ក្រុមអ្នកប្រជាធិបតេយ្យ និងសង្គមស៊ីវិល នៅក្នុងពិធីបួងសួងកាលពីម្សិលមិញ
ភ្នំពេញៈ សមាជិកនៃសមាគមប្រជាធិបតេយ្យ និងក្រុមអង្គការសង្គមស៊ីវិល កាលពីម្សិលមិញ បានរៀបចំពិធីព្រះពុទ្ធសាសនាមួយ នៅវត្ត ក្បែរពន្ធនាគារព្រៃស ដើម្បីបួងសួងព្រះ អារក្ខអ្នកតា ឲ្យរដ្ឋាភិបាលទន់ចិត្ត ដោះលែងលោក ម៉ម សូណង់ដូ ប្រធានវិទ្យុសំបុកឃ្មុំ ពីពន្ធនាគារ។
បន្ទាប់ពីទទួលទឹកមន្តពីព្រះសង្ឃ មនុស្សប្រហែល ៥០ នាក់ បានបួងសួងព្រះ និងអារក្ខអ្នកតាឲ្យជួយលោក ម៉ម សូណង់ដូ រួចផុតពីពន្ធនាគារ ដោយអះអាងថា លោក ម៉ម សូណង់ដូ ជាមនុស្សត្រង់គ្មានកំហុស ហើយមិនមែនពាក់ព័ន្ធនឹងអំពើពុករលួយ និងការបំផ្លិចបំផ្លាញជាតិ។
អ្នកស្រី នាង ពេជ្រ បានថ្លែងថា៖ «មនុស្សម្នាក់ទូរស័ព្ទមកខ្ញុំថា លោកប្រធានជាប់ពន្ធនាគារ ខ្ញុំស្រក់ទឹកភ្នែក។ សូមអារក្ខអ្នកតាក្នុងលោកជួយលោកប្រធាន ម៉ម សូណង់ដូ។ គាត់ជាក្រដាសសទទេស្អាត គាត់មិនដែលពាក់ព័ន្ធនឹងការធ្វើអបគមន៍ទេ។ សូមរដ្ឋាភិបាលពិចារណា អ្នកដាក់គុកលោកប្រធាន ម៉ម សូណង់ដូទៅវិញទេ ដែលជាអ្នកខុសនោះ»។
អ្នកស្រី បានបន្ថែមថា រដ្ឋាភិបាលត្រូវតែដឹងពីការចាប់ខ្លួននេះ និងថា រដ្ឋាភិបាលគួរខ្មាសអៀន ព្រោះមតិជាតិ និងអន្តរជាតិថ្កោលទោសលើការចាប់ខ្លួននេះ។
លោក ប៉ា ងួនទៀង ប្រធានមជ្ឈមណ្ឌលប្រព័ន្ធផ្សព្វផ្សាយឯករាជ្យកម្ពុជា បានហៅការចាប់ខ្លួនលោក ម៉ម សូណង់ដូ ជាអំពើខុសច្បាប់ ហើយដោយសារលោកនាយករដ្ឋមន្រ្តី [ហ៊ុន សែន] ខ្លាចគាត់ ហើយលោកបានលើកទឹកចិត្តរដ្ឋាភិបាលឲ្យចាប់ខ្លួនលោកម្នាក់ទៀត ប្រសិនបើរដ្ឋាភិបាលគិតថា គាត់និយាយនេះខុស។
លោកបានបញ្ជាក់ថា៖ «លោក ម៉ម សូណង់ដូ មានអ្វីមួយធ្វើឲ្យលោកនាយករដ្ឋមន្រ្តី ខ្លាច ហេតុនេះលោកនាយករដ្ឋមន្រ្តីចាប់ខ្លួនលោក»។
លោកបានបន្តថា៖ «ចំពោះការចាប់ខ្លួននេះ ខ្ញុំនិយាយម្តងហើយម្តងទៀត គឺ លោកនាយករដ្ឋមន្រ្តីធ្វើខុសច្បាប់។ ខ្ញុំនិយាយថា លោកនាយករដ្ឋមន្រ្តីធ្វើនេះខុសច្បាប់ ហើយប្រសិនបើភាសាខ្ញុំ លោកនាយករដ្ឋមន្រ្តីយល់ថា ខ្ញុំនិយាយខុស ប្រសិនបើលោកនាយករដ្ឋមន្រ្តីចង់យកសម្តីខ្ញុំចាត់វិធានការច្បាប់ នោះ ខ្ញុំនឹងស្វាគមន៍»។
លោកបានបន្ថែមថា រដ្ឋាភិបាលបានចោទប្រកាន់លោក ម៉ម សូណង់ដូ ថាបានបញ្ជាសមាជិកបង្កើតតំបន់អបគមន៍ ក្នុងខេត្តក្រចេះ វាជាការចោទប្រកាន់ដែលគ្មានភស្តុតាងរឹងម៉ាំ។ លោកបានឲ្យដឹងទៀតថា បញ្ហាបង្កើតតំបន់អបគមន៍ក្នុងស្រុកឆ្លូង ខេត្តក្រចេះ សូម្បីតែសិស្សសិក្សានៅមហាវិទ្យាល័យក៏អាចយល់ដឹងពីពាក្យ បង្កើតតំបន់អបគមន៍ផងដែរ។
លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា បានថ្លែងថា ការចាប់ខ្លួនលោក ម៉ម សូណង់ដូ ជាការខាតបង់ចំពោះសេរីភាពបញ្ចេញមតិនៅកម្ពុជា ជាការខាតបង់ចំពោះសិទិ្ធមនុស្ស និងការខាតបង់ចំពោះដំណើរការប្រជាធិបតេយ្យ។
លោក អ៊ូ វីរៈ បានបញ្ជាក់ថា៖ «ខ្ញុំសង្ឃឹមថា រាជរដ្ឋាភិបាលនឹងដឹងពីបញ្ហានេះព្រោះការចាប់ខ្លួនលោក ម៉ម សូណង់ដូ គឺជាបញ្ហាដែលជាការខាតបង់ចំពោះយើងទាំងអស់គ្នា»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានបដិសេធមិនផ្តល់ការអត្ថាធិប្បាយទេ ដោយលោកថា លោកមិនបានស៊ីជម្រៅពីការចាប់ខ្លួនលោក ម៉ម សូណង់ដូ ឡើយ ហើយលោក គៀត ច័ន្ទថារិទ្ធ អ្នកនាំពាក្យនគរបាលជាតិ បានបដិសេធមិនផ្តល់ការអត្ថាធិប្បាយទេ។
លោកស្រី សែម សក្តិកូឡា ចៅក្រមសាលាដំបូងរាជធានីភ្នំពេញដែលកំពុងចាត់ការលើរឿងក្តីនេះ មិនអាចទាក់ទងសុំការអត្ថាធិប្បាយបានទេ កាលពីថ្ងៃម្សិលមិញ។
លោក ម៉ម សូណង់ដូ ត្រូវបានចាប់ខ្លួន កាលពីថ្ងៃអាទិត្យទី១៥ ខែកក្កដា បន្ទាប់ពីលោកបានវិលត្រឡប់ពីបរទេស កាលពីថ្ងៃទី១២ ហើយលោកត្រូវបានបញ្ជូនទៅពន្ធនាគារ នៅថ្ងៃចន្ទទី ១៦។ កាលពីខែមុន លោក ហ៊ុន សែន បានប្រកាសចាប់ខ្លួនលោក ម៉ម សូណង់ដូ ដោយចោទប្រកាន់គាត់ពីបទបញ្ជាសមាជិកឲ្យបង្កើតតំបន់អបគមន៍នៅ ក្នុងស្រុកឆ្លូង ខេត្តក្រចេះ ហើយបន្ទាប់មក សាលាដំបូងខេត្តក្រចេះបានចេញដីកាចាប់ខ្លួនលោកដោយចោទ ៤ បទ គឺ ផ្តួចផ្តើមគំនិតប្រឆាំងអ្នករាជការសាធារណៈ ធ្វើកុបកម្មជ្រៀតជ្រែកខុសច្បាប់ក្នុងការបំពេញមុខងារសាធារណៈ ញុះញង់ឲ្យប្រជាជនកាន់អាវុធខុសច្បាប់ និងប្រឆាំងនឹងអាជ្ញាធរស្របច្បាប់។ រឿងក្តីរបស់លោកត្រូវបានបញ្ជូនមកសាលាដំបូងរាជធានីភ្នំពេញ ដើម្បីបន្តនីតិវិធី៕
No comments:
Post a Comment
yes