អ្នកភូមិបឹងកក់បានធ្វើសន្និសីទកាសែតនៅលើវាលខ្សាច់ដ៏ធំល្វឹងល្វើយនៅព្រឹកថ្ងៃព្រហស្បតិ៍ ទី១ ខែធ្នូ ឆ្នាំ២០១១ នេះដើម្បីបង្ហាញពីការរឹតបន្ដឹងផ្លូវច្បាប់ដល់អ្នកទាមទារសិទ្ធិលំនៅដ្ឋានដោយយកប្រព័ន្ធតុលាការមកធ្វើការគាបសង្កត់បំបិទសិទ្ធិសេរីភាពប្រជាពលរដ្ឋ។
អ្នកស្រី ហ៊ូត វុទ្ធី បានឲ្យដឹងថា ពួកគាត់សុំទទូចឲ្យតុលាការរាជធានីភ្នំពេញត្រូវតែលើកលែងការចោទប្រកាន់តំណាងពលរដ្ឋ៤នាក់ឲ្យមានសិទ្ធិសេរីភាពឡើងវិញ ។
អ្នកស្រីបានចាត់ទុកការចោទប្រកាន់ប្រជាពលរដ្ឋឲ្យមានទោសព្រហ្មទណ្ឌនោះថា មិនអាចទទួលយកបាននោះទេដោយសារអ្វីដែលពួកគេបាននិយាយនោះគឺគ្រាន់តែសុំសិទ្ធិរស់នៅដោយសមស្របតាមអនុក្រិត្យ១៨៣ របស់លោក ហ៊ុន សែន ប្រមុខដឹកនាំរដ្ឋាភិបាលតែប៉ុណ្ណោះ។ហេតុនេះប្រជាជនដែលនៅសេសសល់ទាំងអស់ត្រូវមានសិទ្ធិរស់នៅលើទំហំដី១២,៤៤ហិកតា ដែលលោក ហ៊ុន សែន ផ្តល់ ហើយដីទំហំ១២,៤៤ហិកតានេះពិតជាកម្មសិទ្ធិស្របច្បាប់របស់ប្រជាពលរដ្ឋបឹងកក់ធ្វើការអភិវឌ្ឍន៍ដោយខ្លួនឯង ។
តំណាងពលរដ្ឋដែលបានជាប់ក្ដីបណ្ដឹងពីបទព្រហ្មទណ្ឌនោះគឺអ្នកស្រី ទេព វន្នី មានប្រសាសន៍ទាំងទឹកភ្នែកប្រាប់ក្រុមអ្នកសារព័ត៌មានជាតិអន្ដរជាតិថា តុលាការពិតជាមានភាពអយុត្ដិធម៌ណាស់ សម្រាប់ពលរដ្ឋស្លូតត្រង់ដែលជាម្ចាស់លំនៅដ្ឋាន។ អ្នកស្រី ទេព វន្នី បានចាត់ទុកថា គ្រាន់តែប្រជាពលរដ្ឋនាំគ្នាស្វែងរកសិទ្ធិស្របច្បាប់បែរជាត្រូវទទួលរងនៅការចោទប្រកាន់មួលបង្កាច់ចោទថា ជាជនល្មើសទៅវិញនៅគ្រាដែលមានពលរដ្ឋខ្លះត្រូវរងរបួស និងធ្វើអត្ដឃាតជាបន្ដបន្ទាប់ ។
សូមជម្រាបថា នៅក្នុងសារដែលពលរដ្ឋបឹងកក់បាននាំគ្នាអារដៃសម្រក់ឈាមចងភ្ជាប់ជាមួយប៉ែតប៉ោងហើយបង្ហោះ ឡើងទៅលើលំហអាកាសនោះបានសរសេរថា អយុត្ដិធម៌ណាស់សម្រាប់ជនរងគ្រោះ ដែលគ្រាន់តែនាំគ្នាការពារដីធ្លីរបស់ខ្លួនត្រូវទទួលទោស និងសារមួយទៀតបានសរសេរថា ខ្ញុំឈឺចាប់ណាស់ ! ។ ការអារកដៃសម្រក់ឈាមក្នុងថ្ងៃនេះជាលើកទី២ ហើយបន្ទាប់ពីប្រជាពលរដ្ឋម្នាក់បានអាករដៃ និងអ្នកខ្លះបានលេបថ្នាំ និងអ្នកខ្លះបានរត់ចូលឡានបន្ទាប់ពីមានការប៉ះទង្គិចគ្នាដោយអំហឹង្សាកាលពីថ្ងៃទី២៩ ខែវិច្ឆិកា ឆ្នាំ២០១១ នៅមុខសាលារាជធានីភ្នំពេញ៕
វិរជនខ្មែរ
No comments:
Post a Comment
yes