សម្ព័ន្ធសមណនិស្សិត-និស្សិតខ្មែរកម្ពុជាក្រោម គ្រោងផ្តល់អាហរូបករណ៍ ដល់សមាជិក សមាជិកា ប្រចាំឆ្នាំ ២០១២

កាលពីរសៀល ថ្ងៃអាទិត្យ ទី០១ ខែកក្កដា ឆ្នាំ ២០១២ កន្លងទៅនេះ សម្ព័ន្ធសមណនិស្សិត – និស្សិតខ្មែរកម្ពុជាក្រោម បានបើកកិច្ចប្រជុំសំខាន់មួយ នៅទីស្នាក់ការរបស់ខ្លួនឋិតក្នុងកុដិលេខ ១៧ វត្ត​បទុមវតី សង្កាត់ចតុមុខ ខណ្ឌដូនពេញ រាជធានី ភ្នំពេញ ដើម្បីបូកសរុបលទ្ធផលនៃសកម្មភាពប្រចាំ​ ឆមាសទី​១ ឆ្នាំ២០១២ និងការផ្តល់អាហារូបករណ៍ ដល់សមាជិក សមាជិកា ប្រចាំឆ្នាំ ២០១២ ផងដែរ។

ឋិតក្នុងអង្គប្រជុំក្រោមព្រះអធិបតីភាពព្រះតេជព្រះគុណ យឿង តារា ព្រះប្រធានសម្ព័ន្ធសមណ​និស្សិត-និស្សិតខ្មែរកម្ពុជាក្រោម និងដោយមានការនិមន្ត អញ្ជើញចូលរួមពីក្រុមប្រឹក្សាភិបាល គណៈ​កម្មការនាយក គណៈកម្មការបណ្ដាការិយាល័យទាំងប្រាំមួយ និងសមាជិក សមាជិកាទាំងអស់មានប្រ​មាណ២២អង្គ និងរូប អង្គប្រជុំបានចាប់ផ្តើមដោយការធ្វើបទនមស្សការព្រះរតនត្រ័យ រំឭកដួង វិញ្ញាណ​ក្ខន្ធបុព្វបុរស និងការធ្វើ សេចក្ដីរាយការណ៍ស្ដីអំពីសកម្មភាព និងសមិទ្ធផលពីបណ្ដា ការិយាល័យទាំង​អស់ ព្រមទាំងការវាយតម្លៃ និងការផ្តល់ជាអនុសាសន៍អំពីសំណាក់ក្រុមប្រឹក្សា​ភិបាល​ថា “ការចូលរួម ការងារសង្គម ជាកត្តាសំខាន់ណាស់ សម្រាប់ការរស់នៅក្នុងសង្គម ហេតុនេះ​ការជ្រោមជែង ការយក ចិត្ត​​ទុកដាក់ នៃគណៈកម្មការក្នុងការងារ ជាកត្តាល្អណាស់”។

ប្រភពពីអង្គប្រជុំបានឲ្យដឹងផងដែរថា អាហារូបករណ៍ដែលសម្រាប់ផ្តល់ដល់សមាជិក សមាជិកា គឺបានមក ពីសប្បុរសជនទាំងក្នុង និងក្រៅប្រទេស ក្នុងនោះមានសហរដ្ឋអាមេរិក និង​សឹង្ហបុរីជាដើម។ អង្គប្រជុំបាន ឲ្យដឹងទៀតថា ឆ្នាំនេះសម្ព័ន្ធសមណនិស្សិត-និស្សិតខ្មែរកម្ពុជាក្រោម បានសម្រេចផ្តល់អាហារូបករណ៍ដល់ សមាជិក សមាជិការបស់ខ្លួនរួមមានចំនួន៨អង្គ និងរូប ដែល​ក្នុង​នោះសុទ្ធសឹងតែជាសមាជិក សមាជិកា ដែលធ្វើការយ៉ាងសកម្ម និងមានភាពខ្វះខាតយ៉ាងខ្លាំងក្នុងការ​សិក្សារៀនសូត្រ ជាពិសេសនិស្សិតដែលកំពុង សិក្សាថ្នាក់បរិញ្ញាបត្រនៅក្នុងប្រទេសកម្ពុជា។ ការជ្រើស​រើសបេក្ខជនដែលមានឧបនិស្ស័យត្រូវបានទទួលអាហារូបករណ៍នោះ គឺធ្វើឡើងដោយក្រុមប្រឹក្សា​ភិបាល និង​គណៈកម្មការនាយក។ ហើយពិធីចែកអាហារូបករណ៍នេះនឹងធ្វើឡើងនៅវេលាម៉ោង ១៣:៣០នាទី ល្ងាច ថ្ងៃអាទិត្យ ទី២៩ ខែកក្កដា ឆ្នាំ២០១២ខាងមុខនេះ។

សូមបញ្ជាក់ផងដែរថា សម្ព័ន្ធសមណនិស្សិត-និស្សិតខ្មែរកម្ពុជាក្រោម ដែលមានទស្សនៈវិស័យ​គឺផ្តោតទៅលើ ការអភិវឌ្ឍន៍ធនធានមនុស្សនោះ ក្នុងមួយឆ្នាំៗ បានបញ្ជូនសមណនិស្សិតខ្មែរកម្ពុជា​ក្រោមប្រមាណជាជាង ១០ អង្គទៅសិក្សានៅប្រទេសថៃ និងការផ្តល់អាហារូបករណ៍ដល់សមាជិក​សមាជិការបស់ខ្លួន ប្រមាណជាជាង ១០ អង្គ ដែលកំពុងសិក្សានៅក្នុងប្រទេសកម្ពុជា។