សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខៅឌូ (C.CAWDU) នៅថ្ងៃពុធនេះ បានចេញសេចក្តីថ្លែងការណ៍មួយ ដោយធ្វើការថ្កោលទោសចំពោះការប្រើអំពើហិង្សាមកលើកម្មករ និងសកម្មជនសហជីពនារយៈពេលថ្មីៗចុងក្រោយនេះ។
ក្រុមជើងកាង និងកម្មករដែលរងគ្រោះ (រូប៖ស៊ីខៅឌូ)
ស៊ីខៅឌូ បានលើកឡើងនៅក្នុងសេចក្តីថ្លែងការណ៍ថា ត្រឹមតែរយៈពេល៣សប្តាហ៍ ក្នុងខែកក្កដានេះ មានការប្រើអំពើហិង្សា រួមនឹងការគំរាមកំហែង៤ករណីបានកើតឡើងចំពោះកម្មករ និងសកម្មជនសហជីពស៊ីខៅឌូចំនួន៧នាក់ ក្នុងនោះស្រីចំនួន២នាក់ បណ្តាលឲ្យរងរបួសជាទម្ងន់ និងរហូតដល់សន្លប់។
ស៊ីខៅឌូ បានបន្តថា អំពើហិង្សាទាំងនេះបានកើតឡើងស្ទើរគ្រប់រូបភាព ដូចជាការជួលក្រុមជើងកាង និងសន្តិសុខក្រុមហ៊ុនដើម្បីវាយមកលើកម្មករ សកម្មជនសហជីពដែលកំពុងចូលរួម និងឃ្លាំមើលកូដកម្មទាមទារលក្ខខណ្ឌការងារ និងធ្វើដំណើរតាមដងផ្លូវ ដែលស៊ីខៅឌូសង្ស័យថា មានការរៀបចំពីក្រោយដោយនិយោជក។
ស្របគ្នានេះ សម្ព័ន្ធសហជីពស៊ីខៅឌូ ក៏បានសម្តែងការសោកស្តាយយ៉ាងខ្លាំង ចំពោះទង្វើប្រកបដោយចរិតកោងកាច រំលោភសិទ្ធិកម្មករ សិទ្ធិមនុស្សដោយមិនខ្លាចញញើតច្បាប់ និងមិនមានការអើពើពីអាជ្ញាធរមូលដ្ឋាន ចំពោះអំពើហិង្សាដែលបានប្រព្រឹត្តមកលើកម្មករ និងសកម្មជនសហជីពនោះ។
ក្នុងសេចក្តីថ្លែងការណ៍ ស៊ីខៅឌូ ក៏បានធ្វើការចោទប្រកាន់ផងដែរចំពោះសមាគមរោងចក្រកាត់ដេរនៅកម្ពុជាថា ជារឿយៗតែងតែទម្លាក់កំហុសមកលើភាគីកម្មករ និងសហជីពថា ជាអ្នកបំផ្លាញទំនាក់ទំនងវិជ្ជាជីវៈ ដែលតាមការពិត ភាគីកម្មករ និងសហជីពធ្វើ គឺជាការធ្វើកូដកម្មដោយអហិង្សា ដើម្បីទាមទារលក្ខខណ្ឌការងារ ប្រាក់ឈ្នួលដើម្បីរស់នៅសមរម្យនៅក្នុងសង្គមតែប៉ុណ្ណោះ។
ជាមួយគ្នានេះ ស៊ីខៅឌូ បានស្នើទៅរដ្ឋាភិបាល និងក្រសួងពាក់ព័ន្ធ ឲ្យចូលរួមអន្តរាគមន៍ដោះស្រាយបញ្ហាទាំងអស់ខាងលើ ដោយ ១.ជំរុញឲ្យនិយោជកបញ្ឈប់ជាបន្ទាន់នូវការប្រើអំពើហិង្សាតាមរយៈគ្រប់រូបភាពមកលើកម្មករ និងសកម្មជនសហជីព, ២.ជំរុញឲ្យនិយោជកបញ្ឈប់ការរើសអើងប្រឆាំងសហជីព ជាពិសេសសហជីពស៊ីខៅឌូ និង ៣.ជំរុញអាជ្ញាធរមូលដ្ឋានចាប់ជនសង្ស័យ និងបក្ខពួកទាំងអស់មកផ្តន្ទាទោសឲ្យធ្ងន់ធ្ងរតាមច្បាប់៕
No comments:
Post a Comment
yes