ភ្នំពេញ៖ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ បានចាប់ផ្តើមហើយ កាលពីម៉ោង ៧ ព្រឹក ថ្ងៃអាទិត្យ ទី២៩ ខែមករា ឆ្នាំ២០១២ខណ:ដែលគណបក្សប្រជាជន និងគណបក្សសមរង្ស៊ី ត្រូវប្រកួតប្រជែងគ្នា យក ៥៧ អាសនៈ ក្នុងចំណោម ៦១ អាសនៈ នៅក្នុងព្រឹទ្ធសភា។
តាមច្បាប់ នៅព្រឹទ្ធសភា អាសនៈចំនួនបួនផ្សេងទៀត គឺអាសនៈចំនួន ២ នឹងត្រូវបោះឆ្នោតជ្រើសតាំងដោយរដ្ឋសភា ខណៈដែល ២ អាសនៈទៀត នឹងត្រូវតែងតាំង ដោយព្រះមហាក្សត្រ។
លោក ហ៊ុន សែន អនុប្រធានគណបក្សប្រជាជនកម្ពុជា និងជាអ្នកតំណាងរាស្ត្រមណ្ឌលខេត្តកណ្តាល នឹងអញ្ជើញទៅបោះឆ្នោតព្រឹទ្ធសភា នៅក្នុងភូមិភាគទី៣ ក្នុងខេត្តកណ្ដាល ស្ថិតនៅមជ្ឈមណ្ឌលគរុកោសល្យភូមិភាគហ៊ុនសែន ( ក្រុងតាខ្មៅ )។
លោក ហ៊ុនសែន បានអញ្ជើញទៅបោះឆ្នោត ក្នុងការិយាល័យ ៣០០១ អមដោយសមាជិករដ្ឋសភា និងសមាជិកក្រុមប្រឹក្សាឃុំសង្កាត់គណបក្សប្រជាជនកម្ពុជា នៅខេត្តកណ្តាល នៅពេលបើកការិយាល័យដំបូង នាម៉ោង ៧ ព្រឹកនេះ។
ចំណែកលោក ហេង សំរិន ប្រធានរដ្ឋសភា ជាប្រធានកិត្តិយសគណបក្សប្រជាជនកម្ពុជា និងជាអ្នកតំណាងរាស្ត្រមណ្ឌលខេត្តកំពង់ចាម នឹងត្រូវធ្វើដំណើរទៅកាន់ការិយាល័យបោះឆ្នោត នៅទីរួមខេត្តកំពង់ចាម ក្នុងភូមិភាគីទី២ ខេត្តកំពង់ចាម ស្ថិតនៅវិទ្យាល័យព្រះសីហនុ។
ជាមួយគ្នានោះ លោក កឹម សុខា ប្រធានគណបក្សសិទ្ធិមនុស្ស និងជាអ្នកតំណាងរាស្ត្រ មណ្ឌលកំពង់ចាម ក៏នឹងត្រូវធ្វើដំណើរ ទៅបោះឆ្នោតព្រឹទ្ធសភា នៅការិយាល័យបោះឆ្នោត នៅទីរួមខេត្តកំពង់ចាម ក្នុងភូមិភាគីទី២ ខេត្តកំពង់ចាម ស្ថិតនៅវិទ្យាល័យព្រះសីហនុ។
ដោយឡែកលោក ញឹក ប៊ុនឆៃ នាយកប្រតិបត្តិ ( ប្រធាន ) គណបក្សហ្វ៊ុនស៊ិនប៉ិច និងជាអ្នកតំណាងរាស្ត្រមណ្ឌលខេត្តបន្ទាយមានជ័យ នឹងត្រូវទៅបោះឆ្នោត នៅភូមិភាគទី៤ នៅការិយាល័យបោះឆ្នោត ស្ថិតនៅសាលាគរុកោសល្យខេត្ត ( ក្រុងសេរីសោភ័ណ )។
ចំពោះលោក សម រង្ស៊ី ប្រធានគណបក្ស សម រង្ស៊ី និងជាសមាជិករដ្ឋសភាជាប់ឆ្នោតនៅខេត្តកំពង់ចាម កំពុងនិរទេសខ្លួននៅក្រៅប្រទេស មិនមានសិទ្ធិបោះឆ្នោតទេ ដោយសារតែលោក សម រង្ស៊ី ត្រូវរដ្ឋសភាដ៏អយុត្តិធម៌បានលុបឈ្មោះលោកចេញ ព្រោះតែជាប់ពាក់ព័ន្ធក្នុងរឿងព្រំដែនកម្ពុជា-យួនដែលលោកបានចេញមុខការពារបូរណៈភាពទឹកដីខ្មែរ និងដីស្រែរបស់ប្រជាកសិករ ។
រីឯសម្តេចក្រុមព្រះ នរោត្តម រណឫទ្ធិ ប្រធានគណបក្សនរោត្តម រណឫទ្ធិ មិនមានសិទ្ធិទៅបោះឆ្នោតទេ ព្រោះព្រះអង្គបានជាប់ឆ្នោត កាលពីបោះឆ្នោតជ្រើសតាំងសមាជិករដ្ឋសភា កាលពីឆ្នាំ២០០៨ ប៉ុន្តែព្រះអង្គបានលាលែង ដោយដាក់ជំនួសដោយលោក យូ ហុកគ្រី។
លទ្ធផលបណ្តោះអាសន្ន នៃការបោះឆ្នោតព្រឹទ្ធសភា នៅថ្ងៃអាទិត្យនេះ នឹងត្រូវប្រកាសដោយ គ.ជ.បនៅម៉ោង ៤ និង ៣០ នាទីរសៀល ។
តាមការគុណគូរ គឺសម្រាប់ការបោះឆ្នោតព្រឹទ្ធសភា នៅថ្ងៃអាទិត្យនេះ គណបក្សសមរង្ស៊ី នឹងទទួលបាន ១១ អាសនៈ ក្នុងចំណោមអាសនៈ ៥៧។
គ.ជ.ប. បានប្រកាសថា សម្រាប់ការបោះឆ្នោតព្រឹទ្ធសភា នាថ្ងៃអាទិត្យនេះ មានតែអ្នកបោះឆ្នោតសរុប ១១.៤៧០ នាក់ប៉ុណ្ណោះ។ ក្នុងនោះ មានសមាជិកក្រុមប្រឹក្សាឃុំសង្កាត់ មានចំនួន ១១.៣៥១ នាក់ ក្នុងចំណោមសមាជិកក្រុមប្រឹក្សាឃុំសង្កាត់សរុប ១១.៣៥៣ នាក់។ ចំណែកសមាជិករដ្ឋសភា ឬអ្នកតំណាងរាស្ត្រ មានចំនួន ១១៩ រូប ក្នុងចំណោមសមាជិករដ្ឋសភាសរុប ១២៣ រូប។
សូមរំលឹកថា កាលពីនីតិកាលទី២ គណបក្សប្រជាជនកម្ពុជា បានកាន់កាប់អាសន:ចំនួន ៤៥ គណបក្សហ្វ៊ុនស៊ិនប៉ិច ១២ គណបក្សសមរង្ស៊ី ២ ព្រមទាំងព្រះមហាក្សត្រ តែងតាំងចំនួន២ អាសនៈ ក្នុងចំណោមអាសនៈព្រឹទ្ធសភាសរុប ៦១៕
No comments:
Post a Comment
yes