មានរឿងដ៏ចម្លែកទៀតហើយ ដោយសារមានមេជ្រូក១ក្បាលកើតកូនមួយសំបុកសុទ្ធតែពណ៌ខ្លាឃ្លោក ប៉ុន្តែមាន២ក្បាលខុសគេមួយមានមុខដូចសត្វស្វានិងមួយក្បាលទៀតមានមុខមាត់ស្រដៀងមនុស្សនិងមានច្រមុះរាងធំសំប៉ែតមើលទៅមិនខុសពីមនុស្សឡើយហើយកូនជ្រូកនេះក្រោយពីបានកើតមកនៅមានជីវិតដូចកូនជ្រូកដែលកើតមកជាមួយឯទៀតដែរ។
កូនជ្រូកចម្លែកកើតមកបង្កការភ្ញាក់ផ្អើលនេះបានកើតកាលពីល្ងាចថ្ងៃទី០៦ខែធ្នូឆ្នាំ២០១១វេលាម៉ោង១៦និង២០នាទីស្ថិតក្នុងភូមិចំការបី ឃុំពងទឹក ស្រុកដំណាក់ចង្អើរ ខេត្តកែប ដែលមានម្ចាស់ឈ្មោះ លឹម អេង ភេទប្រុស អាយុ៥៨ឆ្នាំ និងប្រពន្ធឈ្មោះ ហៀរ ស្រី អាយុ៤៤ឆ្នាំ។ ចំពោះកូនជ្រូក២ក្បាលដែលមានមុខមាត់ខុសគេនោះ គឺមួយក្បាលមានច្រមុះស្រួចហើយទម្រង់មុខដូចសត្វស្វាថែមទាំងមានចិញ្ចើមវែង ឯមួយក្បាលទៀតមានមាត់ធំបញ្ចេញធ្មេញសស្ញាចនិងមានច្រមុះរីកធំដូចច្រមុះមនុស្សបេះបិតទៀតផង។
ស្ត្រីជាម្ចាស់ជ្រូក ឈ្មោះ ហៀរ ស្រីបានបញ្ជាក់ប្រាប់ថា កូនជ្រូកដែលកើតមកចម្លែកប្លែកគេនេះ វាកូនជ្រូកមុខមាត់ដូចមនុស្សបានកើតមកបន្ទាប់ទី៩ ដោយខណៈនោះគាត់ជាម្ចាស់ជ្រូកត្រូវរង់ចាំមើលថែជាប់រហូតព្រោះក្នុងចំណោមនោះ កូនជ្រូកឯទៀតហាក់ដូចជាមិនចូលចិត្តកូនជ្រូកចម្លែកទាំង២ក្បាលនេះទេ គឺពួកវាតែងតែព្រួតគ្នាខាំកូនជ្រូក២ក្បាលនេះជាប់រហូត។ស្ត្រីម្ចាស់ជ្រូកបានឱ្យដឹងផងដែរថា មេជ្រូកដ៏ធំមួយក្បាលនេះវាបានកើតកូនចំនួន៣លើកមកហើយ ប៉ុន្តែការប្រសូត្ររាល់លើកពុំដែលមានមុខមាត់ចម្លែកបែបនេះទេហើយមេជ្រូកនេះវាកើតកូនមកពេលណាគឺកបតែរហូតមិនដែលមានងាប់កូន១ក្បាលឡើយ ថែមទាំងកើតបានកូនច្រើនៗទៀតផង។ម្ចាស់ជ្រូកបានប្រាប់ទៀតថា កាលពីប៉ុន្មានថ្ងៃមុនពេលមេជ្រូកនេះបង្កើតកូន រូបគាត់បានដេកយល់សប្តិឃើញមានមុស្ស២នាក់បានមកសួរគាត់ថាចង់កើតមកក្នុងគ្រួសារណាដែលមានមនុស្សច្រើនតើត្រូវធ្វើម្តេចទៅ ពេលនោះព្រលឹងគាត់បានឆ្លើយប្រាប់ថា បើចង់កើតមកមានបងប្អូនច្រើននាក់មានតែទៅកើតជាសត្វជ្រូកចុះ ពិតជាមានសាច់ញ្ញាតិច្រើនហើយ លុះរំលងបាន៤ថ្ងៃស្រាប់តែមេជ្រូកនេះកើតមកមានកូន២ក្បាលចម្លែកពីគេ ក្នុងចំណោមកូនជ្រូកចំនួន១១ក្បាលនោះតែម្តង។
នេះជារឿងចម្លែកៗដែលតែងតែកើតមានក្នុងសង្គមបច្ចុប្បន្នមិនថាតែខេត្តកែប ឬខេត្តកំពតនោះទេឯគ្រប់បណ្តាខេត្តទូទាំងប្រទេសក៏ធ្លាប់លេចឮនូវភាពដ៏ចម្លែកៗជាច្រើនទៀត ដែលជាបញ្ហាងឿងឆ្ងល់មួយធ្វើឱ្យមនុស្សគ្រប់មជ្ឈដ្ឋាននាំគ្នាចង់ដឹង ចង់ឃើញ និងមានចង្ងល់មិនចេះឈប់ឈរនោះ ហើយក៏អាចចាត់ទុកជាអភូតហេតុមួយកើតឡើង ពីធម្មជាតិផងដែរ៕
កម្ពុជាថ្មី
No comments:
Post a Comment
yes