អ្នករាយការណ៍ពិសេសរបស់អង្គការសហប្រជាជាតិ ស្តីពីបញ្ហាសិទ្ធិមនុស្សនៅកម្ពុជាលោក ស៊ូរិយ៉ា ស៊ូបេឌី បានជួបពិភាក្សាជាមួយគណបក្សសិទ្ធិមនុស្សនៅព្រឹកថ្ងៃអង្គារទី៦ធ្នូនេះ។ លោក កឹម សុខា ប្រធានគណបក្សជំទាស់មួយនេះបានថ្លែងនៅក្រោយជំនួបដែលត្រូវបានធ្វើនៅការិយាល័យឧត្តមស្នងការអង្គការសិទ្ធិមនុស្សថា លោកបាននិយាយអំពីបញ្ហាការគោរពសិទ្ធិមនុស្ស និងបញ្ហាបោះ ឆ្នោតនៅកម្ពុជាជាមួយអ្នករាយការណ៍ពិសេស។
បញ្ហាដែលកើតឡើងចំពោះគណបក្សសិទ្ធិមនុស្សកន្លងដូចជាការរារាំងពីសំណាក់អាជ្ញាធរមិនអោយមានការលើកស្លាកគណបក្ស ការរារាំងមិនអោយប្រជាពលរដ្ឋចូលរួមក្នុងវេទិកាសាធារណៈដែលរៀបចំដោយគណបក្សសិទ្ធិមនុស្ស និងការប៉ុនប៉ងរារាំងសកម្មភាពរបស់គណបក្សសិទ្ធិមនុស្សនានាទៀតត្រូវបានលោក កឹម សុខា ប្រធានគណបក្សសិទ្ធិមនុស្សលើកឡើងប្រាប់លោក ស៊ូរិយ៉ា ស៊ូបេឌី អ្នករាយការណ៍ពិសេសរបស់អង្គការសហប្រជាជាតិស្តីពីបញ្ហាសិទ្ធិមនុស្សដែលកំពុងបំពេញទស្សនកិច្ច៧ថ្ងៃនៅកម្ពុជា។
លោកស៊ូបេឌីដែលទើបមកដល់កម្ពុជាកាលពីថ្ងៃចន្ទទី៥ធ្នូកំពុងបំពេញទស្សនកិច្ចលើកទី៦របស់លោកដោយផ្តោតទៅលើការបោះឆ្នោត។
មន្ត្រីកិច្ចការសាធារណៈរបស់ការិយាល័យសិទ្ធិមនុស្សអង្គការសហប្រជាជាតិប្រចាំនៅកម្ពុជាបានបដិសេធមិនប្រាប់អំពីកម្មវិធីទស្សនកិច្ចរបស់អ្នករាយការណ៍ពិសេសនៅកម្ពុជាឡើយ។ ប៉ុន្តែបើយោងតាមសេចក្តីប្រកាសព័ត៌មានរបស់លោក ស៊ូរិយា ស៊ូបេឌី មុនដំណើររបស់លោកមកកម្ពុជានោះ លោក ស៊ូបេឌី មានគម្រោងជួបជាមួយមន្ត្រីរដ្ឋាភិបាល អង្គការសង្គមស៊ីវិល គណៈកម្មាធិការរៀបចំការបោះឆ្នោតថ្នាក់ជាតិ និងថ្នាក់ខេត្ត និងក្រុមប្រឹក្សាធម្មនុញ្ញ។ លោក ស៊ូបេឌី ក៏មានគម្រោងជួបជាមួយអគ្គស្នងការនគរបាលជាតិផងដែរ។
គួរបញ្ជាក់ថាព័ត៌មានដែលអ្នករាយការណ៍ពិសេសប្រមូលបានពីដំណើរទស្សនកិច្ចនេះ លោកនឹងដាក់បញ្ចូលទៅក្នុងរបាយការណ៍សិទ្ធិមនុស្សរបស់លោក ដែលរបាយការណ៍នេះនឹងត្រូវដាក់ទៅក្រុមប្រឹក្សាសិទ្ធិមនុស្សនៅក្នុងខែកញ្ញាឆ្នាំ២០១២ខាងមុខ៕
RFI
No comments:
Post a Comment
yes