ទឹកជំនន់នៅកូរ៉េខាងជើង បានបំផ្លាញផ្លូវមួយនៅខេត្តកាងវ៉ុន
ក្រុងសេអ៊ូល: ប្រព័ន្ធផ្សព្វផ្សាយរដ្ឋនិយាយថា ទឹកជំនន់ទូទាំងប្រទេសកូរ៉េខាងជើង នៅក្នុងខែនេះ បានសម្លាប់មនុស្ស៨៨នាក់ និងធ្វើឲ្យពលរដ្ឋរាប់ម៉ឺននាក់គ្មានផ្ទះសម្បែង ព្រមទាំងបានបំផ្លិចបំផ្លាញដី កសិកម្មដ៏ធំល្វឹងល្វើយ។
ទីភ្នាក់ងារព័ត៌មានផ្លូវការរបស់ក្រុងព្យុងយ៉ាងបាននិយាយកាលពី ថ្ងៃសៅរ៍ថា ទឹកជំនន់រយៈពេលមួយសប្ដាហ៍ដែលបាន«បង្កឡើងដោយព្យុះ និងភ្លៀងធ្លាក់ដូចគេហែកមេឃ បានឆក់យកជីវិតមនុស្ស និងសម្ភារជាច្រើន»។
ចំនួនអ្នកស្លាប់ចុងក្រោយគឺបាន កើនឡើងយ៉ាងខ្លាំង ពីតួលេខស្លាប់មនុស្ស៨នាក់ ដែលបានរាយការណ៍ពីថ្ងៃពុធ មក៨៨នាក់។
ទីភ្នាក់ងារព័ត៌មានមជ្ឈិមកូរ៉េ(KCNA)បានរាយការណ៍ថា ប្រជាជនសរុបចំនួន១៣៤នាក់បាន រងរបួស ហើយមនុស្សជិត៦៣ពាន់ នាក់គ្មានផ្ទះសម្បែងដោយសារតែទឹកជំនន់ដែលបានចាប់ផ្ដើមកាលពី ថ្ងៃទី១៨កក្កដា ដោយបានបំផ្លិចបំផ្លាញផ្ទះអស់ជាច្រើនខ្នង។
ទីភ្នាក់ងារនេះ បាននិយាយថា ការបាត់បង់អាយុជីវិតមនុស្សដ៏ច្រើននេះ គឺកើតមាននៅក្នុងតំបន់ពីរនៅខេត្តព្យុងកានខាងត្បូងដែលរងគ្រោះ ដោយសារមានភ្លៀងធ្លាក់ខ្លាំងកាលពីថ្ងៃចន្ទ និងថ្ងៃអង្គារ។
ទីភ្នាក់ងារ KCNA បាននិយាយថា ផ្ទៃដីដាំដំណាំជាង៣ម៉ឺនហិកតា ត្រូវបាន«ទឹកបំផ្លាញ និងកប់ ឬនៅក្រោមទឹក ជាការវាយប្រហារមួយសម្រាប់រដ្ឋដែលកំពុងតែមានកង្វះខាតស្បៀង អាហារដ៏ធ្ងន់ធ្ងរស្រាប់។
ជាមួយផ្ទៃដីក្រៀមក្រញង់ និងមានទម្លាប់ធ្វើកសិកម្មបែបបុរាណ ប្រទេសនេះប្រឈមនឹងការលំបាកយ៉ាងខ្លាំងនៅក្នុងការចិញ្ចឹមពលរដ្ឋចំនួន២៤លានរបស់ខ្លួន។មនុស្សរាប់ពាន់នាក់បានស្លាប់នៅពេល មានគ្រោះទុរ្ភិក្សកាលពីពាក់កណ្ដាល រហូតដល់ចុងទសវត្សរ៍ឆ្នាំ១៩៩០៕
No comments:
Post a Comment
yes