ការតវ៉ារបស់ប្រជាពលរដ្ឋនៅខេត្តកោះកុងបានធ្វើឡើងតាំងពីម៉ោង ៦ព្រឹក រហូតដល់ម៉ោង ១០ និង ៥០ នាទី ថ្ងៃទី៦ធ្នូ ឆ្នាំ២០១១ នៅតែមិនទាន់ដំណោះស្រាយនៅឡើយ ទោះជាលោកអភិបាលរងខេត្តកោះកុង អ៊ុត ឆាលី ចុះមកដល់កន្លែងកើតហេតុ ដើម្បីអន្តរាគមន៍យ៉ាងក៏ដោយ។
ចរាចរណ៍លើផ្លូវជាតិលេខ ៤៨ ត្រូវកាត់ផ្តាច់ទាំងស្រុង ដោយមានរថយន្តជាង ១០០ គ្រឿង ត្រូវកកស្ទះ។
លោក អ៊ិន គង់ជិត អ្នកសម្របសម្រួលអង្គការលីកាដូ នៅខេត្តកោះកុង ដែលជាអ្នកឃ្លាំមើលហេតុការណ៍នេះ បានប្រាប់ថា លោកអភិបាលរងខេត្តកោះកុង អ៊ុត ឆាលី បានស្នើឲ្យតំណាងប្រជា ពលរដ្ឋចូលជួបគាត់ ដើម្បីដោះស្រាយរឿងទំនាស់ដីធ្លីជាមួយក្រុមហ៊ុនចិន Union Development Group Co.,LTD។
ក្រុមហ៊ុនចិននោះ បានអភិវឌ្ឍន៍ ជាតំបន់ទេសចរណ៍ និងទីក្រុងទំនើបខ្នាតអន្តរជាតិ លើផ្ទៃដីទំហំ ៣៦.០០០ ហិកតា នៅស្រុកបុទុមសាគរ និងគិរីសាគរ ក្នុងខេត្តកោះកុង។ ពួកគាត់ ជាអ្នករស់នៅតំបន់ឆ្នេរប្រកបរបរនេសាទ មានប្រាក់ ជាប្រចាំថ្ងៃ ឥឡូវគេឲ្យពួកគាត់ទៅរស់នៅតំបន់ ដែលឆ្ងាយពីឆ្នេរចំងាយ ២០ គីឡូម៉ែត្រ ដែលជាតំបន់ព្រៃមានជំងឺគ្រុនចាញ់ ហើយជាដី ដែលមិនអាចដាំដំណាំបាន ហើយខ្វះផ្លូវស្ពាន ដែលមិនទាន់អភិវឌ្ឍន៍។ ការអភិវឌ្ឍនោះ ជាបន្ទុករបស់ក្រុមហ៊ុន ក្នុងសាង សង់ផ្ទះឲ្យពួកគាត់ ដែលមកដល់ពេលនេះ បានសាងសង់ផ្ទះបានមួយចំនួនហើយ។
ប៉ុន្តែប្រជាពលរដ្ឋបាននិយាយថា ការដូរផ្ទះរបស់ពួកគាត់ មិនសមនឹងផ្ទះថ្ម ដែលកំពុងរស់នៅរាល់ ថ្ងៃ ដែលមានតម្លៃសាង់សង់ចាប់ពី ៧.០០០ ដុល្លារ ទៅដល់ ១០.០០០ ដុល្លារ ហើយក្រុមហ៊ុន បានដូរឲ្យពួកគាត់ ទៅរស់នៅលើផ្ទះឈើ មានតម្លៃត្រឹមតែ ៣.០០០ ដុល្លារ។ រីឯផលដំណាំរបស់ប្រជាពលរដ្ឋ ខាងក្រុមហ៊ុន មិនបានទូទាត់ឲ្យទេ។ ក្រុមហ៊ុន បានតម្រូវឲ្យប្រជាពលរដ្ឋទៅរស់នៅចំណុចកូនកុក ភូមិព្រៃស្មាច់ ឃុំកោះស្តេច។
ប្រជាពលរដ្ឋបានធ្វើការតវ៉ាឲ្យអាជ្ញាធរខេត្ត និងគណៈកម្មាធិការអន្តរក្រសួង រកដំណោះស្រាយឲ្យពួកគាត់។
ពាក់ព័ន្ធករណីទំនាស់ដីធ្លីនេះ ជាបន្ទុករបស់លោកបណ្ឌិត ម៉ុក ម៉ារ៉េត រដ្ឋមន្ត្រីក្រសួងបរិស្ថាន និងជាប្រធានគណៈកម្មាធិការអន្តរក្រសួង ដែលមានអនុក្រឹត្យមួយ តែងតាំងលោកបណ្ឌិត ជាប្រធានគណៈ កម្មាធិការអន្តរក្រសួង សម្រាប់ការដោះស្រាយវិវាទដីរវាងប្រជាពលរដ្ឋ ជាមួយក្រុមហ៊ុនចិន៕
CEN
No comments:
Post a Comment
yes