ភ្នំពេញ៖ គ.ជ.ប. បានប្រកាសថា ទីតាំងការិយាល័យបោះឆ្នោត និងរាប់សន្លឹកឆ្នោត មានចំនួន ៣៣ ការិយាល័យ ចំណុះឲ្យមណ្ឌលភូមិភាគទាំង៨ ទូទាំងប្រទេស សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ ឆ្នាំ២០១២ នៅថ្ងៃអាទិត្យ ទី២៩ ខែមករានេះ។
-ភូមិភាគទី១៖ រាជធានីភ្នំពេញ មានចំនួន ២ ការិយាល័យ ស្ថិតនៅវិទ្យាល័យបឹងត្របែក។
-ភូមិភាគទី២៖ ខេត្តកំពង់ចាម មានចំនួន ៣ ការិយាល័យ ស្ថិតនៅវិទ្យាល័យព្រះសីហនុ ( ក្រុងកំពង់ចាម )។
-ភូមិភាគទី៣៖ ខេត្តកណ្ដាល មានចំនួន ២ ការិយាល័យ ស្ថិតនៅមជ្ឈមណ្ឌលគរុកោសល្យភូមិភាគហ៊ុនសែន ( ក្រុងតាខ្មៅ )។
-ភូមិភាគទី៤៖ មានខេត្តបាត់ដំបង មានចំនួន ២ ការិយាល័យ ស្ថិតនៅវិទ្យាល័យសម្ដេចឪ ( ក្រុងបាត់ដំបង )។ ខេត្តបន្ទាយមានជ័យ មានចំនួន ១ ការិយាល័យ ស្ថិតនៅសាលាគរុកោសល្យខេត្ត ( ក្រុងសេរីសោភ័ណ )។ ខេត្តសៀមរាប មានចំនួន ២ ការិយាល័យ ស្ថិតនៅវិទ្យាល័យអង្គរ ( ខេត្តសៀមរាប )។ ខេត្តឧត្តរមានជ័យ មានចំនួន ១ ការិយាល័យ ស្ថិតនៅអនុវិទ្យាល័យសំរោង ( ក្រុងសំរោង )។ ខេត្តប៉ៃលិន មានចំនួន ១ ការិយាល័យ ស្ថិតនៅវិទ្យាល័យក្រុងទេពនិមិ្មត ហ៊ុន សែន ( ក្រុងប៉ៃលិន )។
-ភូមិភាគទី៥៖ មាននៅខេត្តតាកែវ ចំនួន ២ ការិយាល័យ ស្ថិតនៅវិទ្យាល័យ ជា ស៊ីម តាកែវ ( ក្រុងដូនកែវ )។ ខេត្តកំពត មានចំនួន ១ ការិយាល័យ ស្ថិតនៅអនុវិទ្យាល័យកំពតក្រុង ( ក្រុងកំពត )។ ខេត្តកែប មានចំនួន ១ ការិយាល័យ ស្ថិតនៅអនុវិទ្យាល័យសង្គមរាស្ដ្រនិយម ( ក្រុងកែប )។
-ភូមិភាគទី៦៖ មាននៅខេត្តព្រៃវែង ចំនួន ២ ការិយាល័យ ស្ថិតនៅសាលាបឋមសិក្សាព្រៃវែងក្រុង ( ក្រុងព្រៃវែង )។ ខេត្តស្វាយរៀង មានចំនួន ១ ការិយាល័យ ស្ថិតនៅសាលាបឋមសិក្សាព្រះសីហនុ (ក្រុងស្វាយរៀង)។
-ភូមិភាគទី៧៖ មាននៅខេត្តកំពង់ស្ពឺ ចំនួន ២ ការិយាល័យ នៅវិទ្យាល័យសុខាផល្លី ( ក្រុងច្បារមន )។ ខេត្តកំពង់ឆ្នាំង មានចំនួន ១ ការិយាល័យ ស្ថិតនៅសាលាគំរូបក្រុង ( ក្រុងកំពង់ឆ្នាំង )។ ខេត្តពោធិ៍សាត់ មានចំនួន ១ ការិយាល័យ ស្ថិតនៅមណ្ឌលធនធានសាលាបឋមសិក្សាពោធិ៍សាត់ ( ក្រុងពោធិ៍សាត់ )។ ខេត្តកោះកុង មានចំនួន ១ ការិយាល័យ ស្ថិតនៅមហោស្រពខេត្ត ( ក្រុងខេមរភូមិន្ទ )។ ខេត្តព្រះសីហនុ មានចំនួន ១ ការិយាល័យ ស្ថិតនៅសាលាបឋមសិក្សាផ្សារលើ (ក្រុងព្រះសីហនុ)។
-ភូមិភាគទី៨៖ មានខេត្តកំពង់ធំ ចំនួន ១ ការិយាល័យ ស្ថិតនៅសាលាបឋមសិក្សាកំពង់ធំក្រុង ( ក្រុងស្ទឹងសែន )។ ខេត្តព្រះវិហារ មានចំនួន ១ ការិយាល័យ ស្ថិតនៅវិទ្យាល័យជាស៊ីម ត្បែងមានជ័យ (ក្រុងព្រះវិហារ)។ ខេត្តក្រចេះ មានចំនួន ១ ការិយាល័យ ស្ថិតនៅវិទ្យាល័យព្រះកុសុមៈ (ក្រុងក្រចេះ)។ ខេត្តស្ទឹងត្រែង មានចំនួន ១ការិយាល័យ ស្ថិតនៅវិទ្យាល័យព្រះរាជបូជនីយកិច្ច (ក្រុងស្ទឹងត្រែង)។ ខេត្តរតនគិរី មានចំនួន ១ការិយាល័យ ស្ថិតនៅវិទ្យាល័យសម្ដេចឪសម្ដេចម៉ែ (ក្រុងបានលុង) និងខេត្តមណ្ឌលគិរី មានចំនួន ១ការិយាល័យ ស្ថិតនៅសាលាមត្តេយ្យសិក្សាសង្គមរាស្ដ្រនិយម (ក្រុងសែនមនោរម្យ)។
សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ ដែលប្រព្រឹត្តិទៅនៅថ្ងៃទី២៩ ខែមករា ឆ្នាំ២០១២ គ.ជ.ប. បានប្រកាសពីចំនួនអាសនៈនៃព្រឹទ្ធសភា ដែលត្រូវបោះឆ្នោតជ្រើសតាំង មានចំនួន ៥៧ ក្នុងចំណោមអាសនៈព្រឹទ្ធសភាសរុប ៦១។ ក្នុងនោះ ២ អាសនៈ ត្រូវតែងតាំងដោយរដ្ឋសភា និង ២ អាសនៈទៀត ត្រូវតែងតាំងដោយព្រះមហាក្សត្រ។
ការបោះឆ្នោតព្រឹទ្ធសភា ធ្វើឡើង ជាលក្ខណៈអសកល គឺមានតែសមាជិក្រុមប្រឹក្សាឃុំសង្កាត់ និងសមាជិករដ្ឋសភា នៅក្នុងតំណែងប៉ុណ្ណោះ ដែលជាអ្នកបោះឆ្នោត។
គ.ជ.ប. បានកំណត់ថា សម្រាប់ការបោះឆ្នោតព្រឹទ្ធសភា នាថ្ងៃអាទិត្យនេះ មាន អ្នកបោះឆ្នោតសរុប ១១.៤៧០ នាក់ ។ ក្នុងនោះ មានសមាជិកក្រុមប្រឹក្សាឃុំសង្កាត់ ចំនួន ១១.៣៥១ នាក់ ក្នុងចំណោមសមាជិកក្រុមប្រឹក្សាឃុំសង្កាត់សរុប ១១.៣៥៣ នាក់។ ចំណែកសមាជិករដ្ឋសភា ឬអ្នកតំណាងរាស្ត្រ មានចំនួន ១១៩ រូប ក្នុងចំណោមសមាជិករដ្ឋសភាសរុប ១២៣ រូប។
ការមិនស្រង់ឈ្មោះសមាជិកក្រុមប្រឹក្សាឃុំសង្កាត់ ២ រូប និងសមាជិករដ្ឋសភា ៤ រូប របស់គណបក្សសមរង្ស៊ី ចូលក្នុងបញ្ជីបោះឆ្នោតព្រឹទ្ធសភា ត្រូវបាន គ.ជ.ប. ពន្យល់ថា ដោយសារតែសមាជិកក្រុមប្រឹក្សាឃុំសង្កាត់ និងសមាជិករដ្ឋសភាទាំងនោះ បានបាត់បង់តំណែង បានសុំលាលែង និងអស់សមាជិកភាពជាអ្នកតំណាងរាស្ត្រ។
លោក ទេព នីថា អគ្គលេខាធិការ គ.ជ.ប. ក៏បានប្រកាសថា ក្នុងចំណោមអ្នកបោះឆ្នោតព្រឹទ្ធសភា ១១.៤៧០ រូប គឺមានសមាជិកក្រុមប្រឹក្សាឃុំសង្កាត់ ២ រូប និងតំណាងរាស្ត្រម្នាក់ បានទទួលមរណៈភាព ដែលមិនមានអ្នកបោះឆ្នោតថ្មី មកជំនួសទេ៕
No comments:
Post a Comment
yes