ក្រុមគ្រួសារមួយដែលមានជីវភាពក្រលំបាកបានជួបរឿងហេតុផ្ទួនៗគ្នា គឺជីតាមានជំងឺទឹកនោមផ្អែមធ្ងន់ធ្ងរកំពុងព្យាបាលនៅមន្ទីរពេទ្យ ពេលនេះបានជួបហេតុការណ៍សោកសង្រេងគឺចៅប្រុសអាយុទើបតែ២ខួប ដែលដេកនៅលើគ្រែក្រោមផ្ទះជាមួយម្ដាយបានរមៀលពីលើគ្រែធ្លាក់ចូលទៅក្នុងទឹកស្លាប់យ៉ាងអាណោចអាធ័មក្បែរគ្រែដេកដែលមានជម្រៅទឹកត្រឹមជង្គង់ ។
ហេតុការណ៍ដែលនឹកស្មានមិនដល់ខាងលើនេះបានធ្វើឱ្យមានការភ្ញាក់ផ្អើលដល់ប្រជាពលរដ្ឋ និងក្រុមគ្រួសារកាលពីវេលាម៉ោង២និង៤៥នាទីរំលងអធ្រាត្រឈានចូលថ្ងៃទី៦ ខែតុលា ឆ្នាំ២០១១ នៅចំណុចក្រោមផ្ទះរបស់កុមារារងគ្រោះ ស្ថិតក្នុងភូមិដីឥដ្ឋកោះផុស ឃុំដីឥដ្ឋ ស្រុកកៀនស្វាយ ។
ក្មេងប្រុសរងគ្រោះដែលស្លាប់យ៉ាងអាណោចអាធ័មនៅក្នុងទឹកក្បែរគ្រែដេករបស់ខ្លួននេះឈ្មោះ ស សុផា អាយុទើបតែ២ខួប ម្ដាយឈ្មោះ ស សុផល អាយុ២១ឆ្នាំ រកស៊ីធ្វើជ្រក់ត្រសក់លក់ ឪពុកឈ្មោះខៃ សំអឿន អាយុ២៤ឆ្នាំ ទៅធ្វើការនៅព្រំដែនកម្ពុជា-ថៃ ។
ហេតុការណ៍អាណោចអាធ័មខាងលើនេះត្រូវបានស្ដ្រីម្នាក់ដែលត្រូវជាជីដូនរបស់កុមារារងគ្រោះបានរៀបរាប់ដោយទឹកភ្នែកថា នៅយប់ថ្ងៃកើតហេតុ រូបគាត់បានជាប់រវល់ទៅកំដរប្ដីដែលត្រូវជាជីតារបស់ក្មេងប្រុសរងគ្រោះនៅមន្ទីរពេទ្យរុស្ស៊ី ដោយសារតែជំងឺទឹកនោមផ្អែមមានស្ថានភាពធ្ងន់ធ្ងរដំបៅជើងមើលមិនជាតម្រូវឱ្យកាត់។ នៅយប់នោះពុំមានអ្នកណាដេកនៅលើផ្ទះនោះឡើយ ព្រោះកូនចៅរបស់គាត់ពិបាកឡើងចុះផ្ទះលិចទឹកទៀត ហើយពួកវាក៏នាំគ្នាដេកលើគ្រែក្រោមផ្ទះដើម្បីងាយស្រួលងើបរើជ្រក់ត្រសក់យកទៅលក់នៅផ្សារ ។
ស្ដ្រីរូបនោះបានបន្ដទៀតថា ស្រាប់តែនៅវេលាម៉ោង២និង៤៤នាទី កូនរបស់គាត់បានងើបមករើជ្រក់ត្រសក់ហើយមិនឃើញចៅដេកនៅលើគ្រែនោះឡើយស្រាប់តែរាវក្នុងទឹកក្បែរគ្រែក៏ប្រទះឃើញលង់ទឹកស្លាប់បាត់ទៅហើយធ្វើឱ្យមានការក្ដុកក្ដួលរំជួលចិត្ដទាំងកណ្ដាលយប់ភ្ញាក់ផ្អើលដល់ប្រជាពលរដ្ឋតែម្ដង ។
ស្ដ្រីជាម្ដាយឈ្មោះ ស សុផល បានយំរៀបរាប់ក្បែរសាកសពកូនប្រុសជាទីស្រឡាញ់របស់ខ្លួនថា នៅយប់នោះដោយអស់កម្លាំងពីក្បាលព្រលប់ក្នុងការធ្វើជ្រក់ត្រសក់ដាក់ក្នុងពាង ហើយក៏នាំកូនប្អូនស្រីប្រុស២នាក់ទៀតដេកលើគ្រែរួមគ្នាដោយដាក់កូនប្រុសឱ្យដេកក្បែរ។ ជារៀងរាល់យប់តែងតែភ្ញាក់ឡើងដើម្បីមើលកូនរហូតគឺពុំដែលដេកលង់នោះទេ។ នៅយប់ថ្ងៃកើតហេតុដោយអស់កម្លាំង ពេកពេលដេកគឺពុំបានដឹងខ្លួននោះឡើយហើយក៏ពុំបានដឹងថាកូនប្រុសរបស់ខ្លួនរមៀលធ្លាក់ពីលើគ្រែពេលណានោះឡើយ ស្រាប់តែភ្ញាក់ឡើងដើម្បីរើជ្រក់ត្រសក់យកមកលក់ក៏មិនឃើញកូននៅលើគ្រែនាំគ្នាឆោឡោរាវរកឃើញក្នុងទឹកក្បែរជើងគ្រែដែលដេកជាមួយគ្នា ។
ស្ដ្រីជាម្ដាយបានរៀបរាប់ដោយការអាណិតអាសូរទៀតថា នេះជាកូនប្រុសទី១ កន្លងមករពិសណាស់ហើយជាក្មេងឆ្លាតថែមទៀតផង មិនគួរណាជួបហេតុការណ៍អាក្រក់ដូច្នេះសោះ ។
បន្ទាប់ពីទទួលបាននូវដំណឹងអកុសលប្រជាពលរដ្ឋរស់នៅក្នុងភូមិផងរបងជាមួយមានការអាណិត
អាសូរយ៉ាងខ្លាំងនាំគ្នាដើរលុយទឹកត្រឹមជង្គង់ទៅចូលរួមរំលែកទុក្ខដល់ក្រុមគ្រួសារសព ហើយគ្រួសារខ្លះទៀតបានរៃអង្គាសជាប្រាក់ដើម្បីរៀបចំធ្វើក្ដារមឈូសបញ្ចុះសពក្មេងប្រុសរងគ្រោះ។ ដោយមើលឃើញពីទុក្ខលំបាកដែលកើតមានចំពោះក្រុមគ្រួសារកុមារារងគ្រោះរួចមកប្រជាពលរដ្ឋ សូមអំពាវនាវដល់សប្បុរសជនមេត្ដាជួយឧបត្ថម្ភដល់ក្រុមគ្រួសារសពក្មេងប្រុសរងគ្រោះនេះផង ៕
ពីគេហទំព័រ៖ នគរវត្ត
No comments:
Post a Comment
yes