ពិធីការិនីវ័យក្មេងរបស់ស្ថានីយទូរទស្សន៍ ស៊ីធីអិន សិដ្ឋ ឆលីដា។ រូបថត ស្រេង ម៉េងស្រ៊ុន
ភ្នំពេញៈ ចូលខ្លួនមកបញ្ចេញថ្វីមាត់បម្រើស្ថានីយទូរទស្សន៍ CTN ក្នុងឋានៈជាពិធីការិនីជាង៥ឆ្នាំ សិដ្ឋ ឆលីដា គ្មានឃើញកាន់កម្មវិធីណាមួយធំដុំក្រៅតែកម្មវិធីថតទុកតូចតាច១-២ នោះទេ។ ជាមួយនឹងតំណែងតូចស្តួចស្តើងនោះ ថ្មីនេះក៏ផ្ទុះនូវដំណឹងរង្គោះរង្គើថា ឆលីដា កំពុងត្រៀមជំហានដើរចេញពីទូរទស្សន៍មួយនេះ។ តែទោះបីជាយ៉ាងណានាងបែរជាព្យាយាមទប់ដំណឹងនេះ ហើយនិយាយថា៖ «ខ្ញុំអត់មានត្រៀមជំហានដើរចេញទៅណាទេ ហើយក៏គ្មានរឿងអាក់អន់ស្រពន់ចិត្តនឹងទូរទស្សន៍នេះដែរ»។
មួយរយៈចុងក្រោយនេះ ផ្តើមលេចឮព័ត៌មានខ្សឹបខ្សៀវថា ពិធីការិនីថ្ពាល់ខួច សិដ្ឋ ឆលីដា កំពុងរៀបដំណើរផ្លាស់ប្តូរទ្រនំ ដោយសារ ឆលីដា ការអាក់អន់ចិត្ត និងស្ថានីយទូរទស្សន៍CTN បន្ទាប់ពីនាងបានចូលខ្លួនមកធ្វើការនៅទូរទស្សន៍ច្រើនឆ្នាំបែរជាមិនបានធ្វើជាពិធីការិនីក្នុងកម្មវិធីផ្សាយផ្ទាល់ ។
ពាក់ព័ន្ធនឹងព័ត៌មាននេះ ពិធីការិនីវ័យក្មេង សិដ្ឋ ឆលីដា បានច្រានចោល ដោយនាងបាននិយាយថា៖«ពាក្យចចាក់ចចុចថា ខ្ញុំកំពុងត្រៀមដំណើរចុះចោលទ្រនំ CTN ទៅកាន់ទ្រនំថ្មីនោះគឺមិនមែនជាការពិត ហើយខ្ញុំក៏មិនមានគំនិតនេះដែរ សូម្បីបន្តិចគ្មានផង»។
ជាមួយការអះអាងយាងមធ្យ័តបែបនោះ ពិធិការិនី កម្មវិធី Revlon Face to Face និងកម្មវិធី នាទីកុមាររបស់ស្ថានីយទូរទស្សន៍ CTN ក៏បានបញ្ជាក់ឲ្យដឹងទៀតថា៖«ខ្ញុំអត់មានការអន់ចិត្តនឹងអ្នក គ្រប់គ្រងទូរទស្សន៍ ដែលខ្ញុំធ្វើការរាល់ថ្ងៃនេះទេ មានតែសប្បាយនឹងអ្នកគ្រប់គ្រងវិញ ព្រោះថា កម្មវិធីដែលគាត់ឲ្យខ្ញុំកាន់សព្វថ្ងៃនេះ គឺបានផ្តល់ឪកាសគ្រប់គ្រាន់ សម្រាប់ខ្ញុំ មានពេលបន្តការសិក្សានៅសាលាបាន» ៕
No comments:
Post a Comment
yes