គណបក្ស សម រង្ស៉ី និងគណបក្សសិទ្ធិមនុស្ស រួមគ្នាប្រើវិធីបង្កើតបក្សថ្មីមួយទៀត ដើម្បីស្វែងរកការគាំទ្រពីម្ចាស់ឆ្នោតឲ្យបានកាន់តែច្រើនក្នុងការបោះឆ្នោតជាតិ នៅឆ្នាំ២០១៣។
លោក កឹម សុខា (ឆ្វេង) ប្រធានគណបក្សសិទ្ធិមនុស្ស និង លោក សម រង្ស៊ី (ស្ដាំ) ប្រធានគណបក្សសមរង្ស៊ី។
ទាក់ទងបញ្ហានេះ អ្នកវិភាគ និងសង្គមស៊ីវិលមួយចំនួនយល់ថា ការបង្កើតបក្សថ្មីជារឿងមួយដែលលំបាកផ្នែកផ្លូវច្បាប់ និងនយោបាយផ្ទៃក្នុងរបស់បក្សទាំងពីរនោះ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា ការបង្កើតគណបក្សនយោបាយថ្មីត្រូវតែពិនិត្យឲ្យលំអិតនូវចំណុចយ៉ាងច្រើន។ លោកបន្តថា គណបក្សទាំងពីរត្រូវជជែកឲ្យបានច្បាស់ពីតួនាទី និងរចនាសម្ព័ន្ធក្នុងបក្សថ្មី ព្រោះវាទាក់ទងនឹងផលប្រយោជន៍របស់សមាជិកបក្ស។
លោកបញ្ជាក់ថា គណបក្សថ្មីក៏ត្រូវមានសមាជិកថ្មីតាមច្បាប់គណបក្សនយោបាយ ដូចនេះត្រូវសិក្សាបញ្ហាច្បាប់ឲ្យបានច្បាស់លាស់ជាមុនសិន៖ «អារឿងផ្លូវច្បាប់ហ្នឹងត្រូវមើលសិន ប្រកាសៗក្រែងលោខ្វះខាតក្នុងការយល់ដឹងពីបទបញ្ញត្តិច្បាប់ ហ្នឹងជារូបមន្តមួយ ប៉ុន្តែផ្លូវច្បាប់គិតយ៉ាងម៉េច បើសិនមានអ្នកថ្មីបង្កើតបាន តែសមាជិកនៅតែគណបក្សមួយ»។
ប៉ុន្តែមន្ត្រីជាន់ខ្ពស់នៃគណបក្សទាំងពីរអះអាងថា សម្ពន្ធភាពរបស់ពួកគេមានទំនាក់ទំនងល្អប្រសើរ និងត្រៀមខ្លួនរួចរាល់ហើយសម្រាប់ធ្វើការងារនយោបាយ និងផ្លូវច្បាប់ ដើម្បីត្រួសត្រាយផ្លូវឈានទៅបង្កើតបក្សថ្មីមួយនាពេលខាងមុខ។
ប្រធានគណបក្សសិទ្ធិមនុស្ស លោក កឹម សុខា នៅថ្ងៃទី២១ កក្កដា មានប្រសាសន៍ថា ដោយសារគណបក្ស សម រង្ស៉ី និងគណបក្សសិទ្ធិមនុស្ស មានតំណែងនៅក្នុងសភា គណបក្សទាំងពីរមិនលុបឈ្មោះគណបក្សចេញនោះឡើយ។ លោកបន្តថា គណបក្សទាំងពីរកំពុងពិភាក្សាគ្នារកច្រកចេញ ដោយគ្រោងបង្កើតគណបក្សថ្មីស្រឡាងមួយ។
លោក កឹម សុខា បញ្ជាក់ថា គណបក្ស សម រង្ស៉ី និងគណបក្សសិទ្ធិមនុស្សបានបង្កើតក្រុមការងារសិក្សាពីនីតិវិធីផ្សេងៗក្នុងការបង្កើតបក្សថ្មីនេះ៖ «គណបក្សទាំងពីរ (សិទ្ធិមនុស្ស និង សម រង្ស៉ី) គឺមិនដាក់បញ្ជីបោះឆ្នោតឆ្នាំ២០១៣ ទេ បញ្ជីបោះឆ្នោតឆ្នាំ២០១៣ ដាក់តែឈ្មោះគណបក្សថ្មីមួយទេ អ្នកដែលត្រូវទៅឈរឈ្មោះបោះឆ្នោតតំណាងរាស្ត្រឆ្នាំ២០១៣ ត្រូវទៅឈរឈ្មោះឲ្យគេបោះឆ្នោតនៅគណបក្សថ្មីនោះ»។
លោក កឹម សុខា បន្តថា វាពិតជារឿងលំបាកមួយសម្រាប់ការបង្កើតគណបក្សថ្មី តែគណបក្សសិទ្ធិមនុស្ស និងគណបក្ស សម រង្ស៉ី មានឆន្ទៈរួមគ្នាក្នុងការធ្វើការងារនេះ។
អ្នកនាំពាក្យគណបក្ស សម រង្ស៉ី លោក យឹម សុវណ្ណ មានប្រសាសន៍ដូចគ្នានឹងលោក កឹម សុខា ដែរ ដោយលោកប្រាប់ថា គណៈកម្មការថ្មីមួយនឹងសិក្សាពីនីតិវិធីផ្សេងៗក្នុងការបង្កើតគណបក្សថ្មី។
លោក យឹម សុវណ្ណ បញ្ជាក់ថា អ្វីដែលគណបក្សទាំងពីរធ្វើបាននៅដំណាក់កាលនេះ ជាសេចក្តីសម្រេចរួមរវាងក្រុមប្រឹក្សាឃុំនៃគណបក្សទាំងពីរ៖ «ការគ្រោងបង្កើតគណបក្សថ្មីនៅពេលឆាប់ៗខាងមុខ សំខាន់បំផុតគឺទស្សនៈយើងដូចគ្នា យើងមានគោលបំណងដូចគ្នា ដូច្នេះគ្មានអ្វីអាចបំបែកបំបាក់សម្ពន្ធភាពយើងបានជាដាច់ខាត»។
ទោះជាយ៉ាងនេះក្តី មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប.) លោក ទេព នីថា មានប្រសាសន៍ថា ការបង្កើតគណបក្សនយោបាយទាក់ទងនឹងច្បាប់ស្តីពីគណបក្សនយោបាយ ហើយការចុះបញ្ជីគណបក្សជាការងាររបស់ក្រសួងមហាផ្ទៃ។
លោកបន្តថា បើសិនជាបង្កើតបក្សនយោបាយថ្មី នោះបានន័យថា បេក្ខជនគណបក្សចាស់មិនអាចចូលរួមឈរឈ្មោះគណបក្សទាំងពីរបានទេ៖ «នៅក្នុងច្បាប់មានការពាក់ព័ន្ធមនុស្សម្នាក់ត្រូវមានឈ្មោះគណបក្សតែមួយទេ ច្បាប់មិនអាចឲ្យមនុស្សមានឈ្មោះនៅក្នុងគណបក្សពីរ ឬបីទេ»។
ទាក់ទិននឹងការបង្កើតបក្សថ្មីនេះ គេពិនិត្យឃើញមានឧបសគ្គមួយចំនួនទៀត ដូចជាមេដឹកនាំគណបក្សថ្មីដែលគេដៅទៅលើលោក សម រង្ស៉ី ប៉ុន្តែលោកជាទណ្ឌិត និងបញ្ហាមុខតំណែងផ្សេងៗក្នុងគណបក្សថ្មីជាដើម។ យ៉ាងណាមិញ គណបក្សទាំងពីរនៅតែអះអាងថា នឹងបង្កើតគណបក្សថ្មីបាន ហើយមិនមានការរាំងស្ទះអ្វីទាំងអស់។
យ៉ាងណាក៏ដោយ លោកបណ្ឌិត ឡៅ ម៉ុងហៃ ស្នើឲ្យគណបក្សទាំងពីររកច្រកចេញមួយ ដើម្បីបង្កើតគណបក្សថ្មីនេះ មានផ្នែកច្បាប់ និងផលប្រយោជន៍នយោបាយ បើមិនដូចនេះទេ អាចនឹងមានការប្រែប្រួលណាមួយជាយថាហេតុ។
ស្រដៀងគ្នានេះដែរ ប្រធានគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច លោកបណ្ឌិត ហង្ស ពុទ្ធា មានប្រសាសន៍ថា គម្រោងបង្កើតបក្សថ្មីរបស់គណបក្សទាំងពីរហាក់ដូចជាស្ថិតក្នុងភាពស្រពិចស្រពិលនៅឡើយ ដែលបញ្ហានេះត្រូវឲ្យមានការផ្សព្វផ្សាយ និងពន្យល់មហាជនឲ្យបានច្បាស់លាស់ ជៀសវាងការយល់ច្រឡំ។
លោក ហង្ស ពុទ្ធា៖ «ប្រសិនណាគាត់មានយុទ្ធសាស្ត្របែបនេះ ប្រហែលជាគាត់នឹងទៅឈរឈ្មោះខ្លួនឯងនៅក្នុងគណបក្សថ្មី នៅពេលអ្នកគាំទ្រមិនយល់ពីបញ្ហាហ្នឹងនឹងធ្វើឲ្យគណបក្សហ្នឹងខាតអាសនៈ»។
ឆ្លើយតបនឹងបញ្ហានេះ លោក កឹម សុខា នៅតែអះអាងថា គណបក្សសិទ្ធិមនុស្ស និងគណបក្ស សម រង្ស៉ី បានត្រៀមរៀបចំក្រុមការងារសិក្សាពីនីតិវិធី ដើម្បីបង្កើតគណបក្សថ្មីឲ្យបានឆាប់បំផុតមិនឲ្យបរាជ័យឡើយ ទាំងផ្លូវច្បាប់ និងជយោបាយផ្ទៃក្នុង។
តាមច្បាប់ បើសិនណាបើគណបក្សទាំងពីរមិនបង្កើតបក្សថ្មី បែរជារំលាយបក្សចូលគ្នា នឹងធ្វើឲ្យបាត់បង់តំណែងសមាជិកក្រុមប្រឹក្សា រាជធានី ស្រុក ក្រុង/ខណ្ឌ ឃុំ/សង្កាត់។ តាមសេចក្តីជូនដំណឹងឲ្យដឹងថា គណបក្សសិទ្ធិមនុស្សនឹងធ្វើសមាជនៅថ្ងៃទី២២ ខែកក្កដា ដោយមានការចូលរួមពីមន្ត្រីគណបក្ស សម រង្ស៉ី ថែមទៀតផង។
គ.ជ.ប. កាលពីពេលថ្មីៗនេះ បានប្រកាសថា ខ្លួននឹងបង្កើតច្បាប់មិនអនុញ្ញាតឲ្យទណ្ឌិតមានសិទ្ធិឃោសនាបោះឆ្នោត គឺសំដៅទៅលើលោក សម រង្ស៊ី មិនឲ្យមានសិទ្ធិក្នុងការដឹកនាំគណបក្សរបស់លោកនៅពេលបោះឆ្នោតខាងមុខនោះឡើយ។
អ្នកវិភាគយល់ថា ប្រសិនបើការបង្កើតគណបក្សថ្មីត្រូវបរាជ័យនោះ គណបក្សទាំងពីរនឹងមានការបាត់បង់ប្រជាប្រិយភាពយ៉ាងធ្ងន់ធ្ងរ។ តែបើគណបក្សទាំងពីបង្កើតបានបក្សថ្មីទី៣មែន នោះជាសញ្ញាមួយវិជ្ជមានបំផុតរបស់គណបក្សប្រឆាំងទាំងពីរ៕
No comments:
Post a Comment
yes