មន្ត្រីនៃគណៈកម្មាធិការទន្លេមេគង្គជាតិកម្ពុជា នៅតែរក្សាជំហរមិនគាំទ្រទៅលើគម្រោងសាងសង់ទំនប់ទឹកសាយ៉ាបូរីដ៏ធំមួយកាត់ទន្លេមេគង្គ នៅក្នុងប្រទេសឡាវ ក្នុងបំណងផលិតថាមពលវារីអគ្គិសនី ដើម្បីលក់ទៅឱ្យប្រទេសថៃ។
លោក តែ ណាវុធ ជាអគ្គលេខាធិការនៃគណៈកម្មាធិការទន្លេមេគង្គជាតិកម្ពុជា។ លោកបានមានប្រសាសន៍ថា ប្រទេសកម្ពុជា ធ្លាប់បានបង្ហាញជំហរតាំងពីដំបូងរហូតមកដល់ពេលនេះ មិនគាំទ្រលើគម្រោងសាងសង់ទំនប់វារីអគ្គិសនីសាយ៉ាបូរី ប្រទេសឡាវនោះទេ។
មន្ត្រីដដែលបានមានប្រសាសន៍ទៀតថា ការជួបប្រជុំគ្នារវាងក្រុមរដ្ឋមន្ត្រីក្រសួងធនធានទឹក និងឧតុនិយមរបស់កម្ពុជា ជាមួយក្រុមរដ្ឋមន្ត្រីក្រសួងធនធានធម្មជាតិ និងបរិស្ថានមកពីប្រទេសចំនួន ៣ផ្សេងទៀត ដែលកំពុងធ្វើឡើងនៅទីក្រុងសៀមរាប នោះ គឺកំពុងមានការពិគ្រោះយោបល់គ្នាជាមុនយ៉ាងលម្អិតទៅលើបញ្ហាគម្រោងសាងសង់ទំនប់វារីអគ្គិសនីនោះ។
លោក តែ ណាវុធ៖ «កម្ពុជាមិនដែលគាំទ្រទេកន្លងមកនោះ។ យើងចង់បានព័ត៌មានបន្ថែមអំពីផលប៉ះពាល់នោះ។ បើសិនជាធ្វើវាប៉ះពាល់អ្វីខ្លះ អាហ្នឹងយើងត្រូវការឱ្យមានការសិក្សាបន្ថែមទៀត ស៊ីជម្រៅអ៊ីចឹងណា។ ក៏ប៉ុន្តែខ្ញុំមិនដឹងថា វាយ៉ាងម៉េចទេ»។
កាលពីពេលថ្មីៗប្រជាពលរដ្ឋដែលរស់នៅតាមខេត្តមួយចំនួនជាប់នឹងទន្លេមេគង្គ និងបឹងទន្លេសាប និងក្រុមយុវវ័យរួមជាមួយនិស្សិត និងអង្គការក្រៅរដ្ឋាភិបាលកម្ពុជា ជាច្រើនរយនាក់ក៏ធ្លាប់បានជួបប្រជុំគ្នាសំដែងអំពីការព្រួយបារម្ភទៅលើគម្រោងសាងសង់ទំនប់វារីអគ្គិសនីនៅប្រទេសឡាវ នោះដែរ។
ក្នុងកិច្ចជួបប្រជុំរបស់ក្រុមប្រទេសគណៈកម្មាធិការទន្លេមេគង្គនៅខេត្តព្រះសីហនុ កាលពីខែមេសា កន្លងទៅ គឺបានស្នើឱ្យគម្រោងសាងសង់ទំនប់វារីអគ្គិសនីនោះ ពន្យារពេលសាងសង់សិនដើម្បីធ្វើការសិក្សាលម្អិតទៅលើបញ្ហាប៉ះពាល់នានា។
លោក មៀច មាន ជាអ្នកសម្របសម្រួលរបស់អង្គការទន្លេ៣ នៅភាគឦសាននៃប្រទេសកម្ពុជា និងជាសមាជិកនៃអង្គការអភិរក្សទន្លេមេគង្គ។ លោកបានមានប្រសាសន៍ថា ប្រសិនបើគម្រោងនៃការកសាងទំនប់វារីអគ្គិសនីកាត់ទន្លេមេគង្គនៅសាយ៉ាបូរី ប្រទេសឡាវ អាចដំណើរការនោះ គឺមានផលប៉ះពាល់ជាច្រើនមកលើប្រទេសដែលរស់នៅប៉ែកខាងក្រោមនៃខ្សែទឹកដូចជាប្រទេសកម្ពុជា និងវៀតណាម។
លោក មៀច មាន៖ «របបទឹក និងលំហូរទឹកខាងក្រោមមានការផ្លាស់ប្ដូរវានឹងមានផលប៉ះពាល់មួយផ្នែកនៅផ្នែកខាងក្រោម ហើយមួយទៀតទាក់ទងទៅនឹងការបម្លាស់ទីរបស់ត្រី។ ត្រីភាគច្រើនវានៅផ្នែកខាងក្រោមវាមិនសូវឡើងទៅផ្នែកខាងលើច្រើនណាស់ណាទេ។ ប៉ុន្តែទោះយ៉ាងណាពពួកត្រីមួយចំនួនវាត្រូវមានការបម្លាស់ទីឡើងទៅលើ។ ការព្រួយបារម្ភមួយទៀត គឺកាលណាសាងសង់ទំនប់ហ្នឹង គឺការឈូសឆាយការរំលីង រលើងថ្ម រំលើងដីហ្នឹងវាច្រើនណាស់ វាធ្វើឱ្យសំណឹកដីហ្នឹងច្រើន ហូរចុះមកតំបន់ផ្នែកខាងក្រោម ក៏អាចធ្វើឱ្យរាក់អន្លង់ជ្រៅៗមួយចំនួនផងដែរ»។
ប្រទេសវៀតណាមធ្លាប់បានបង្ហាញការមិនសប្បាយចិត្តក្នុងការអនុម័តទៅលើគម្រោងនេះ ដោយបញ្ជាក់មូលហេតុថា វានឹងធ្វើឱ្យមានការប៉ះពាល់ដល់ទំនាក់ទំនងរវាងប្រទេសឡាវ និងវៀតណាម ដែលនៅតាមតំបន់ខ្លះជាប់ព្រំដែនជាមួយគ្នា។ ចំណែកប្រទេសថៃ ដែលនៅពីក្រោយគម្រោងនេះហាក់មិនបានបង្ហាញការចាប់អារម្មណ៍ចំពោះគម្រោងដែលនឹងហុចផលចំណេញទៅឱ្យខ្លួននោះទេ។
ទំនប់ទឹកវារីអគ្គិសនីសាយ៉ាបូរី មានគម្រោងនឹងផលិតថាមពលវារីអគ្គិសនីកម្លាំងប្រមាណ ១.២៦០មេហ្គាវ៉ាត់ ដែល ៩៥ភាគរយនៃថាមពលទាំងនោះនឹងលក់ទៅឱ្យប្រទេសថៃ៕
អាស៊ីសេរី
No comments:
Post a Comment
yes