ភ្នំពេញ៖ ក្រុមប្រជាជនប្រមាណ៣០០នាក់នាំគ្នាមកសាលាខេត្តបាត់ដំបងដើម្បីទាមទារដំណោះស្រាយរឿងដីធ្លីនៅល្ងាចថ្ងៃព្រហស្បតិ៍នេះ។ តំណាងប្រជាពលរដ្ឋចំនួន៥នាក់ត្រូវបានអញ្ជើញអោយចូលជួបថ្នាក់ដឹកនាំខេត្តដើម្បីដោះស្រាយរឿងទំនាស់ដីធ្លីជាមួយលោក ឧកញ៉ាម្នាក់។
ប្រជាពលរដ្ឋប្រមាណ ៣០០នាក់ មកពីឃុំល្វា ស្រុកបាវេល ខេត្តបាត់ដំបង និង ឃុំតាគង់ ស្រុកម៉ាឡៃ ខេត្តបន្ទាយមានជ័យបានមកជួបជុំគ្នានៅវេលាម៉ោង១រសៀលថ្ងៃ ទី២៦ ខែមេសា ឆ្នាំ២០១២ នេះនៅក្បែរសាលាខេត្តបាត់ដំបងដើម្បីប្រឆាំងនឹងសេចក្តីសម្រេចរបស់តុលាការខេត្ត។ បើយោងតាមសេចក្តីជូនដំណឹងរបស់មជ្ឈមណ្ឌលសិទ្ធិមនុស្សកម្ពុជា លោក សាអឿន កោសល្យមុនី ចៅក្រមសាលាដំបូង ខេត្តបាត់ដំបង កាលពីថ្ងៃទី២៤ ខែមេសា ឆ្នាំ២០១២ បានសម្រេចរក្សាទុកដីកាសម្រេចរក្សាការពារចុះថ្ងៃទី២៩ ខែកុម្ភៈ ឆ្នាំ២០១២ ដោយសម្រេចប្រគល់សិទ្ធិទៅអោយឧកញ៉ាម្នាក់ឈ្មោះ សង ថន និង មនុស្សពីរនាក់ទៀតគឺ ឈ្មោះ ទន់ ប៊ុនធឿន និងឈ្មោះ ឃុន តែស៊ី អាចអាស្រ័យផលលើដីទំហំ ៦៣៨ ហិកតា។ ប៉ុន្តែ ប្រជាជនដែលមកតវ៉ានៅថ្ងៃនេះបាននិយាយថា ពួកគេចំនួនប្រមាណជាជាង ៣០០ គ្រួសារនៅ ចំណុចបឹងពីរ ភូមិក្រពើ សែសិប ឃុំល្វា ស្រុកបាវេល ខេត្តបាត់ដំបង និងភូមិប្រាសាទរ៉ាង ភូមិខ្ជាយ ឃុំតាគង់ ស្រុក ម៉ាឡៃ ខេត្តបន្ទាយមានជ័យកំពុងអាស្រ័យផល ធ្វើស្រែ-ចំការ នៅ លើដីនោះ ។
សូមបញ្ជាក់ថា ដីដែលកំពុងមានទំនាស់នោះត្រូវបានអាជ្ញាធរខត្តបាត់ដំបងនិងខេត្តបន្ទាយមានជ័យ ចេញដីកាដកហូតពីឧកញ៉ា សង ថន មករក្សាទុកជាសម្បត្តិរដ្ឋវិញកាលពីឆ្នាំ ២០០៦ ។ បើយោងតាមប្រជាជន នេះជាការចំឡែក ដែលចៅក្រមសាលាដំបូងខេត្តបាត់ដំបង បានចេញដីការក្សាការពារដោយប្រគល់សិទិ្ធអាស្រ័យផលទៅអោយមនុស្សដដែលដែលអាជ្ញាធរខត្តបាត់ដំបង និងខេត្តបន្ទាយមានជ័យធ្លាប់ចេញដីកាដកហូតដីពីជនទាំងនោះមកទុកជាសម្បត្តិរដ្ឋវិញកាលពីឆ្នាំ២០០៦ ។ លោក វណ្ណ សូផាត មន្ត្រីសម្រសម្រួលគម្រោងបណ្តាញសិទិ្ធមនុស្សនៃមជ្ឈមណ្ឌលសិទិ្ធមនុស្សកម្ពុជា បានឲ្យដឹងថា នៅម៉ោង២និង៣០នាទីថ្ងៃប្រហស្បតិ៍នេះ តំណាងប្រជាជន៥នាក់ត្រូវបានអញ្ជើញដោយចៅហ្វាយខេត្តរងម្នាក់ដើម្បីជួបពិភាក្សារកដំណោះស្រាយ៕
No comments:
Post a Comment
yes