សកម្មជនស្ម័គ្រចិត្តអង្គការខុមហ្វែ្រល ប្រចាំស្រុកលំផាត់ គឺលោក ស្វិន វេវ។ លោកបានបញ្ជាក់ថា លោកបានខកខានធ្វើសម្រង់មតិជាមួយប្រជាពលរដ្ឋនៅឃុំកាឡែង តាំងពីថ្ងៃទី២៧ ខែតុលា ឆ្នាំ២០១១ រហូតបច្ចុប្បន្ន ដោយសារតែនាយប៉ូលិសប៉ុស្តិ៍ និងមេឃុំមិនអនុញ្ញាតឲ្យលោកជួបសម្ភាសន៍ជាមួយប្រជាពលរដ្ឋតាមគម្រោងរបស់ខុមហ្វ្រែល ដើម្បីប្រមូលទិន្នន័យគុណភាពបញ្ជីឈ្មោះបោះឆ្នោតឆ្នាំ២០១១។
លោក ស្វិន វេវ បន្ថែម៖ «មានពាក់ប័ណ្ណបង្ហាញមេឃុំបង្ហាញអីទាំងអស់ លិខិតបេសកកម្មហ្នឹងបង្ហាញឲ្យគាត់មើលទៀត។ គាត់ថា មិនឲ្យចុះទេ ព្រោះយើងធ្វើមិនត្រូវគេថា មិនបានសុំស្រុកមិនបានសុំឃុំ»។
អង្គការខុមហ្វ្រែល បានបើកវគ្គបណ្ដុះបណ្ដាលដល់សកម្មជនមកពីខេត្តក្រុងទាំង ២៤ ដើម្បីធ្វើការអង្កេតទៅលើប្រជាពលរដ្ឋជាង ៨ពាន់នាក់នៅតាមមូលដ្ឋានមួយចំនួន ដើម្បីប្រមូលទិន្នន័យបន្ថែមពីចំណុចវិជ្ជមាន និងអវិជ្ជមានស្ដីពីលទ្ធផលនៃយុទ្ធនាការចុះឈ្មោះ និងពិនិត្យបញ្ជីឈ្មោះបោះឆ្នោតឆ្នាំ២០១១ ដើម្បីធ្វើសវនកម្មវាយតម្លៃបញ្ជីបោះឆ្នោតនេះនាចុងខែមករា ឆ្នាំ២០១២។
មេឃុំកាឡែង ស្រុកលំផាត់ លោក ស៊ុត សុំ មានប្រសាសន៍ទទួលស្គាល់ថា លោកពិតជាមិនអនុញ្ញាតឲ្យសកម្មជនខុមហ្វ្រែល ធ្វើសកម្មភាពណាមួយក្នុងមូលដ្ឋានរបស់លោកមែន ដោយសារពុំមានលិខិតអនុញ្ញាតពីអាជ្ញាធរខេត្ត។ លោកបញ្ជាក់ថា នេះគឺជាការណែនាំរបស់អាជ្ញាធរថ្នាក់ស្រុកដូច្នេះលោកត្រូវអនុវត្តតាមការណែនាំនេះ៖ «គ.ជ.ប. គេនិយាយដែរមិនត្រូវប្រកាន់គណបក្សនយោបាយណាទេ ត្រូវតែមានខេត្ត និងស្រុក ចុះហត្ថលេខាមិនអ៊ីចឹង?»។
ប្រធានលេខាធិការដ្ឋានខេត្តរៀបចំការបោះឆ្នោតលោក ប៉ែន ឈុនឌី បានបញ្ជាក់ថា បញ្ហាដែលកើតមាននេះមិនឋិតក្រោមសមត្ថកិច្ចរបស់គណៈកម្មការរៀបចំការបោះឆ្នោតនោះទេ។ លោកផ្ដល់ជាយោបល់ថា អ្នកទទួលខុសត្រូវខុមហ្វ្រែល គួរធ្វើការសម្របសម្រួលបញ្ហានេះជាមួយមន្ត្រីអាជ្ញាធរដើម្បីសម្រេចបានលទ្ធផលរបស់ខ្លួនតាមការគ្រោងទុក៖ «ខាងខ្ញុំនេះគឺផ្ដោតសំខាន់ គឺការពិនិត្យបញ្ជីចុះឈ្មោះបោះឆ្នោតក្នុងអំឡុងពេល ១ កញ្ញា រហូតដល់ ១៥ តុលាទេ»។
នាយកប្រតិបត្តិអង្គការខុមហ្វ្រែល គឺលោក គល់ បញ្ញា បានបញ្ជាក់ថា គណៈកម្មាធិការរៀបចំការបោះឆ្នោតមានតួនាទីសំខាន់ណាស់ដើម្បីធ្វើយ៉ាងណាឲ្យក្រុមសង្កេតការណ៍បំពេញការងារបានត្រឹមត្រូវ ដើម្បីធ្វើបច្ចុប្បន្នភាពបញ្ជីឈ្មោះបោះឆ្នោតរហូតដល់ថ្ងៃកំណត់បោះឆ្នោត៖ «យើងចង់ឲ្យថ្នាក់មូលដ្ឋានធ្វើការសិន ព្រោះអត់មានរឿងអីធំដុំសោះ។ យើងត្រូវតែអនុវត្តតាមភារកិច្ច ហើយត្រូវការគាំទ្រ បើមិនអ៊ីចឹងទេ បញ្ជាក់ថា កន្លែងឃុំដែលហាមឃាត់យើងហ្នឹងមានបញ្ហា»។
អ្នកនាំពាក្យក្រសួងមហាផ្ទៃ លោក ខៀវ សុភ័គ។ លោកបានបញ្ជាក់ថា ជាគោលការណ៍ខុមហ្វ្រែល មិនចាំបាច់សុំលិខិតអនុញ្ញាតពីអាជ្ញាធរខេត្តទៀតទេ។ លោកពន្យល់ថា អ្វីៗវានឹងប្រសើរ ប្រសិនណាខុមហ្វ្រែល ធ្វើការជូនដំណឹងដល់អាជ្ញាធរមុនចុះទៅមូលដ្ឋាន៖ «មិនអីទេគ្រាន់តែជាការជូនព័ត៌មានខ្ញុំទៅធ្វើ Survey (ស្ទង់មតិ) នៅទីកន្លែងនេះ។ អាហ្នឹងវាអត់មានផ្លូវច្បាប់ទេ វាជាការរាប់អានគ្នា ការសហការគ្នា»។
នៅខេត្តរតនគិរី សកម្មជនខុមហ្រ្វែល ចំនួន ៩នាក់ បានចុះធ្វើសម្រង់មតិនេះនៅឃុំចំនួន៦ និងត្រូវសម្ភាសប្រជាពលរដ្ឋពី ២០០ ទៅ ៣០០នាក់ ចាប់ពីថ្ងៃទៅ២៧ ខែតុលា ឆ្នាំ២០១១ សម្រាប់រយៈពេលពី៥ ទៅ ៧ថ្ងៃ ក៏ប៉ុន្តែរហូតមកទល់នឹងថ្ងៃសៅរ៍ ទី២៩ ខែតុលា នេះ ក្រៅពីឃុំកាឡែង មិនឃើញមានប្រតិកម្មហាមឃាត់ពីមន្ត្រីអាជ្ញាធរមូលដ្ឋានផ្សេងទៀតឡើយ។
យ៉ាងនេះក្ដី អភិបាលស្រុកលំផាត់ លោក គង់ ស្រ៊ុន។ លោកបានបញ្ជាក់ថា ស្រុកនឹងធ្វើការសម្របសម្រួលករណីនេះវិញ ប្រសិនខុមហ្រ្វែល ជូនដំណឹងមកអាជ្ញាធរស្រុក។
នាយកអង្គការខុមហ្វែ្រល ឲ្យដឹងថា មានខេត្តចំនួនបីផ្សេងទៀតក៏កើតមានបញ្ហាហាមឃាត់សកម្មជនចុះធ្វើសម្រង់មតិនេះដូចគ្នា ក៏ប៉ុន្តែខុមហ្វ្រែល នៅមូលដ្ឋានបានធ្វើការសម្របសម្រួលរួចរាល់នៅខេត្តកំពត និងកំពុងបន្តដោះស្រាយខេត្តផ្សេងទៀតដែលមិនមានការយល់គ្នា៕
ពីវិទ្យុ អាស៊ីសេរី
No comments:
Post a Comment
yes