អ្នកគាំទ្របួងសួងនៅមុខព្រះអង្គដងកើ កាលពីសប្តាហ៍មុន
សូមឲ្យដោះលែងលោកម៉ម សូណង់ដូ
ភ្នំពេញៈ លោកម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យបានអំពាវនាវពីពន្ធនាគារ ព្រៃសសូមឲ្យសហគមន៍អន្តរជាតិ ជួយអន្តរាគមន៍រកយុត្តិធម៌ ដើម្បីឲ្យរូបលោករួចផុតពីការចោទប្រកាន់ដ៏ ចម្រូងចម្រាសរបស់រដ្ឋាភិបាល។
ការអំពាវនាវរបស់លោក ម៉ម សូណង់ដូ បានធ្វើឡើង តាមរយៈប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ដែលបានចូលទៅសួរសុខទុក្ខរូបលោក នៅពន្ធនាគារព្រៃស កាលពីល្ងាចថ្ងៃសុក្រ។
លោកអ៊ូ វីរៈ ឲ្យដឹងថា លោកម៉ម សូណង់ដូ បានប្រាប់លោកនៅក្នុងពន្ធនាគារថា សុំឲ្យអន្តរជាតិជួយអន្តរាគមន៍ រកយុត្តិធម៌ ពីព្រោះអ្វីដែលគាត់បានធ្វើបទសម្ភាស ក្នុងកម្មវិធីវិទ្យុរបស់គាត់កន្លងមក គ្រាន់តែបំពេញតួនាទី ជាអ្នកព័ត៌មានឯករាជ្យម្នាក់តែប៉ុណ្ណោះ។ លោកបន្តថា ៖ «គាត់នៅតែអះអាងថា គាត់មិនមានកំហុស ដូចការចោទប្រកាន់របស់រដ្ឋាភិបាលទេ។ គាត់បានប្រាប់ខ្ញុំថា សុំកុំយករឿងនេះ ទៅជារឿងនយោបាយ»។
លោកឲ្យដឹងទៀតថា គាត់ថារឿងរបស់គាត់ វាជារឿងសារព័ត៌មាន ពីព្រោះគាត់បានផ្សាយ អំពីការទទួលពាក្យបណ្តឹងថ្ងៃទី ២២ ខែមិថុនា របស់តុលាការឧក្រិដ្ឋកម្មអន្តរជាតិ ICC ប្រឆាំងនឹងរាជរដ្ឋាភិបាលកម្ពុជា ពីបទឧក្រិដ្ឋកម្មប្រឆាំងនឹងមនុស្សជាតិ ដែលមានលោកសួន សេរីរដ្ឋា ជាដើមបណ្ដឹង។លោកអ៊ូ វីរៈ បន្តថា៖«យើងនៅតែបារម្ភ អំពីសុខភាពរបស់គាត់ បើទោះបីជាគាត់មានការធូរស្បើយជាងមុនក៏ដោយ ពីព្រោះនៅក្នុងពន្ធនាគារ បន្ទប់តូចចង្អៀត ហើយដាក់មនុស្សច្រើន»។
អ្នកនាំពាក្យទីស្តីការគណៈរដ្ឋមន្ត្រី លោកផៃ ស៊ីផាន បានអំពាវនាវឲ្យអ្នកដែលវាយតម្លៃ ត្រូវ ឬខុស ក្នុងការចាប់ឃុំខ្លួនដ៏ចម្រូងចម្រាស ទៅលើលោកម៉ម សូណង់ដូនេះ ឲ្យដកខ្លួនចេញ ទុកឲ្យលោក ម៉ម សូណង់ដូ តតាំងជាមួយតុលាការ ទៅតាមផ្លូវច្បាប់។ តុលាការមានភស្តុតាងគ្រប់គ្រាន់ ក្នុងការឃុំខ្លួនគាត់។ លោកអះអាងថា៖ «ការឃាត់ខ្លួនលោក ម៉ម សូណង់ដូ គឺជារឿងរបស់តុលាការ ធ្វើតាមផ្លូវច្បាប់ ពុំមានសម្ពាធផ្នែកនយោបាយពីខាងណានោះទេ»។
ទន្ទឹមនឹងការទាមទាររបស់លោកម៉ម សូណង់ដូ ឲ្យលើកលែងការចោទប្រកាន់ និងដោះលែងរូបលោក ឲ្យមានសេរីភាពវិញនោះ សកម្មជនរបស់សមាគមអ្នកប្រជាធិបតេយ្យគ្រប់ខេត្តក្រុង បានដើរប្រមូលស្នាមមេដៃ គាំទ្រ ដើម្បីធ្វើជាញត្តិ ដាក់ទៅរដ្ឋាភិបាលស្នើសុំឲ្យដោះលែងប្រធានរបស់ពួកគេ។ នៅក្នុងសកម្មភាពនោះ ត្រូវបានអាជ្ញាធរ ហាមឃាត់ ដោយចោទប្រកាន់ថា ធ្វើឲ្យប៉ះពាល់ដល់សណ្តាប់ធ្នាប់និងសន្តិសុខសង្គម។
លោកមោឃ សារ៉េន អាយុ ៤៧ ឆ្នាំ នៅឃុំព្រះប្រសប់ ស្រុកខ្សាច់កណ្ដាល ខេត្តកណ្តាលបានឲ្យដឹងថា កាលពីថ្ងៃសៅរ៍ ពេលលោកដើរប្រមូលស្នាមមេដៃត្រូវបានប៉ូលិសប៉ុស្តិ៍ឃុំគំរាមចាប់ខ្លួន។ លោកឲ្យដឹងថា ៖ «គេសួរខ្ញុំថា ម៉េចចង់ដេកគុកដូចមេដែរឬយ៉ាងម៉េច? គេថា ប្រសិនបើខ្ញុំនៅតែបន្តធ្វើទៀត គេនឹងចាប់ខ្ញុំដាក់គុកដូចមេខ្ញុំដែរ»។
ប៉ុន្តែយ៉ាងណាក៏ដោយ លោកសារ៉េន បញ្ជាក់ពីជំហររបស់លោកថា លោកពុំមានការភ័យខ្លាចនឹងពាក្យគំរាមនោះទេ ហើយលោកនៅតែបន្តធ្វើសកម្មភាពដដែល។ រហូតមកដល់ពេលនេះ លោកបានប្រមូលស្នាមមេដៃក្នុងឃុំចំនួនបីបានជាង២០០០ នាក់ហើយ។
កាលពីថ្ងៃទី ២៦ ខែកក្កដា លោក ជ័យ ឡាយ អាយុ ៧៤ ឆ្នាំ ជាអាចារ្យវត្តចិនដំដែក រស់នៅភូមិ ២០ សង្កាត់ស្រះចក ខណ្ឌដូនពេញ ត្រូវបាននគរបាលខណ្ឌដូនពេញចាប់ខ្លួន ខណៈគាត់កំពុងបណ្ដើរកង់មកពីសុំស្នាមមេដៃពីអ្នកភូមិ ដើម្បីធ្វើញតិ្តគាំទ្រឲ្យមានការដោះលែងលោកម៉ម សូណង់ដូ។
លោកម៉ម សូណង់ដូ ត្រូវបានប៉ូលិសចាប់ខ្លួន កាលពីថ្ងៃទី ១៥ កក្កដា បន្ទាប់ពីរូបលោក បានវិលត្រឡប់មកពីបរទេសរយៈពេលបីថ្ងៃ ដោយសាលាដំបូងរាជធានីភ្នំពេញ បានសម្រេចឃុំខ្លួនរូបលោក នៅពន្ធនាគារព្រៃស ក្រោមការចោទប្រកាន់ដ៏ចម្រូងចម្រាសពីបទផ្ដួចផ្ដើមគំនិតប្រឆាំង អ្នករាជការសាធារណៈ ធ្វើកុបកម្មជ្រៀតជ្រែកខុសច្បាប់ នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់អាវុធខុសច្បាប់ និងប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រា មួយចំនួននៃក្រមព្រហ្មទណ្ឌ។
ប៉ុន្តែលោកម៉ម សូណង់ដូ បានច្រានចោលទាំងស្រុងចំពោះបទចោទប្រកាន់ទាំងនេះ៕
No comments:
Post a Comment
yes