អង្គការសិទ្ធិមនុស្សដែលមានមូលដ្ឋានក្នុងញូវយ៉កមួយនេះបានកត់សម្គាល់ថា ចាប់តាំងពីឆ្នាំ២០០៩មក គឺនៅក្រោយពេលដែលប្រទេសឥណ្ឌូនេស៊ីបានបញ្ឈប់ការនាំពលកររបស់ខ្លួនទៅបម្រើការងារក្នុងប្រទេសម៉ាឡេស៊ីមក ភ្នាក់ងារនាំពលករទៅក្រៅប្រទេសបានងាកមកជួលពលករកម្ពុជាវិញ។ ពេលនោះហើយដែលការធ្វើចំណាកស្រុករបស់ស្ត្រី និងកុមារកម្ពុជាបានកើនឡើងគួរឲ្យកត់សម្គាល់។ បើយោងតាម Human Right Watch ស្ត្រីនិងកុមារកម្ពុជាជាច្រើនបានទទួលរងការរំលោភបំពានយ៉ាងធ្ងន់ធ្ងរពីសំណាក់ភ្នាក់ងារនាំពលករក្នុងស្រុក។ បន្ទាប់មក ពួកគេក៏បានទទួលរងការបំពាននៅឯកន្លែងធ្វើការនៅក្នុងប្រទេសម៉ាឡេស៊ី។ អង្គការដដែលបន្តថា មានឧបសគ្គជាច្រើនដែលរំខានដល់ការទទួលបានយុត្តិធម៌របស់ជនរងគ្រោះ។
គម្រោងផ្សព្វផ្សាយរបាយការណ៍នេះបានធ្វើឡើងបន្ទាប់ពីរដ្ឋាភិបាលកម្ពុជាបានសម្រេចផ្អាកនាំស្ត្រីកម្ពុជាទៅធ្វើការជាជំនួយការមេផ្ទះនៅប្រទេសម៉ាឡេស៊ីកាលពីដើមខែតុលានេះ។ លោក នាយករដ្ឋមន្ត្រី ហ៊ុន សែន បានចេញសារាចរមួយដោយហាមមិនឲ្យនាំពលករខ្មែរទៅកាន់ប្រទេសម៉ាឡេស៊ីទៀតឡើយ។ វិធានការនេះបានធ្វើឡើងបន្ទាប់ពីតំណាងរាស្ត្របក្សប្រឆាំង លោកស្រី មួរ សុខហួរ បានលើកបញ្ហាដោយផ្ទាល់ជាមួយលោក នាយករដ្ឋមន្ត្រី។ ការសម្រេចរបស់ប្រមុខរដ្ឋាភិបាលបានទទួលការស្វាគមន៍ជាទូទៅ។
យ៉ាងណាក៏ដោយ អង្គការ Human Right Watch បានកត់សម្គាល់ថា ការហាមប្រាមនេះគ្រាន់តែជាវិធានការការពាររយៈពេលខ្លីតែប៉ុណ្ណោះ តែអង្គការឃ្លាំមើលសិទ្ធិមនុស្សដដែលបានជំរុញឲ្យរដ្ឋាភិបាលកម្ពុជាកែទម្រង់ដើម្បីធានាឲ្យមានកិច្ចការពាររយៈពេលយូរដល់ស្ត្រី និងកុមារកម្ពុជាពីការរំលោភបំពាន។ ក្រោយពេលដែលរដ្ឋាភិបាលកម្ពុជាសម្រេចផ្អាកនាំពលករទៅកាន់ប្រទេសម៉ាឡេស៊ី មេដឹកនាំទីក្រុងកូឡាឡំពួរ បានអះអាងថា ខ្លួនត្រៀមសុំទោសរដ្ឋាភិបាលកម្ពុជាក្នុងករណីដែលរកឃើញថា មានការបំពានទៅលើស្ត្រីខ្មែរមែន។ យ៉ាងណាក៏ដោយ រហូតមកទល់ពេលនេះ នៅមិនទាន់មានព័ត៌មានស្តីពីការចរចាគ្នារវាងរដ្ឋាភិបាលទាំងពីរអំពីបញ្ហានេះនៅឡើយទេ៕
BY:RFI
No comments:
Post a Comment
yes