បាយចំនួន ២ បានចូលរួមប្រកួតប្រជែង គឺគណបក្សប្រជាជនកម្ពុជា និងគណបក្សសមរង្ស៊ី។ គណបក្សទាំងពីរនោះ បានដាក់បេក្ខជនឈរឈ្មោះបោះឆ្នោត នៅតាមមណ្ឌលភូមិភាគទាំង៨ រួច រាល់ហើយ។
គ.ជ.ប. បានលើកឡើងថា គណបក្សប្រជាជនកម្ពុជា មានបេក្ខជនឈរឈ្មោះបោះឆ្នោតសរុបទាំងពេញសិទ្ធិ និងបម្រុងមានចំនួន ១១៤ នាក់ ក្នុងនោះ មានស្ត្រី ១៩ នាក់។ រីឯគណបក្សសមរង្ស៊ី មានបេក្ខជនឈរឈ្មោះបោះឆ្នោត សរុបទាំងពេញសិទ្ធិ និងបម្រុង មានចំនួន ១១៤ នាក់ ក្នុងនោះ ស្ត្រី ១៥ នាក់។
ក្នុងសេចក្តីប្រកាសរបស់ គ.ជ.ប. ចុះថ្ងៃទី៥ធ្នូ ឆ្នាំ២០១១ បានបង្ហាញពីតារាង តាមមណ្ឌលភូមិភាគនិមួយៗ រួមមាន៖
-ភូមិភាគទី១៖ រាជធានីភ្នំពេញ មានចំនួន ៦ អាសនៈ
-ភូមិភាគទី២៖ ខេត្តកំពង់ចាម មាន ៨ អាសនៈ
-ភូមិភាគទី៣៖ ខេត្តកណ្តាល មាន ៥ អាសនៈ
-ភូមិទី៤៖ ខេត្តបាត់ដំបង បន្ទាយមានជ័យ ឧត្តរមានជ័យ សៀមរាប និងប៉ៃលិន មាន ១០ អាសនៈ
-ភូមិភាគទី៥៖ ខេត្តតាកែវ កំពត និងក្រុងកែប មាន ៧ អាសនៈ
-ភូមិភាគទី៦៖ ខេត្តព្រៃវែង និងស្វាយរៀង មាន ៧ អាសនៈ
-ភូមិភាគទី៧៖ ខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និងព្រះសីហនុ មាន ៨ អាសនៈ
-ភូមិភាគទី៨៖ ខេត្តកំពង់ធំ ព្រះវិហារ ក្រចេះ ស្ទឹងត្រែង មណ្ឌលគិរី និងរតនៈគិរី មាន៦ អាសនៈ
សម្រាប់ការជ្រើសតាំងសមាជិកព្រឹទ្ធសភា នីតិកាលទី៣ ដែលប្រព្រឹត្តិទៅនៅថ្ងៃទី២៩ ខែមករា ឆ្នាំ២០១២ ខាងមុខ ចំនួនអាសនៈនៃព្រឹទ្ធសភា ដែលត្រូវបោះឆ្នោតជ្រើសតាំង មានចំនួន ៥៧ ក្នុងចំណោមអាសនៈព្រឹទ្ធសភាសរុប ៦១។ ក្នុងនោះ ២ អាសនៈ ត្រូវតែងតាំងដោយរដ្ឋសភា និង ២ អាសនៈទៀត ត្រូវតែងតាំងដោយព្រះមហាក្សត្រ។
សូមរម្លឹកថា បញ្ជីផ្លូវការរបស់ គ.ជ.ប. និយាយពីបេក្ខជនឈរឈ្មោះបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ នាថ្ងៃទី២៩មករា ឆ្នាំ២០១២ របស់គណបក្សសមរង្ស៊ី ដែលមានពេញសិទ្ធិ ៥៧ រូប និងបេក្ខជនបម្រុង ៥៧ រូប គឺមានតំណាងរាស្ត្រក្នុងតំណែងចំនួន ៣ រូប និងតំណាងរាស្ត្រ ដែលលាលែងតំណែងចំនួន ៤ រូប។
តាមបញ្ជីផ្លូវការ នៅមណ្ឌលភូមិភាគ១ នៅរាជធានីភ្នំពេញ មានបេក្ខជនឈរឈ្មោះពេញសិទ្ធិ លេខរៀងទី១ របស់គណបក្សសមរង្ស៊ី គឺលោកស្រី កែ សុវណ្ណរតន៍ អគ្គលេខាធិការគណបក្សសមរង្ស៊ី ដែលទើបតែលាលែងពីតំណាងរាស្ត្រ កាលពីថ្ងៃទី២១វិច្ឆិកា ឆ្នាំ២០១១។ ចំណែកលំដាប់លេខរៀងទី២ គឺលោក ហូរ វ៉ាន់ អ្នកតំណាងរាស្ត្រ ក្នុងតំណែង របស់គណបក្សសមរង្ស៊ី ប្រចាំរាជធានីភ្នំពេញ។
ចំណែកនៅមណ្ឌលភូមិភាគ ២ នៅខេត្តកំពង់ចាម គឺលោកស្រី ថាក់ ឡានី ដែលទើបតែលាលែងពីតំណាងរាស្ត្រនៅរដ្ឋសភា ជាបេក្ខជនពេញសិទ្ធិ លំដាប់លេខរៀងទី១ របស់គណបក្សសមរង្ស៊ី។
រីឯមណ្ឌលភូមិភាគ ៣ នៅខេត្តកណ្តាល មានបេក្ខជនពេញសិទ្ធិរបស់គណបក្សសមរង្ស៊ី ឈរនៅលំដាប់លេខរៀងទី១ គឺលោក អេង ឆៃអ៊ាង អតីតអ្នកតំណាងរាស្ត្រខេត្តបាត់ដំបង ដែលបានលាលែង កាលពីខែមីនា ឆ្នាំ២០១១។
នៅមណ្ឌលភូមិភាគ ៤ រួមមាន ខេត្តបាត់ដំបង បន្ទាយមានជ័យ សៀមរាប ឧត្តរមានជ័យ និងខេត្តប៉ៃលិន មានបេក្ខជនពេញសិទ្ធិ នៅលំដាប់លេខរៀងទី១ គឺលោក យឹម សុវណ្ណ អ្នកតំណាងរាស្ត្រក្នុងតំណែង និងជាអ្នកនាំពាក្យគណបក្សសមរង្ស៊ី។
មណ្ឌលភូមិភាគ ៦ នៅខេត្តព្រៃវែង និងស្វាយរៀង គឺមានបេក្ខជនពេញសិទ្ធិ លោក គង់ គាំ ប្រធានស្តីទីគណបក្សសមរង្ស៊ី ឈរនៅលំដាប់លេខរៀងទី១។
មណ្ឌលភូមិភាគ ៧ ខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និងខេត្តព្រះសីហនុ មានបេក្ខជនពេញសិទ្ធិ លំដាប់លេខរៀងទី១ លោក នុត រំដួល ដែលទើបលាលែងពីសមាជិករដ្ឋសភា របស់គណបក្សសមរង្ស៊ី កាលពីថ្ងៃទី២១វិច្ឆិកា ឆ្នាំ២០១១។
ដោយឡែកនៅមណ្ឌលភូមិភាគ ៨ មាននៅខេត្តកំពង់ធំ ព្រះវិហារ ក្រចេះ ស្ទឹងត្រែង រតនគិរី និងមណ្ឌលគិរី គឺមានលោក ម៉ែន សុថាវរិន្ទ្រ អ្នកតំណាងរាស្ត្រ ក្នុងតំណែងរបស់គណបក្សសមរង្ស៊ី បានឈរឈ្មោះ នៅលំដាប់លេខរៀងទី១។
សម្រាប់គណបក្សប្រជាជនកម្ពុជា បេក្ខជនឈរឈ្មោះបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ នៅថ្ងៃទី២៩មករា ឆ្នាំ២០១២ គឺមិនមានអ្វីផ្លាស់ប្តូរច្រើនទេ។ សម្តេច ជា ស៊ីម ប្រធានគណបក្សប្រជាជនកម្ពុជា ជាបេក្ខជនពេញសិទ្ធិ សម្រាប់មណ្ឌលភូមិភាគ១ នៅភ្នំពេញ។
ចំណែកលោកឧកញ៉ា ឡាវ ម៉េងឃីន សមាជិកព្រឹទ្ធសភា នីតិកាលទី២ និងជាប្រធានក្រុមហ៊ុនស៊ូកាគូអ៊ិន ដែលអភិវឌ្ឍន៍តំបន់បឹងកក់ បានឈរឈ្មោះ នៅលំដាប់លេខរៀងទី៣ ក្នុងមណ្ឌលភូមិភាគ៣ នៅខេត្តកណ្តាល។
ដោយឡែកលោកឧកញ៉ា កុក អាន និងលោកឧកញ៉ា ម៉ុង ឫទ្ធី ដែលជាសមាជិកព្រឹទ្ធសភា នីតិ កាលទី២ របស់គណបក្សប្រជាជនកម្ពុជា និងជាប្រធានក្រុមហ៊ុនរកស៊ីឯកជន បានឈរឈ្មោះ នៅលំដាប់លេខរៀងទី៣ និងទី៥ ជាបេក្ខជនពេញសិទ្ធិ នៅមណ្ឌលភូមិភាគ៥ នៅខេត្តតាកែវ កំពត និងខេត្តកែប។
ជាមួយគ្នានោះ លោកឧកញ៉ា លី យ៉ុងផាត់ សមាជិកព្រឹទ្ធសភា នីតិកាលទី២ របស់គណបក្សប្រជាជនកម្ពុជា និងជាប្រធានក្រុមហ៊ុនឯកជនជាច្រើន ពិសេសក្រុមហ៊ុនស្ករស ដែលមានជម្លោះដីធ្លីជាមួយអ្នកភូមិអមលាំង នៅខេត្តកំពង់ស្ពឺ ក៏បានឈរឈ្មោះ នៅលំដាប់លេខរៀងទី៣ ជាបេក្ខជនពេញសិទ្ធិ របស់គណបក្សប្រជាជនកម្ពុជា នៅមណ្ឌលភូមិភាគ ៧ ក្នុងខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និងខេត្តព្រះសីហនុ៕
CEN
No comments:
Post a Comment
yes