ជនជាប់ចោទ នៅសាលាដំបូងរាជធានី កាលពីម្សិលមិញ។
រូបថត ផា លីណា
កាលពីម្សិលមិញ សាលាដំបូងរាជធានី បានធ្វើការជំនុំជម្រះបុរស ៦ នាក់ ដែលត្រូវបានចោទប្រកាន់ពីបទបង្កើតចលនាកម្លាំងប្រដាប់អាវុធខុសច្បាប់ ឈ្មោះថា «ចលនាកងទ័ពសុវណ្ណភូមិ»។
លោក ឌុច គឹមសន ចៅក្រមជំនុំជម្រះ បានថ្លែងថា លោក ជា សារ៉ាន់ អាយុ ៤៩ ឆ្នាំ ជាអតីតសមាជិកក្នុងគណបក្ស សម រង្ស៊ី លោក លីវ សុកសុវណ្ណ អាយុ ៤៩ ឆ្នាំ ជាអតីតសមាជិកក្នុងគណបក្ស សម រង្ស៊ី លោក ជុំ វិជ័យ ហៅគ្រូ ជ័យ ជាកម្មករជីករ៉ែ លោក ផ្លត វី អាយុ ៦២ ឆ្នាំ ជាគ្រូថ្នាំបុរាណ លោក យ៉ម ហេវ អាយុ ៤១ ឆ្នាំ ជាកសិករ និងលោក ពោត ផន អាយុ ៤៦ ឆ្នាំ ជាកសិករ ត្រូវបានចោទប្រកាន់កាលពីថ្ងៃទី ៤ មេសា ២០១១ ពីបទបង្កើតចលនាកងកម្លាំងប្រដាប់អាវុធខុសច្បាប់។ លោកបានបន្ថែមថា ពួកគេត្រូវបានចាប់ខ្លួន ដោយកងរាជអាវុធហត្ថ កាលពីថ្ងៃទី ៣១ មីនា ២០១១ នៅភោជនីយដ្ឋានសេវិនប្រាយ ស្ថិតនៅក្នុងខណ្ឌទួលគោក ខណៈដែលពួកគេកំពុងជួបប្រជុំដើម្បីពិភាក្សាពីចលនាកងប្រដាប់អាវុធខុសច្បាប់ និងពីការជ្រើសរើសកងប្រដាប់អាវុធខុសច្បាប់ ដើម្បីចលនារបស់ខ្លួន។
លោកបានសង្កត់ធ្ងន់ថា លោកជា សារ៉ាន់ ជាប្រធាន និងជាអគ្គមេបញ្ជាការ នៃចលនាកងទ័ពសុវណ្ណភូមិ លោក លីវ សុកសុវណ្ណ ជាប្រធានអង្គភាពអង្គរក្សរបស់លោក ជា សារ៉ាន់ លោក ជុំ វិជ័យ ជាសេនាធិការ នៃចលនាកងទ័ពសុវណ្ណ ភូមិ និងលោក ផ្លត វី លោក យ៉ម ហេវ និងលោក ពោត ផន ជាសមាជិកសកម្មនៃចលនានេះ។ លោក ឌុច គឹមសន បានបញ្ជាក់ថា៖ «ការបង្កើតចលនាកងប្រដាប់អាវុធ ដោយគ្មានការអនុញ្ញាតពីរាជ-រដ្ឋាភិបាល ជាអំពើខុសច្បាប់ ហើយជាសកម្មភាព ដែលត្រូវបានហាមឃាត់ដាច់ខាត។ តុលាការមិនលើកលែងទោសឡើយ ប្រសិនបើរកឃើញថា ពួកគេមានពិរុទ្ធភាពនោះ»។
លោក មាស ច័ន្ធពិសិដ្ឋ ព្រះរាជអាជ្ញារង អមសាលាដំបូងរាជធានី ថ្លែងថា ផ្អែកតាមការស៊ើបអង្កេត និងរបាយការណ៍ ដែលតុលាការទទួលបាន ចលនាកងទ័ពសុវណ្ណភូមិ មានគោលបំណង ផ្តួលរំលំរាជរដ្ឋាភិបាលកម្ពុជា និងផ្លាស់ប្តូរថ្នាក់ដឹកនាំបច្ចុប្បន្ន។ លោកបានបន្តថា៖ «ផ្អែកតាមរបាយការណ៍ ចម្លើយ និងសកម្មភាព ពួកគេមានពិរុទ្ធភាព ព្រោះពួកគេពិតជាជាប់ពាក់ព័ន្ធ នឹងចូលរួមក្នុងចលនាកងទ័ពសុវណ្ណភូមិ ដែលខុសច្បាប់ប្រាកដមែន»។
លោក ជា សារ៉ាន់ លោក លីវ សុកសុវណ្ណ លោក ជុំ វិជ័យ និងលោក ផ្លត វី បានសារភាពអំពីការជាប់ពាក់ព័ន្ធនឹងការបង្កើតចលនាកងទ័ពសុវណ្ណភូមិ ប៉ុន្តែ លោក យ៉ម ហេវ និងលោក ពោត ផន បានបដិសេធថា ខ្លួនគាត់មិនជាប់ពាក់ព័ន្ធទេនៅក្នុងអំឡុងពេលជំនុំជម្រះ កាលពីម្សិលមិញ។
លោក ជា សារ៉ាន់ បានថ្លែងថា ចលនាកងទ័ពសុវណ្ណភូមិ ត្រូវបានបង្កើតឡើង ដោយក្រុមអតីតសមាជិកគណបក្ស សម រង្ស៊ី នៅដើមឆ្នាំ ២០០៦ ហើយគាត់ត្រូវបានជ្រើសរើសជាប្រធានចលនានេះ។ លោកបានប្រាប់តុលាការថា៖ «គោលបំណងនៃចលនាកងទ័ពសុវណ្ណភូមិ គឺនឹងត្រូវទទួលការឧបត្ថម្ភចំនួន ២០ លានដុល្លារអាមេរិកពីរដ្ឋាភិបាលតៃវ៉ាន់ និងស្វែងរកជំនួយពីប្រទេសដទៃទៀត។ វាមានគោលបំណងផ្តួលរំលំ និងផ្លាស់ប្តូរថ្នាក់ដឹកនាំបច្ចុប្បន្ន នៅក្នុងប្រទេសកម្ពុជា»។ លោកបានចង្អុលបង្ហាញថា ការផ្តួចផ្តើមចលនានេះ បានស្នើឡើងដោយលោក ថាប់ ថេ ដែលជាអតីតសមាជិកគណបក្ស សម រង្ស៊ី ប៉ុន្តែឥឡូវនេះបាត់ខ្លួនហើយ។ លោកបន្តថា លោក ថាប់ ថេ បានប្រាប់លោកថា រដ្ឋាភិបាលតៃវ៉ាន់ តាមរយៈស្ថានទូតរបស់ខ្លួននៅក្នុងប្រទេសថៃ បានសន្យាផ្តល់ប្រាក់ ២០ លានដុល្លារអាមេរិក ដើម្បីបង្កើតចលនាកងទ័ពនេះ ក្នុងប្រទេសកម្ពុជា។
ប៉ុន្តែលោក ពោត ផន ថ្លែងថា លោកមិនបានដឹងពីចលនាកងទ័ពសុវណ្ណភូមិនេះទេ ហើយលោក ក៏មិនមែនជាសមា-ជិកចលនានេះដែរ។ លោកបញ្ជាក់ថា៖ «ខ្ញុំជាកសិករធ្វើស្រែ ហើយជាជនរងគ្រោះពីការចាប់ខ្លួននេះ។ ដូច្នេះ ខ្ញុំសូមស្នើតុលាការ មេត្តាលើកចោលការចោទប្រកាន់ប្រឆាំងខ្ញុំ»។
លោក ពោត ផន បានបន្ថែមឲ្យដឹងថា លោកគ្រាន់តែជាប់ពាក់ព័ន្ធ នាំលោក ជុំ វិជ័យ ទៅរកអាវុធមិនប្រើប្រាស់ ដែលត្រូវបានគេកប់ នៅក្នុងភូមិស្រុកពួក ខេត្តបន្ទាយមានជ័យ កាលពីដើមខែមីនា ២០១១ តែប៉ុណ្ណោះ។
សាលក្រមកាត់ក្តីទៅលើបុរសជាប់ចោទទាំង ៦ នាក់នេះ នឹងត្រូវប្រកាស នៅថ្ងៃទី ២៧ តុលា នេះ។
លោក Yang Tianyue អ្នកនាំពាក្យស្ថានទូតចិន ប្រចាំនៅកម្ពុជា បានថ្លែងថា មកដល់ពេលនេះ លោកមិនបានដឹង ពីចលនាកងទ័ពសុវណ្ណភូមិនេះទេ ប៉ុន្តែលោកនឹងពិនិត្យមើលករណីនេះ៕ TK
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes