ភ្នំពេញៈ គណបក្ស សម រង្ស៊ី និងគណបក្ស សិទិ្ធមនុស្ស កាលពីម្សិលមិញបានចុះកិច្ចព្រមព្រៀង បង្កើត «ចលនាប្រជាធិបតេយ្យសង្គ្រោះជាតិ» ជាឈ្មោះបណ្តោះអាសន្នមួយ ក្នុងអំឡុងពេលដែលគណបក្សទាំងពីរ កំពុងរៀបចំបង្កើតគណបក្សថ្មីមួយ ដើម្បីចូលរួមប្រកួតនៅក្នុងការបោះឆ្នោតជាតិនៅខែកក្កដាឆ្នាំ ក្រោយនេះ។
លទ្ធផលនៃកិច្ចប្រជុំរយៈពេលពីរថ្ងៃ នៅទីក្រុងម៉ានីល ប្រទេសហ្វីលីពីន គឺសមាជិកជាន់ខ្ពស់ នៃគណបក្សទាំងពីរ បានព្រមព្រៀង តែងតាំង លោក សម រង្ស៊ី ជាប្រធាន នៃគណបក្សដែលនឹងបង្កើតថ្មី និងលោក កឹម សុខា ជាអនុប្រធាន។ តាមកិច្ចព្រមព្រៀង ដែលចុះហត្ថលេខា ដោយ លោក សម រង្ស៊ី និងលោក កឹម សុខា គណបក្សថ្មី ដែលនឹងត្រូវបង្កើតឡើងនោះ ត្រូវកំណត់ឲ្យមានគណៈកម្មាធិការចំនួន៣ក្នុងនោះមាន គណៈកម្មាធិការនីតិប្បញ្ញត្តិ គណៈកម្មាធិការប្រតិបតិ្ត និងគណៈកម្មាធិការវិន័យ។
យ៉ាងណាក៏ដោយ ទាំងលោក សម រង្ស៊ី និងលោក កឹម សុខា នៅតែស្ទាក់ស្ទើរ ក្នុងការបញ្ជាក់ពីឈ្មោះគណបក្សថ្មី និងកាលបរិច្ឆេទច្បាស់លាស់ ក្នុងការបង្កើតគណបក្សនយោបាយថ្មីនោះ។
លោក សម រង្ស៊ី និងលោក កឹម សុខា បានថ្លែងក្នុងសន្និសីទកាសែតរួមគ្នា តាមរយៈវីដេអូ ពីទីក្រុងម៉ានីលនៅទីស្នាក់ការគណបក្ស សម រង្ស៊ី ថា៖ «នៅថ្ងៃអនាគតដ៏ខ្លី នឹងមានគណបក្សប្រឆាំងថ្មី១ ដែលជាលទ្ធផល នៃការបង្រួបបង្រួមរបស់គណបក្ស សម រង្ស៊ីនិងគណបក្ស សិទិ្ធមនុស្ស»។
លោក កឹម សុខា ថ្លែងថា ចលនាប្រជាធិបតេយ្យសង្គ្រោះជាតិ ក្នុងជំហានទី ១ នឹងធ្វើយុទ្ធនាការ ដើម្បីឲ្យមានចលនាប្រជាធិបតេយ្យរួមមួយ ក្នុងចំណោមអ្នកស្នេហាជាតិ និងអ្នកប្រជាធិបតេយ្យ។ លោកបញ្ជាក់ថា៖ «យើងនឹងមានបញ្ជីបេក្ខជនគណបក្សតែមួយ ដាក់ទៅក្រសួងមហាផ្ទៃ ដើម្បីប្រកួតប្រជែង នៅក្នុងការបោះឆ្នោតជាតិនៅក្នុងឆ្នាំ២០១៣»។
លោក សម រង្ស៊ី បានមានប្រសាសន៍ថា គណបក្សសម រង្ស៊ី និងគណបក្សសិទ្ធិមនុស្ស នឹងជំរុញឲ្យធ្វើកំណែទម្រង់ គ.ជ.ប ដើម្បីឲ្យការបោះឆ្នោត ក្នុងពេលខាងមុខ អាចប្រព្រឹត្តទៅដោយសេរី ត្រឹមត្រូវ និងយុត្តិធម៌ពិតប្រាកដ និងថា ការរួបរួមគ្នានេះ ធ្វើឲ្យគណបក្សប្រជាជនភិតភ័យ។
មេបក្សដែលរស់នៅនិរទេសរូបនេះ បញ្ជាក់ថា៖«ចាប់ពីឥឡូវនេះទៅ សករាជនយោបាយនៅក្នុងប្រទេសកម្ពុជា នឹងត្រូវផ្លាស់ប្តូរ ហើយគណបក្សទាំងពីរ បានសម្រេចចិត្តបំពេញបេសកកម្មសម្រាប់ជាតិ ហើយយើងសូមអំពាវនាវ ទៅអ្នកស្នេហាជាតិ និងអ្នកប្រជាធិបតេយ្យទាំងអស់ រួបរួមគ្នា ដើម្បីសង្គ្រោះជាតិ»។
លោកជាម យៀប តំណាងរាស្ត្រគណបក្សប្រជាជន មិនអាចទាក់ទងសុំការអធិប្បាយបានទេកាលពីម្សិលមិញ ក៏ប៉ុន្តែលោកធ្លាប់បានមានប្រសាសន៍កាលពីពេលកន្លងមកថា គណបក្សប្រជាជន មិនខ្វល់ពីការរួបរួមគ្នារបស់គណបក្សប្រឆាំងនោះឡើយ។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត បានលើកឡើងជាថ្មីម្តងទៀតថា ច្បាប់ស្តីពីគណបក្សនយោបាយ បានចែងថា គណបក្សនយោបាយ អាចបង្កើតសម្ព័ន្ធភាព ឬបង្កើតគណបក្សនយោបាយថ្មី ប៉ុន្តែលោកបានព្រមានថា ប្រសិនបើគណបក្សទាំងពីរបង្រួបបង្រួមគ្នាជាគណបក្សតែមួយ មានឈ្មោះថ្មី ពួកគេត្រូវជូនដំណឹងទៅក្រសួងមហាផ្ទៃ។ លោក នីថា បានបន្ថែមថា៖ «ក្រុមប្រឹក្សាធម្មនុញ្ញ បានគូសបញ្ជាក់ថា គណបក្សនយោបាយ អាចប្រឈមនឹងការបាត់បង់អាសនៈ នៅក្នុងរដ្ឋសភា ប្រសិនបើការបង្រួបបង្រួម ប្រើឈ្មោះគណបក្សថ្មី»។
ប៉ុន្តែ លោក កឹម សុខា បានថ្លែងថា បញ្ហាបាត់បង់អាសនៈក្នុងរដ្ឋសភារបស់គណបក្ស សម រង្ស៊ី និងគណបក្ស សិទិ្ធមនុស្ស នឹងមិនមែនជាឧបសគ្គ នៃការបង្រួបបង្រួមគណបក្សទាំងពីរឡើយ។
លោក បន្ថែមថា៖ «យើងយល់ដឹងអំពីច្បាប់ ក្នុងការបង្កើតគណបក្សនយោបាយថ្មីដោយមិនបាត់បង់អាសនៈក្នុងរដ្ឋសភា»។
លោកគល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ ខុម ហ្វ្រែល (COMFREL) ថ្លែងថា លោក សម រង្ស៊ី និង លោក កឹម សុខា នឹងត្រូវមានផែនការយុទ្ធសាស្រ្តអំពីពេលវេលា និងរបៀប ដែលពួកគេ ចុះឈ្មោះគណបក្សថ្មីដើម្បីកុំឲ្យបាត់បង់កៅអី ដែលមានរួចហើយ នៅឃុំសង្កាត់ និងនៅថ្នាក់ជាតិ។ លោកពន្យល់ថា៖ «ប្រសិនបើរួមបញ្ចូលជាគណបក្សតែមួយ វាមានន័យថា គណបក្សមួយទៀត នឹងបាត់បង់កៅអីទាំងអស់។ នេះជាហេតុផល ដែលពួកគេ ត្រូវតែបង្កើតគណបក្សបី»។
នៅក្នុងការបោះឆ្នោតថ្ងៃទី ៣ មិថុនា កាលពីពេលថ្មីៗនេះ គណបក្សសមរង្ស៊ីទទួលបានសំឡេងចំនួន ២០,៨ ភាគរយ ហើយគណបក្សសិទ្ធិមនុស្ស ទទួលបានសំឡេងចំនួន ៩,៨ ភាគរយ។
បញ្ហារួមបញ្ចូលគ្នារវាងគណបក្សទាំងពីរ បានអូសបន្លាយអស់រយៈពេលជាច្រើនឆ្នាំមកហើយ ប៉ុន្តែសកម្មភាពរឹងមាំឆ្ពោះទៅរកការរួមបញ្ចូលគ្នានេះ បានចាប់ផ្តើមបន្ទាប់ពីគណបក្សសិទ្ធិមនុស្សបានទទួលសំឡេងគាំទ្រ គួរឲ្យភ្ញាក់ផ្អើល នៅក្នុងការបោះឆ្នោតឃុំសង្កាត់ថ្មីៗនេះ។
បញ្ហាអាចភាន់ច្រឡំ ចំពោះការបង្កើតគណបក្សទីបី នឹងត្រូវការការពន្យល់ឲ្យបានច្បាស់ទៅប្រជាជន។ នេះបើតាមលោក ហង្សពុទ្ធា នាយកប្រតិបត្តិនៃគណៈកម្មាធិការអព្យាក្រឹត និងមិនលម្អៀងដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ និកហ្វិក (NICFEC)។
លោកថ្លែងថា៖ «ប្រសិនបើពួកគេ ចង់បង្កើតគណបក្សពិសេសមួយ ពួកគេចាំបាច់ ត្រូវកសាងទំនុកចិត្តសម្រាប់ប្រជាជនកម្ពុជាមុនការបោះឆ្នោតជាតិ»។ លោកគិតថា៖ «ពួកគេត្រូវការពេលវេលា និងការពិភាក្សាបន្ថែមទៀត»។
លោកគល់ បញ្ញា ចង្អុលបង្ហាញថា ការរួបរួមគ្នា របស់គណបក្សប្រឆាំងទាំងពីរ«វាអាចនឹងមានការកើនឡើងនៃសំឡេង គាំទ្រ។ វានឹងអាចធ្វើឲ្យអ្នកបាត់បង់ក្តីសង្ឃឹម មានក្តីសង្ឃឹមឡើងវិញ ចំពោះការផ្លាស់ប្តូរពិតប្រាកដមួយ និងជំរុញទឹកចិត្តប្រជាជនដែលបាក់ទឹកចិត្ត ឲ្យទៅបោះឆ្នោតឡើងវិញ»។
ចំនួនអ្នកទៅបោះឆ្នោតសម្រាប់ការបោះឆ្នោតឃុំសង្កាត់ មានត្រឹមប្រមាណតែ៦០ ភាគរយ ប៉ុណ្ណោះ។
លោកបណ្ឌិត ឡៅ ម៉ុងហៃ អ្នកវិភាគឯករាជ្យ បានចាត់ទុកការមូលមាត់គ្នា បង្កើតជាគណបក្សថ្មីមួយថា ជាជោគជ័យ របស់គណបក្សប្រឆាំងទាំងពីរ ដែលប៉ុនប៉ងរួបរួមគ្នា តាំងពីក្រោយការបោះឆ្នោតជាតិឆ្នាំ ២០០៨ មក។ លោកមានប្រសាសន៍ថា៖ «ការវិញបញ្ចូលគ្នាឲ្យទៅជាគណបក្សតែមួយរបស់គណបក្សប្រឆាំងទាំង ពីរនេះ អាចនឹងធ្វើឲ្យសំឡេងអ្នកគាំទ្រ កើនឡើង នៅក្នុងការបោះឆ្នោតជាតិឆ្នាំ ២០១៣»។ ប៉ុន្តែលោកឡៅ ម៉ុងហៃ មិនទាន់សន្មតថា ការបញ្ចូលគ្នា ឲ្យក្លាយទៅជាគណបក្សប្រឆាំងថ្មីមួយ ជាការងាយស្រួលនោះទេ ពីព្រោះវាមានជាប់ទាក់ទង ទៅនឹងបញ្ហាផ្លូវច្បាប់ជាច្រើន។
ក្រៅពីចុះកិច្ចព្រមព្រៀងបង្កើតគណបក្សថ្មី គណបក្សប្រឆាំងទាំងពីរ ក៏បានចេញសេចក្តីថ្លែងការណ៍រួមមួយផងដែរថា គណបក្សសម រង្ស៊ី និងគណបក្សសិទ្ធិមនុស្ស រួមកម្លាំងគ្នាតែមួយ ដោយបង្កើតគណបក្សនយោបាយថ្មីមួយ «ស្របតាមឆន្ទៈប្រជាពលរដ្ឋខ្មែរ ដើម្បីសង្គ្រោះប្រទេសជាតិ ឲ្យទាន់ពេលវេលា តាមរយៈការផ្លាស់ប្តូរនយោបាយ ក្នុងបំណងបញ្ចប់អំណាចផ្តាច់ការបច្ចុប្បន្ន ដែលបម្រើបរទេសឈ្លានពាន»។ សេចក្តីថ្លែងការណ៍បន្តថា៖«គណបក្សទាំងពីរ យល់ឃើញថា ការផ្លាស់ប្តូរការគ្រប់គ្រងប្រទេសកម្ពុជា ត្រូវប្រព្រឹត្តទៅដោយអហិង្សា តាមរយៈការបោះឆ្នោតដោយសេរីត្រឹមត្រូវ និងយុត្តិធម៌។ ក្នុងន័យនេះ គណបក្សទាំងពីរ ទាមទារដាច់ខាតឲ្យមានការផ្លាស់ប្តូរសមាសភាព គ.ជ.ប»។
លោកឡៅ ម៉ុងហៃ មិនយល់ស្របឡើយ ការប្រើពាក្យ ចលនាប្រជាធិបតេយ្យ សង្គ្រោះជាតិ ដោយលោកគូសបញ្ជាក់ថា ស្ថានភាពប្រទេសកម្ពុជាបច្ចុប្បន្ន មិនទាន់ដល់ថ្នាក់ត្រូវប្រើពាក្យសង្គ្រោះ ជាតិ ដូចកាលពីអំឡុងសម័យសង្គ្រាមនោះឡើយ៕
No comments:
Post a Comment
yes