លោក អៀង សារី និងក្រុមស្មាក្តីក្នុងបន្ទប់សវនាការ។ រូបថត អ.វ.ត.ក
ភ្នំពេញៈក្នុងរយៈពេល ៣ ម៉ោង កាលពីម្សិលមិញ នៅសាលាក្តីខ្មែរក្រហម លោក Michael Kar navas មេធាវីការពារលោក អៀង សារី វិភាគយ៉ាងលម្អិតនូវចម្លើយកសិណរយៈពេលជិត ៣ ថ្ងៃរបស់លោក សាឡុត បាន ធ្វើឲ្យក្មួយប្រុសប៉ុលពត រូបនេះទទួលស្គាល់ថា លោកឆ្លើយតាមការប៉ាន់ស្មានរបស់ខ្លួន ជាហេតុប៉ះពាល់យ៉ាងខ្លាំងលើភាពរឹងមាំនៃចម្លើយកសិណរបស់គាត់។
នៅដើមសប្តាហ៍នេះ លោក សាឡុត បាន អតីតអគ្គលេខាធិការនៃក្រសួងការបរទេសបានឆ្លើយថា លោក អៀង សារី ឧបនាយករដ្ឋមន្រ្តីក្រសួងការបរទេស ជាចៅហ្វាយពិតប្រាកដ ហើយទទួលខុសត្រូវទាំងស្រុង ប៉ុន្តែពីម្សិលមិញ លោក Karnavas បានព្យាយាមបញ្ជាក់ថា ការអះអាងនេះថា មិនមែនជាការពិតទេ ដោយផ្តោតលើតួនាទីដែលលោក ឈឹម សំអ៊ុក ហៅ ពាំង មានក្នុងរបបខ្មែរក្រហម។
លោក ពាំង ជាប្រធានការិយាល័យរដ្ឋាភិបាល ស‑៧១ ដែលជាការិយាល័យមួយក្នុងចំណោមការិយាល័យថ្នាក់ខ្ពស់បំផុត ក្នុងរបបខ្មែរក្រហម។
ចម្លើយលោក សាឡុត បាន តប ទៅនឹងសំណួររបស់លោក Karnavas គឺថា មេដឹកនាំដែលមានឥទិ្ធពលគ្រប់ក្រសួងទាំងអស់ពុំដែលរាយការណ៍ពីនរណាម្នាក់ដែល«អាចយកជីវិតគេ» បានតាមចិត្តទេ។ លោក សាឡុត បាន បានថ្លែងថា បុគ្គលិកក្រសួងការបរទេសជាច្រើននាក់ ត្រូវបានដកចេញដោយលោក ពាំង ឬមនុស្សរបស់គាត់ ហើយយកទៅមន្ទីរកែប្រែ ឬមន្ទីរ ស‑២១ ។
លោក បាន បានឲ្យដឹងថា៖ «លោក អៀង សារី ប្រាប់ខ្ញុំថា នៅពេលលោក ពាំង មកដល់ ខ្ញុំត្រូវតែធ្វើអ្វីដែល ពាំងចង់បាន»។
លោក Karnavas បានសួរថា៖«តើ ពាំង ធ្លាប់ប្រាប់អ្នកថា គាត់ស្នើឲ្យផ្ទេរមនុស្សទាំងនេះចេញពីក្រសួងការបរទេស តាមបញ្ជារបស់អ្នកណាដែរឬទេ?»។
លោក សាឡុត បាន ឆ្លើយថា៖ «ទេគាត់មិនបានប្រាប់ខ្ញុំទេ ខ្ញុំក៏មិនបានសួរគាត់ដែរ»។
តាមរយៈការសួរជាបន្តបន្ទាប់ លោក Karnavas ក៏បានបង្ហាញផងដែរថា លោក សាឡុត ដែលបានដឹងតិចតួចអំពីដំណើរការផ្ទៃក្នុងនៃរបបខ្មែរក្រហម និងដំណើរការធ្វើសេចក្តីសម្រេចនៃរបបនេះ ហើយបានថ្លែងពីបញ្ហានេះ ផ្អែកលើការសន្និដ្ឋានផ្ទាល់ខ្លួន។ នៅដើមសប្តាហ៍នេះ សាឡុត បាន ថ្លែងថា ប៉ុល ពត មិនដែលធ្វើសេចក្តីសម្រេចម្នាក់ឯងឡើយ។
លោក Karnavas នឹងបន្តសួរលោក សាឡុត បាន ទៀត នៅថ្ងៃចន្ទសប្តាហ៍ក្រោយ៕
ភ្នំពេញប៉ុស្តិ៏
No comments:
Post a Comment
yes