នាំ២០០៨ ទាក់ទិនបញ្ហាទំនាស់ដីធ្លីនៅក្នុងខេត្តបន្ទាយមានជ័យ។
លោក ឡុង លន់ មេធាវីការពារក្ដីមកពីសមាគមការពារសិទ្ធិមនុស្សអាដហុក បានមានប្រសាសន៍ថា តុលាការខេត្តបន្ទាយមានជ័យ បានលើកពេលប្រកាសសាលក្រមដោយពុំបានកំណត់កាលបរិច្ឆេទ បន្ទាប់ពីបានបើកសវនាការសួរដេញដោលពេញមួយព្រឹក កាលពីថ្ងៃសុក្រ ទី២៨ ខែតុលា ឆ្នាំ២០១១។
លោកថា ករណីប្ដឹងអ្នកភូមិទាំង ២២នាក់ កើតមានតាំងពីឆ្នាំ២០០៨។ កូនក្ដីរបស់លោកដែលចូលឆ្លើយក្នុងអង្គសវនាការ បានបញ្ជាក់ជូនតុលាការថា ពួកគេពុំបានប្រព្រឹត្តដូចការចោទប្រកាន់របស់តំណាងអយ្យការទេ។ ពួកគេក៏មិនជាប់ពាក់ព័ន្ធទៅនឹងការវាយបំបាក់បង្គោលព្រំរបស់សុរិយោដីនោះដែរ។
«ទស្សនៈខ្ញុំជាមេធាវីមើលឃើញថា ការចោទប្រកាន់របស់តំណាងអយ្យការពុំមានភស្តុតាងណាមួយដាក់បន្ទុកឲ្យបានច្បាស់លាស់ថា ប្រជាពលរដ្ឋដែលជាកូនក្ដីខ្ញុំទាំងអស់នេះ ប្រព្រឹត្តបទល្មើសហ្នឹង គឺមិនមានទេ សូម្បីតែសាក្សីពីរនាក់ដែលពួកគាត់អះអាងថា ជាអ្នកសារព័ត៌មាន គាត់បានបញ្ជាក់ដែរ គាត់បានឃើញបង្គោលហ្នឹងបាក់ ប៉ុន្តែគាត់មិនបានឃើញអ្នកណាជាអ្នកធ្វើឲ្យខូចនោះទេ»។
វិទ្យុអាស៊ីសេរី នៅពុំទាន់អាចទាក់ទងប្រធានចៅក្រមជំនុំជម្រះ លោក ធៀម ច័ន្ទពិសិដ្ឋ ដើម្បីសុំសេចក្ដីបញ្ជាក់បន្ថែមជុំវិញការស្នើសុំរបស់មេធាវីការពារក្ដីអ្នកភូមិទាំង ២២នាក់នេះបានទេ។
លោក ស៊ុំ ចន្ទគា ជាប្រធានសម្របសម្រួលរបស់សមាគមអាដហុក ប្រចាំខេត្តបន្ទាយមានជ័យ។ លោកបានឲ្យដឹងថា សំណុំរឿងទំនាស់ដីធ្លីនេះបានកើតមានតាំងពីឆ្នាំ២០០៨។ អាជ្ញាធរបានចុះទៅវាស់វែងលើដីប្រជាពលរដ្ឋស្ថិតនៅភូមិទួលប្រាសាទ សង្កាត់ប៉ោយប៉ែត ហើយក៏ត្រូវប្រជាពលរដ្ឋលើកគ្នាប្រឆាំងជំទាស់។ ប៉ុន្តែអាជ្ញាធរបានប្ដឹងចោទប្រកាន់អ្នកភូមិ ២២នាក់ពីបទបំផ្លិចបំផ្លាញបង្គោលសុរិយោដី។
ក្រោយមកមានអ្នកភូមិបីនាក់ត្រូវបានអតីតព្រះរាជអាជ្ញាតុលាការខេត្តពោធិ៍សាត់ លោក តុប ចន្ទសេរីវុឌ្ឍ ចាប់ឃុំអស់រយៈពេលជាច្រើនខែ។ អ្នកភូមិទាំងបីនាក់ក្នុងចំណោម ២២នាក់នោះត្រូវបានតុលាការដោះលែងឲ្យនៅក្រៅឃុំវិញ ក្រោយពីអ្នកភូមិលើកគ្នាធ្វើបាតុកម្មទាមទារ និងមានលិខិតអន្តរាគមន៍ពីក្រសួងយុត្តិធម៌នោះមក។
នៅក្នុងអង្គសវនាការកាលពីព្រឹកថ្ងៃសុក្រ ទី២៨ ខែតុលា តំណាងអយ្យការបានសំណូមពរឲ្យលោកប្រធានចៅក្រមជំនុំជម្រះធ្វើការសម្រេចក្ដីឲ្យប្រជាពលរដ្ឋទាំង ២២នាក់ ទៅតាមផ្លូវច្បាប់ ដោយសំអាងលើហេតុផលថា បង្គោលព្រំដីមានការខូចខាតពិតបា្រកដមែន។ ប៉ុន្តែក្រុមអ្នកភូមិចំនួន ១២ ក្នុងចំណោម ២២នាក់ បានបញ្ជាក់ថា តំណាងអយ្យការមិនបានរកឃើញភស្តុតាងណាដែលអាចបញ្ជាក់ថា ពួកគេទាំង ២២នាក់ជាអ្នកធ្វើឲ្យបាក់បង្គោលព្រំដីនោះទេ៕
ពីវិទ្យុ អាស៊ីសេរី
No comments:
Post a Comment
yes