ទិវាគ្រូបង្រៀនពិភពលោក គឺជាទិវាអន្ដរជាតិមួយត្រូវបានគេប្រារព្ធធ្វើឡើងជារៀងរាល់ឆ្នាំនៅថ្ងៃទី០៥ ខែតុលាដើម្បីជាពិធីប្រារព្ធតួនាទីគ្រូបង្រៀនក្នុងការផ្ដល់គុណភាពនៃការអប់រំនៅគ្រប់កម្រិត ។
ហើយវាជាការប្រារព្ធខួបនៃការចុះហត្ថលេខានៅក្នុងឆ្នាំ១៩៦៦ នៃអនុសាសន៍របស់អង្គការយូនីស្កូ(UNESCO) និងអង្គការពលកម្មអន្ដរជាតិ(ILO)ស្ដីពីកម្រិតស្ថានភាពគ្រូបង្រៀនក្នុងការផ្ដល់នូវគុណភាពនេះការអប់រំគ្រប់កម្រិត ។
ប្រធានសមាគមគ្រូបង្រៀនកម្ពុជាឯករាជ្យលោក រ៉ុង ឈុន មានប្រសាសន៍ថា រាជរដ្ឋាភិបាលត្រូវយកចិត្ដទុកដាក់អំពីតួនាទីដ៏សំខាន់ក្នុងការផ្ទេរចំណេះដឹងជូនដល់ប្អូនៗយុវជនជំនាន់ក្រោយ ។
លោក រ៉ុង ឈុន បន្ដឲ្យដឹងថា ថ្ងៃនេះគឺជាថ្ងៃប្រារព្ធខួបនៃការចុះហត្ថលេខារបស់អង្គការយូណេស្កូ(UNESCO) និង(ILO)ឆ្នាំ១៩៦៦ ស្ដីពីអនុសាសន៍នៃស្ថានភាពរបស់គ្រូបង្រៀន ហេតុនេះរាជរដ្ឋាភិបាលកម្ពុជាត្រូវមានវិធានការទទួលយកតាមអនុសាសន៍អង្គការយូណេស្កូ (UNESCO) បានបញ្ជាក់យ៉ាងច្បាស់ក្នុងការជួយលើកកម្ពស់គុណភាពនៃការអប់់រំ និងបង្កើនសមត្ថភាពធនធានប្រជាពលរដ្ឋកម្ពុជា ដើម្បីធានាក្នុងការអភិវឌ្ឍន៍សង្គម និងសេដ្ឋកិច្ចកម្ពុជាថ្វីបើគ្រូបង្រៀនកំពុងបានប្រឈមមុខទៅនិងបញ្ហាជាច្រើន ។
ក្នុងឱកាសនោះដែរលោក រ៉ុង ឈុន បានលើកសំណើរមួយចំនួនស្នើទៅថ្នាក់ដឹកនាំ និងស្ថាប័នរដ្ឋរួមមាន រដ្ឋសភា ព្រឹទ្ធសភា រាជរដ្ឋភិបាល និងស្ថាបនពាក់ព័ន្ធ ទាំងអស់មានដូចខាងក្រោមដំឡើងតម្លៃឯកតានៃសន្ទស្សន៍បៀវត្សន៍មូលដ្ឋានមន្ដ្រី រាជការស៊ីវិល(គ្រូបង្រៀន)ឲ្យបានចំនួន៣,៥០០រៀល ចាប់ពីដើមឆ្នាំ២០១២-២០១៥ ឲ្យ៦,៧០០រៀល ក្នុងមួយសន្ទស្សន៍-ផ្លាស់ប្ដូរទម្រង់ប្រាក់អត្ថប្រយោជន៍ផ្សេងៗរបស់គ្រូបង្រៀន
-លើកទឹកចិត្ដគ្រូបង្រៀនឲ្យមានការចូលរួមក្នុងគោលនយោបាយអប់រំ និងការគ្រប់គ្រង
-ទទួលស្គាល់សិទិ្ធសហជីពនិងសិទ្ធចរចាជាសមូហភាពរបស់គ្រូបង្រៀន
-ត្រូវលប់បំបាត់ភាពមិនប្រក្រតីនៅក្នុងវិស័យអប់រំ និងធ្វើឲ្យគុណភាពអប់រំប្រសើរឡើង ។
ទាក់ទងជាមួយបញ្ហាចំនួន៥ ដែលបានលើកឡើងខាងលើនេះសមាគម CITA នៅមានសំណើរជាច្រើនទៀត រៀបចំរួចជាស្រេចដើម្បីលើកយកមកធ្វើការពិភាក្សាជាមួយរដ្ឋាភិបាល និងក្រសួងអប់រំក្នុងការស្វែងរកដំណោះស្រាយដែលអាចធ្វើទៅបាន និងទទួលបានសារប្រយោជន៍ទាំងអស់គ្នា ។
សូមជម្រាបថា ទិវាប្រារព្ធគ្រូបង្រៀនពិភពលោកនៅព្រឹកថ្ងៃពុធ ទី៥ ខែតុលា ឆ្នាំ២០១១ នេះមានការចូលរួមពីអ្នកគ្រូ លោកគ្រូ ចំនួន១៨ខេត្ដក្រុង អង្គការក្រៅរដ្ឋាភិបាល និងបក្សប្រឆាំងចូលរួមស្ថានប័នពាក់ព័ន្ធផ្សេងៗទៀតសរុបប្រមាណជាង២០០នាក់នៅលើទីលានប្រជាធិបតេយ្យ ។ បន្ទាប់មកហែរក្បួនយកញាត្ដិទៅដាក់នៅក្រសួងអប់រំយុវជន និងកីឡា ហើយឆ្ពោះទៅកាន់ខុទ្ទការល័យសម្ដេចតេជោ ហ៊ុន សែន ដើម្បីដាក់ញាត្ដិជូន និងបន្ដទៅកាន់មន្ទីររដ្ឋសភា ៕
ពីគេហទំព័រ៖ វរជនខ្មែរ
No comments:
Post a Comment
yes