ក្រុងបាងកកៈព្រះមហាក្សត្រថៃ ភូមីបុល អាឌុលយ៉ាដេត កាលពីថ្ងៃចន្ទបានអំពាវនាវដល់គ្រប់ភាគីទាំងអស់ឲ្យធ្វើការរួម គ្នាដើម្បីដោះស្រាយបញ្ហាទឹកជំនន់ និងចៀសវាងជម្លោះដើម្បីសុខុមាលភាពពលរដ្ឋថៃ និងសន្តិសុខជាតិខណៈព្រះអង្គបានយាងធ្វើសវនាការជាសាធារណៈធំមួយនៅឯសាលចក្រី មហាប្រាសាទក្នុងឱកាសបវរមហាប្រសើរមួយ ដែលប្រារព្ធខួបវដ្តទី៧របស់ព្រះអង្គ។
ព្រះចៅ ភូមីបុល បានបង្ហាញព្រះភក្រ្តនៅឯសាលនោះកាលពីព្រឹកថ្ងៃចន្ទ។ ម្ចាស់ក្សត្រិយ៍ស៊ីរីគីត ព្រះរាជបុត្រមហា វ៉ាជីរ៉ាឡុងកន ព្រះនាង ជូឡាផន និងសមាជិករាជវង្សានុវង្សជាច្រើនរូបទៀត ក៏បានចូលរួមពិធីនេះផងដែរ។
នៅតាមផ្លូវក្បួនដង្ហែទៅកាន់វាំងធំពីមន្ទីរពេទ្យសិរីរាជ្យ ដែលទ្រង់បាននិងកំពុងទទួលការព្យាបាលរោគតាំងពីឆ្នាំ២០០៩មក ពលរដ្ឋថៃរាប់សែននាក់ ដែលភាគច្រើនក្នុងឈុតអាវផ្កាឈូក ឈរតម្រៀបគ្នា ហើយស្រែកថា«សូមឲ្យព្រះអង្គមានព្រះជន្មយឺនយូរ»។ អ្នកជូនពរខ្លះ បានបោះជំរំនៅតាមផ្លូវពេញមួយយប់ដើម្បីធានាថា ពួកគេទទួលបានកន្លែងល្អ នៅពេលក្បួនរាជរថឆ្លងកាត់ពេលព្រឹក។
ព្រះចៅ ភូមីបុល បានយាងចូលព្រះជន្ម៨៤វស្សា កាលពីថ្ងៃម្សិលមិញ និងបានបង្ហាញព្រះភក្រ្តនៅលើយ៉នៃសាលចក្រី មហាប្រាសាទ នៅវេលាម៉ោងប្រមាណ១១ព្រឹកដើម្បីយាងធ្វើសវនាការដល់ក្រុម ប្រឹក្សារាជវាំង សមាជិកគណៈរដ្ឋមន្រ្តី មន្រ្តីរដ្ឋ ក្រុមអ្នកការទូតបរទេស សមាជិកសភា កម្លាំងប្រដាប់អាវុធទាំងបី ប៉ូលិស និងសាធារណជនទូទៅ។
ព្រះរាជបុត្រ មហា វ៉ាជីរ៉ាឡុងកន បានជូនពរសព្ទសាធុការថ្ងៃខួបកំណើតដល់ព្រះបិតា បន្ទាប់មកនាយករដ្ឋមន្រ្តី ប្រធានសភា និងប្រធានតុលាការកំពូល។
អគ្គមេបញ្ជាការកងទ័ព បានដឹកនាំឆ្មាំរាជវាំង៤៨០នាក់ ដើម្បីស្បថពីការស្មោះត្រង់ជាថ្មី នៅមុខព្រះភក្រ្តព្រះមហាក្សត្រ។
ព្រះមហាក្សត្រដែលគេគោរពដ៏ ជ្រាលជ្រៅបានមានព្រះបន្ទូលទៅសាធារណជនថា គ្រប់ភាគីគួរតែរួមគ្នាដោយពេញសមត្ថភាពដើម្បីសុខុមាលភាពពលរដ្ឋ ព្រោះវានឹងនាំឲ្យមានសន្តិសុខជាតិ។
ព្រះមហាក្សត្រអង្គនេះ បានសំដៅដល់ទឹកជំនន់ដែលមានបច្ចុប្បន្ននៅក្នុងប្រទេស ដែលអាក្រក់បំផុតក្នុងពេលជាច្រើនទសវត្សរ៍ មកនេះ ដោយថ្លែងថា អ្នកមានក្តីបារម្ភ គួរតែសហការគ្នាដើម្បីដោះស្រាយវិបត្តិនេះឲ្យបានឆាប់តាមតែអាច ធ្វើទៅបាន និងអនុវត្តការគ្រប់គ្រងធនធានទឹកប្រកបដោយនិរន្តរភាព។
ព្រះចៅ ភូមីបុល បានមានព្រះបន្ទូលបន្តថា មុននេះព្រះអង្គ បានណែនាំពីគម្រោងគ្រប់គ្រងទឹកខ្លះប៉ុន្តែវាត្រូវពឹងផ្អែកលើទី ភ្នាក់ដែលពាក់ព័ន្ធជាច្រើនដែលមានក្តីបារម្ភដើម្បីពិចារណាថា ត្រូវធ្វើអ្វីទៀត ខណៈព្រះអង្គគ្រាន់តែណែនាំធម្មតា មិនមែនបញ្ជាទេ។
ទ្រង់បានសង្កត់ធ្ងន់ថា បញ្ហាសំខាន់បំផុត មិនគួរមានជម្លោះ និងការបែកបាក់គ្នាទេ។ គ្រប់ៗគ្នា គួរតែលើកទឹកចិត្តគ្នាទៅវិញទៅមកដើម្បីឲ្យសម្រេចដល់គោលដៅ សុភមង្គលពលរដ្ឋ៕
ភ្នំពេញប៉ុស្តិ៏
No comments:
Post a Comment
yes