សង្ឃមួយអង្គនាមស៊ាន អ៊ុច មានព្រះជន្ម២៧ឆ្នាំ គង់នៅវត្តកោះគ្រឹស្នា ស្ថិតនៅឃុំឫស្សីស្រុកខាងលិច ស្រុកកំពង់ត្រាច បានធ្វើអត្តឃាតដោយលោតពីលើព្រះវិហារថ្មីកម្ពស់៨ម៉ែត្រកន្លះ ដោយគ្មានអ្នកណាម្នាក់បានដឹងឡើយ។
បើតាមការអះអាងរបស់នគរបាលស្រុកដែលទៅដល់កន្លែងកើតហេតុដំបូងថា សង្ឃអង្គនេះទំនងជាលោតសម្លាប់ខ្លួននៅចន្លោះម៉ោង៧យប់ទៅម៉ោង១០យប់ ថ្ងៃទី២៧ វិច្ឆិកា ។ តាមសំដីរបស់បុរសចំណាស់ឈ្មោះស៊ាន រេង អាយុ៥៥ឆ្នាំ ប្រាប់ឱ្យដឹងថា នៅវេលាម៉ោង៧ព្រឹក ថ្ងៃទី២៨ វិច្ឆិកា រូបគាត់បានយកចង្ហាន់ទៅប្រគេនព្រះអង្គឆាន់ ព្រោះលោកមកសឹងនៅក្នុងព្រះវិហារចាស់ ។ ពេលបើកទ្វារបន្ទប់ដែលសឹងជាប្រចាំរកមើលមិនឃើញ ក៏បានចេញមកក្រៅវិញ ហើយសួរសង្ឃឯទៀតក៏គ្មានអង្គណាបានឃើញ គាត់ក៏ដើរទៅមើលនៅលើព្រះវិហារថ្មីដែលកំពុងសាងសង់ ស្រាប់តែឃើញអនិច្ចធម្មដោយមានប្រឡាក់ឈាមនៅព្រះកេសទើបមានការឆោឡោ ហើយក៏មានការសង្ស័យជារឿងឃាតកម្មធ្វើគុតព្រះសង្ឃ ។
លោកឃួន សុវណ្ណ អធិការនគរបាលស្រុកមានប្រសាសន៍ថា ដំបូងឡើយយើងសង្ស័យថា សង្ឃនេះត្រូវបានគេធ្វើគុតទើបភ្លាមៗនោះកម្លាំងនគរបាលព្រហ្មទណ្ឌកម្រិតធ្ងន់ខេត្តចុះទៅពិនិត្យ និងនគរបាលការិយាល័យបច្ចេកទេសខេត្ត រួមទាំងមន្ត្រីប៉េអឹមស្រុកមកត្រួតពិនិត្យ។ លោកឃួន សុវណ្ណ អធិការនគរបាលស្រុកបាននិយាយថា នៅកន្លែងកើតហេតុគេឃើញមានស្បែកជើងរបស់សង្ឃអង្គនេះមួយគូ និងបារី១កញ្ចប់ និងលុយ២.៥០០រៀលសៀតទុកនៅក្រហែងឥដ្ឋជញ្ជាំងព្រះវិហារ។ លោកឃួន សុវណ្ណ និយាយថា ជំហានដំបូងយើងសង្ស័យថា រឿងឃាតកម្ម និងរឿងសង្ឃធ្វើអត្តឃាត តែក៏ត្រូវរង់ចាំចម្លើយពីនគរបាលដែលធ្វើកោសល្យវិច័យ។
លោកសុខ សាកាន ប្រធាននគរបាលការិយាល័យបច្ចេកទេសខេត្តបានប្រាប់ឱ្យដឹងថា សង្ឃមួយអង្គនេះគ្មាននរណាធ្វើគុតទេ គឺលោកឡើងតាមជណ្តើរជាងសំណង់ ហើយក៏លោតមកដីកំពស់៨ម៉ែត្រកន្លះ បែកព្រះកេសហូរឈាមតែម្តង។ លោកសុខ សាកាន បានប្រាប់បន្តថា សង្ឃអង្គនេះមានរបួសត្រង់ព្រះកេសធ្ងន់ និងគ្មានរបួសបាក់ដៃជើងទេ។
ញោមប្រុសសង្ឃអង្គនេះបាននិយាយប្រាប់នគរបាលថា លោកអាពាធជាញឹកញាប់ បន្ទាប់ពីវិលត្រឡប់មកពីប្រទេសថៃវិញ។ លោកមិនមានញោមស្រីទេ គឺស្លាប់តាំងតែនៅក្មេងមកម្លេ៉ះ។ បន្ទាប់ពីម្តាយស្លាប់ទៅរយៈពេលជាង១០ឆ្នាំមុនព្រះអង្គស៊ាន អ៊ុច ក៏បួសជាសង្ឃតាំងពីនៅព្រះជន្ម១៨ឆ្នាំ តែក្រោយមកក៏បានសឹក ហើយទៅស្រុកថៃ ស្រាប់តែវិលមកវិញសុំបួសជាសង្ឃម្តងទៀត។ ការបួសជាសង្ឃមិនសូវនិយាយ និងមិនដើរបិណ្ឌបាតទេ ។
បើតាមអបិយជំនឿគេនិយាយថា សង្ឃអង្គនេះខុសចាស់ទុំដូនតា និងមួយទៀតថា ខុសគ្រូ តែក៏មានអ្នកខ្លះនិយាយថា សង្ឃនេះទំនងជាតូចចិត្តពីរឿងអ្វីមួយ ឬក៏កើតជំងឺអ្វីទើបសម្រេចចិត្តសម្លាប់ខ្លួនបែបនេះ។
លោកគង់ សុខន ប្រធានការិយាល័យព្រហ្មទណ្ឌកម្រិតធ្ងន់ខេត្តប្រាប់ឱ្យដឹងថា ឆ្លងតាមការស្រាវជ្រាវរបស់នគរបាលគេអាចដឹងថា សង្ឃអង្គនេះមានជំងឺសរសៃប្រសាទក៏ថាបាន ឬថាកម្រោលចូលក៏ថាបានទើបលោតធ្វើអត្តឃាតបែបនេះ ៕
កោះសន្តិភាព
No comments:
Post a Comment
yes