ដីព្រៃសហគមន៍ភ្នំព្រះ នៅក្នុងស្រុកថ្មពួក ខេត្តបន្ទាយមានជ័យ កំពុងរងការកាប់ទន្ទ្រានពីសំណាក់ក្រុមឈ្មួញជាច្រើននាក់។
ព្រៃសហគមន៍នៅឃុំព្រែកព្រលូង ស្រុកព្រែកប្រសព្វ ខេត្តក្រចេះដែលរងការកាប់ទន្ទ្រាន។ រូបថតថ្ងៃទី១២ សីហា ២០០៩។
សហគមន៍ការពារព្រៃបានថ្លែងថា ការកាប់ទន្ទ្រានដីព្រៃរបស់រដ្ឋ ពីសំណាក់ក្រុមឈ្មួញដែលជាអ្នកមានអំណាច និងលុយកាក់ កំពុងកើតមានភាពអនាធិបតេយ្យនៅលើដីព្រៃសហគមន៍ភ្នំព្រះ ក្នុងស្រុកថ្មពួក ខេត្តបន្ទាយមានជ័យ។
សកម្មភាពនេះ កើតមានឡើងបន្ទាប់ពីរាជរដ្ឋាភិបាលមានគោលនយោបាយតាមរយៈការបញ្ជូនក្រុមនិស្សិតស្ម័គ្រចិត្ត ចុះជួយវាស់វែងដីធ្លីក្រុមអាជ្ញាធរនៅតាមខេត្តក្រុងនានា ក្នុងប្រទេសកម្ពុជា។
លោក ដា ឈាន មេឃុំថ្មពួក ស្រុកថ្មពួក ខេត្តបន្ទាយមានជ័យ បានថ្លែងថា ដីព្រៃនៅតំបន់នោះធ្លាប់មានការលក់ដូរអនាធិបតេយ្យទៅឲ្យក្រុមឈ្មួញនារយៈកាលកន្លងមក។ ក្រុមឈ្មួញដែលជាអ្នកមានលុយបានជួលត្រាក់ទ័រទៅឈូស គាស់ និងកាប់កកាយទន្ទ្រាននាពេលបច្ចុប្បន្ន។ ដីនៅតំបន់នោះ ជាដីព្រៃសហគមន៍ភ្នំព្រះ និងជាទីជម្រកសត្វព្រៃ។ ឥឡូវ ត្រូវបានគេកាប់ទន្ទ្រាន វាលស្រឡះ បានទំហំជាង៥០ហិកតារហើយ នៅក្នុងផ្ទៃដីទំហំ២១៥ហិកតារ ដែលប្រជាសហគមន៍ស្នើសុំរក្សាទុកជាដីព្រៃសហគមន៍ភ្នំព្រះ។
លោក ដា ឈាន៖ «ពេលនេះក៏មានការរុករានបន្ត មានត្រាក់ទ័រ ៥ទៅ៦គ្រឿង ចាប់ផ្ដើមបានរយៈពេលប្រហែល១ខែ មកដល់បច្ចុប្បន្ននេះ។ ឥឡូវ សព្វថ្ងៃកំពុងមាន សកម្មភាពរបស់គេនៅតែធ្វើបន្តជានិច្ច។ គេទៅគាស់កកាយដើម្បីធ្វើឲ្យវាស្រឡះបានយកដាំដំឡូង»។
ក្រុមឈ្មួញដែលជាប់ពាក់ព័ន្ធក្នុងការកាប់បំផ្លាញព្រៃយកដីខុសច្បាប់នៅតំបន់ដីព្រៃសហគមន៍នោះ មានជាប់ពាក់ព័ន្ធទៅនឹងមន្ត្រីកងរាជអាវុធហត្ថខេត្តបន្ទាយមានជ័យ៖ «លោក ដុំ ចិត្រ ដែលគាត់ជាមេបញ្ជាការប៉េអិម កងរាជអាវុធហត្ថប្រចាំស្រុកថ្មពួកហ្នឹង គាត់មានការពាក់ព័ន្ធនៅក្នុងដីធ្លីនៅច្រកនាងមុំ ដែលប្រជាពលរដ្ឋកំពុងធ្វើការស្នើសុំដើម្បីទុកដីនោះជាតំបន់ជម្រកសត្វព្រៃ ហើយនិងសម្រាប់ទុកឲ្យប្រជាពលរដ្ឋឃ្វាលគោ ទៅរកអុសយកមកដុត»។
វិទ្យុអាស៊ីសេរី នៅពុំទាន់អាចទាក់ទងសុំសេចក្ដីបញ្ជាក់ការចោទប្រកាន់នេះពីលោក ដុំ ចិត្រ ជាមេបញ្ជាការកងរាជអាវុធហត្ថស្រុកថ្មពួក ខេត្តបន្ទាយមានជ័យ បានទេ។
កាលពីថ្ងៃទី២៤ ខែកក្កដា ឆ្នាំ២០១២ ប្រជាពលរដ្ឋនៅភូមិអូរស្វាយ ឃុំថ្មពួក ចំនួន២៥០គ្រួសារ បាននាំគ្នាធ្វើលិខិតផ្ដិតមេដៃរួមគ្នា ដាក់ទៅអាជ្ញាធរឃុំថ្មពួក បន្តទៅអាជ្ញាធរស្រុកថ្មពួក ដើម្បីឲ្យអន្តរាគមន៍ទៅអាជ្ញាធរខេត្តបន្ទាយមានជ័យ ទាមទារយកដីនៅច្រកនាងមុំ ទំហំ២១៥ហិកតារ ទុកជាដីព្រៃសហគមន៍ នៅឃុំថ្មពួក។ កន្លងមក ប្រជាពលរដ្ឋជាច្រើននាក់នៅភូមិស្វាយ ឃុំថ្មពួក ក៏បានលើកក្បួនដង្ហែតាមម៉ាស៊ីនគោយន្តចំនួន៣៥គ្រឿង ទៅអាជ្ញាធរស្រុក ដើម្បីសុំយកដីព្រៃនៅចំណុចនាងមុំ ទុកជាដីព្រៃសហគមន៍។
អភិបាលស្រុកថ្មពួក លោក ប្លែក វ៉ារី បានមានប្រសាសន៍ថា ករណីកាប់ទន្ទ្រានដីព្រៃសហគមន៍នៅច្រកនាងមុំ នោះ អាជ្ញាធរបានចាត់កម្លាំងចុះធ្វើការទប់ស្កាត់។ ប៉ុន្តែ ដោយសារលោកជាប់ចុះបំពេញការងារវាសវែងដីធ្លីនៅឃុំបន្ទាយឆ្មារ ជួរភ្នំដងរែក នៅពុំទាន់ទទួលបានព័ត៌មានជុំវិញលទ្ធផលនៃការចុះទប់ស្កាត់នោះទេ៖ «គឺក្នុងគណៈបញ្ជាការឯកភាព លោកបានចាត់ចែងកម្លាំង ដើម្បីល្បាត ព្រោះមានបងប្អូនយើងមួយចំនួនទាក់ទងនឹងអនុសាសន៍នេះ គឺឆ្លៀតឱកាស។ ហើយឥឡូវ ក្រុមការងាររបស់យើងកំពុងចុះបុកមកនៅឃុំបន្ទាយឆ្មារ»។
លោកបន្តថា ពាក់ព័ន្ធការចោទប្រកាន់អ្នកកាប់ទន្ទ្រានដីព្រៃសហគមន៍នៅតំបន់នោះ មានជាប់ពាក់ព័ន្ធជាមួយមន្ត្រីកងរាជអាវុធហត្ថ លោកនឹងធ្វើការស្រាវជ្រាវពិនិត្យមើលឡើងវិញ។ ចំណែកឯលោក ដុំ ឈាង ជាមន្ត្រីរដ្ឋបាលព្រៃឈើ នៅស្រុកថ្មពួក បានបដិសេធថា ពុំបានដឹងក្នុងករណីកាប់បំផ្លាញដីព្រៃសហគមន៍នេះទេ។
ប្រធានសម្របសម្រួលសមាគមអាដហុក ប្រចាំខេត្តបន្ទាយមានជ័យ លោក ស៊ុំ ចន្ទគា បានហៅក្រុមជនកាប់បំផ្លាញដីព្រៃសហគមន៍នេះថា ជាក្រុមឱកាសនិយម។ ពួកគេកំពុងរំលោភបំពានកាប់បំផ្លាញដីព្រៃរបស់រដ្ឋយកមកធ្វើជាកម្មសិទ្ធិផ្ទាល់ខ្លួន។ ករណីនេះ លោកសុំឲ្យអាជ្ញាធរខេត្តត្រូវមានវិធានការទប់ស្កាត់ជាបន្ទាន់ ដើម្បីរក្សាដីព្រៃនោះទុកជាសម្បត្តិរដ្ឋឲ្យបានគងវង់៖ «បើសិនធ្វើអញ្ចឹង ធ្វើឲ្យបាត់បង់ដីរដ្ឋកាន់តែច្រើន។ ហើយយើងសង្ឃឹមថា អាជ្ញាធរនៅខេត្តបន្ទាយមានជ័យ គួរពិនិត្យឲ្យបានខ្លាំង កុំឲ្យជនឱកាសនិយមឆ្លៀតក្នុងរយៈពេលដែលរដ្ឋាភិបាលខិតខំប្រឹងប្រែងចែកដីជូនប្រជាពលរដ្ឋរបស់លោកដែលក្រីក្រ»។
ប្រជាពលរដ្ឋបានសម្ដែងការព្រួយបារម្ភថា បើសិនជាដីព្រៃសហគមន៍នោះត្រូវបានគេកាប់វាលអស់ ដើម្បីយកដីទៅធ្វើដំណាំកសិកម្មនោះ ពួកគាត់នឹងជួបប្រទះការលំបាកច្រើន ដោយសារពុំមានទីកន្លែងសម្រាប់ចិញ្ចឹមសត្វពាហនៈ គោក្របី។ ប្រជាពលរដ្ឋនៅតំបន់នោះបានពឹងពាក់ អាស្រ័យលើការរកអនុផលពីព្រៃឈើ ដូចជាការរកអុស បោចវល្លិ ដកផ្សិតជាដើម និងក្ដីព្រួយបារម្ភសំខាន់មួយទៀត គឺការបាត់បង់ទីជម្រកសត្វព្រៃ ដែលកំពុងរស់នៅក្នុងព្រៃនៅតំបន់នោះ៕
No comments:
Post a Comment
yes