ភាពអគតិរបស់និស្សិតដែលមានជំនាញផ្នែកអាយធី (IT) ម្នាក់ដែលទើបបញ្ចប់ឆ្នាំសិក្សាថ្មីៗបានប្រព្រឹត្តខុសពីសីលធម៌សង្គមប្រាសចាកប្រពៃណីយ៉ាងធ្ងន់ធ្ងរនិងធ្វើរឿងដែលមហាជននឹកស្មានមិនដល់ ព្រោះតែបានបង្ខំឱ្យនារីម្នាក់ដែលជាអតីតសង្សាររបស់ខ្លួនរួមរ័កនិងថតទាំងរូបទាំងវីដេអូ ហើយបានយករូបភាពទាំងនោះទៅបង្ហោះតាមប្រព័ន្ធអ៊ិនធើរណេត ដើម្បីរំសាយកំហឹងដ៏ថោកទាបរបស់ខ្លួន ខណៈនាងជាសង្សារបានយល់ព្រមទទួលការភ្ជាប់ពាក្យជាមួយប្រុសផ្សេង។ ទោះបីជាបែបណា ជននេះត្រូវបានសមត្ថកិច្ចឃាត់ខ្លួនកាលពីវេលាម៉ោង៩និង៣៥នាទីព្រឹកថ្ងៃទី២៥ ខែវិច្ឆិកា ក្នុងផ្ទះសំណាក់មួយនៅចុងឆ្នេរអូរឈើទាល ស្ថិតក្នុងភូមិ៦ សង្កាត់លេខ៤ ក្រុងព្រះសីហនុ ។
លោកវរសេនីយ៍ឯកអ៊ី សុខា នាយការិយាល័យប្រឆាំងការជួញដូរនិងការពារអនីតិជននៃស្នងការដ្ឋាននគរបាលខេត្តព្រះសីហនុ បានឱ្យដឹងថា ជនជាប់ចោទឈ្មោះងិន កុម្ភៈ អាយុ២៧ឆ្នាំ ជាបុគ្គលិកធ្វើការនៅរោងចក្រឯឃុំបិតត្រាំង ក្នុងភូមិពូធឿង ឃុំបិតត្រាំង ស្រុកព្រៃនប់ និងមានទីលំនៅភូមិ១ សង្កាត់លេខ១ ក្រុងព្រះសីហនុ ឯនារីរងគ្រោះជាអតីតសង្សាររបស់ខ្លួននោះ ត្រូវជាបងប្អូនជីដូនមួយអាយុ២៥ឆ្នាំ ។ លោកបន្តទៀតថា យោងតាមបណ្តឹងរបស់ម្តាយនារីរងគ្រោះកាលពីថ្ងៃទី២៤ វិច្ឆិកា បានប្តឹងចោទយុវជនម្នាក់នេះពីបទផ្សព្វផ្សាយរូបថតអាក្រាតកូនស្រីរបស់គាត់។ បន្ទាប់ពីទទួលពាក្យបណ្តឹងនេះ កម្លាំងរបស់លោក ក៏បានកោះហៅភាគីនារីរងគ្រោះមកសួរនាំលម្អិត ទើបដឹងថា នារីរងគ្រោះនិងយុវជនជាប់ចោទនោះមានទំនាក់ទំនងស្នេហានឹងគ្នាប្រហែល៥ខែមកហើយ តែក្រោយមកនារីរងគ្រោះបានសុំចែកផ្លូវ ព្រោះនាងបានព្រមព្រៀងភ្ជាប់ពាក្យជាមួយអ្នកផ្សេងរួចហើយ តែយុវជនជាអតីតសង្សារពុំយល់ ព្រម ។ នៅថ្ងៃទី១៧ ខែវិច្ឆិកា ឆ្នាំ២០១១ នាងត្រូវបានយុវជនសង្ស័យហៅមកយកខ្សែ.ក និងបានធ្វើការបង្ខំឱ្យនាងថតរូបអាក្រាតដោយបានគំរាមថា បើមិនព្រមថតគេមិនឱ្យខ្សែ.កទេហើយនៅពេលថតរូបរួចរាល់គេបានគំរាមបន្ថែមថា បើហ៊ានរៀបការគេនឹងយករូបនេះទៅបង្ហោះតាមប្រព័ន្ធអុីនធើរណេត ។ ដោយខ្លាចយុវជនសង្ស័យបង្ហោះនិងបាញ់រូបអាក្រាតរបស់ខ្លួនចែកអ្នកដទៃនារីរងគ្រោះក៏សុខចិត្តនៅស្ងៀមតែនៅប៉ុន្មានថ្ងៃក្រោយមករូបថតអាក្រាតរបស់ នាងក៏ត្រូវបានម្តាយនាងឃើញ ហើយក៏បានប្តឹងសមត្ថកិច្ចតែម្តង ។
លោកវរសេនីយ៍ឯកអ៊ី សុខា បញ្ជាក់បន្ថែមទៀតថា បន្ទាប់ពីសួរនាំយ៉ាងលម្អិតមក សមត្ថកិច្ចក៏បានឱ្យនារីរងគ្រោះទូរស័ព្ទណាត់យុវជនសង្ស័យឱ្យមកផ្ទះសំណាក់ទើបឈានដល់ការឃាត់ខ្លួនសួរនាំតាមបណ្តឹងរបស់ម្តាយនារីរងគ្រោះ។ ក្រោយការឃាត់ខ្លួនសមត្ថកិច្ចបានរកឃើញវត្ថុតាងរួមមានកាមេរ៉ាមួយគ្រឿង និងកុំព្យូទ័រឡែបថបមួយគ្រឿង។
យោងតាមចម្លើយរបស់យុវជនជាប់ចោទ ឈ្មោះងិន កុម្ភៈ បាននិយាយថា រូបគេគឺជាអតីតនិស្សិតអាយធី ហើយបានចេញទៅបម្រើការងារនៅរោងចក្រមួយក្នុងឃុំបិតត្រាំង ដោយសារផ្ទះនៅឆ្ងាយពីកន្លែងធ្វើការ រូបគេក៏បានទៅស្នាក់នៅផ្ទះឪពុកមាដែលត្រូវជាប្អូនឪពុករបស់ខ្លួន ហើយក៏លួចមានស្នេហាជាមួយប្អូនស្រីជីដូនមួយដោយពុំឱ្យឪពុកម្តាយដឹងរៀងៗខ្លួន។ នៅប៉ុន្មានខែក្រោយមក រូបគេក៏បានមកធ្វើការនៅក្រុងព្រះសីហនុ តែទំនាក់ទំនងស្នេហាមិនបានផ្តាច់នោះទេ គឺតែងតែណាត់ជួបគ្នាក្នុង១ខែពី២ទៅ៣ដង ។ មួយរយៈក្រោយមកទៀតក៏បានទទួលដំណឹងថា មិត្តស្រីរបស់ខ្លួនដែលត្រូវជាប្អូនជីដូនមួយបានភ្ជាប់ពាក្យជាមួយបុរសផ្សេង ធ្វើឱ្យខ្លួនមានកំហឹងយ៉ាងខ្លាំង និងបានបែកគំនិតយករឿងអាស្រូវនេះធ្វើការគំរាមតែម្តង ។ ដំបូងបានឱ្យមិត្តស្រីមកជួបនៅផ្ទះសំណាក់រស្មីច័ន្ទរះ មានទីតាំងស្ថិតក្នុងសង្កាត់លេខ៣ ក្រុងព្រះសីហនុ ក្រោមលេសឱ្យមកយកខ្សែ.កតម្លៃ៣៥០ដុល្លារ ធ្លាប់ជាកម្មសិទ្ធិរបស់នាងដែលខ្លួនខ្ចីនាពេលកន្លងមក ។ នៅពេលនាងមកយកខ្លួនក៏បានបញ្ជាឱ្យនាងដោះសម្លៀកបំពាក់ចេញនិងបានធ្វើសកម្មភាពតែម្តង ។ បន្ទាប់មកដោយភាពមិនអស់ចិត្តខ្លួនក៏បានផ្តិតរូបអាក្រាតពាក់កណ្តាលខ្លួនយកទៅប្លុងចោលនៅផ្ទះនារីរងគ្រោះហើយក៏ត្រូវម្តាយនាងប្តឹងសមត្ថកិច្ចតែម្តង ។
បច្ចុប្បន្នយុវជនជាប់ចោទត្រូវបានតុលាការចេញដីកាឃុំខ្លួនបណ្តោះអាសន្នរង់ចាំការកាត់ក្តីនៅពេលក្រោយ ដែលជននេះត្រូវបានចោទប្រកាន់ ២ករណី គឺករណីរំលោភសេពសន្ថវៈ និងផ្សព្វផ្សាយរូបភាពអាសអាភាស ៕
កោះសន្តិភាព
No comments:
Post a Comment
yes