អ្នកស្រី មូរ សុខហួរ តំណាងរាស្ត្រមកពីគណបក្ស សម រង្សី បានឲ្យដឹងថា នេះជាលើកទី១ ហើយ ដែលគណៈកម្មការសិទ្ធិមនុស្សនៃរដ្ឋាភិបាលប្រទេសម៉ាឡេស៊ី ទទួលយល់ព្រមថា នឹងបើកការស៊ើបអង្កេតជាផ្លូវការលើករណីដែលពលការិនីខ្មែរម្នាក់ឈ្មោះ ពៅ និច អាយុ ១៨ឆ្នាំ ស្លាប់កាលពីខែតុលា ឆ្នាំ២០១១ ក្នុងពេលបំពេញកិច្ចការងារជាអ្នកបម្រើការនៅតាមផ្ទះនៅក្នុងប្រទេសម៉ាឡេស៊ី។
បណ្ដាញសារព័ត៌មាន Free Malaysia Today ផ្សាយឲ្យដឹងបន្ថែមថា កាលពីថ្ងៃច័ន្ទ អ្នកស្រី មូរ សុខហួរ បានផ្ញើលិខិតជូនអាជ្ញាធរម៉ាឡេស៊ី សុំឲ្យមានការស៊ើបអង្កេតលើករណីនេះ។
នាង ពៅ និច បានទៅបម្រើការនៅប្រទេសម៉ាឡេស៊ី កាលពីថ្ងៃទី២៨ ខែសីហា ឆ្នាំ២០១១។ ម្ចាស់ក្រុមហ៊ុនដែលនាំនាងទៅបានអះអាងថា ពៅ និច ធ្លាក់ខ្លួនឈឺបន្ទាប់ពីលេបថ្នាំខុស បន្ទាប់មកក៏ស្លាប់នៅឯមន្ទីរពេទ្យ។
អ្នកស្រី មូរ សុខហួរ មានប្រសាសន៍ថា គណៈកម្មការសិទ្ធិមនុស្សម៉ាឡេស៊ី ផ្ដល់ចម្លើយឲ្យអ្នកស្រីប្រកបដោយការលើកទឹកចិត្ត។ អ្នកស្រីបញ្ជាក់ថា អ្នកស្រីនឹងបន្តដាក់សំណើដូចគ្នានេះ ដើម្បីឲ្យអាជ្ញាធរម៉ាឡេស៊ី បើកការស៊ើបអង្កេតរកយុត្តិធម៌ជូនពលការិនីខ្មែរ ៨នាក់ផ្សេងទៀត ដែលស្លាប់ក្នុងពេលបំពេញកិច្ចការងារជាអ្នកបម្រើការនៅតាមផ្ទះ នៅក្នុងប្រទេសម៉ាឡេស៊ីនោះដែរ៕
អាស៊ីសេរី
No comments:
Post a Comment
yes