ឧត្តរមានជ័យៈមេភូមិនិងប្រជាពលរដ្ឋ៣នាក់នៅក្នុងស្រុកបន្ទាយអំពិលខេត្តឧត្តរមានជ័យបានស្វះស្វែងសុំជំនួយផ្លូវច្បាប់ពីអង្គការសិទ្ធិមនុស្សអាដហុកបន្ទាប់ពីពួកគាត់ត្រូវបានតុលាការខេត្តចេញដីការកោះឲ្យចូលទៅជំនុំជំរះក្តីជាមួយក្រុមហ៊ុនជាតិអភិវឌ្ឍន៍នៅព្រឹកថ្ងៃអង្គារនេះ។
លោកពេង អូនអាយុ៣៥ឆ្នាំជាមេភូមិរំដួងចាស់ស្ថិតនៅក្នុងឃុំអំពិលនិងប្រជាពលរដ្ឋចំនួន៣នាក់ផ្សេងទៀតត្រូវបានតុលាការសាលាដំបូងខេត្តឧត្តរមានជ័យចេញដីកាកាលពីថ្ងៃ២០ខែកក្កដាឆ្នាំ២០១២នេះបង្គាប់ឲ្យចូលសាវនាការជំនុំជំរះពាក់ពន្ធ័នឹងបទផ្តើមគំនិតអំពើលួចនិងធ្វើឲ្យខូចទ្រព្យសម្បត្តិក្រុមហ៊ុនជាតិអភិវឌ្ឍន៍ដោយចេតនា។
លោកពេងអូនបានប្រាប់កាសែតភ្នំពេញប៉ុស្តិ៍ថាលោកនិងអ្នកភូមិបីនាក់ទៀតបានទៅពឹងពាក់សមាគមការពារសិទ្ធិ មនុស្សអាដហុកខេត្តឧត្តរមានជ័យកាលពីថ្ងៃចន្ទ័ដើម្បីសុំជំនួយផ្នែកច្បាប់នៅក្នុងបណ្តឹងក្រុមហ៊ុននេះ។
លោកពេងអូនបានបញ្ជាក់ប្រាប់ថា“ខ្ញុំបារម្ភនិងមិនសប្បាយចិត្តទាន់តែសោះនៅពេលយើងជាមេភូមិធ្វើការបំរើឲ្យផលប្រយោជន៍ប្រជាជនត្រូវបានក្រុមហ៊ុនប្តឹងបែបនេះ។ខ្ញុំមិនដែលផ្តើមគំនិតឬពាក់ពន្ធ័រឿងលួចអីនោះទេ”។
លោកពេងអូនបានឲ្យដឹងថាកាលពីថ្ងៃទី១៦ខែឧសភាឆ្នាំ២០១១ប្រជាពលរដ្ឋបីភូមិចំនួន២៥០នាក់បាននាំគ្នាធ្វើបាតុកម្មប្រឆាំងនឹងក្រុមហ៊ុនជាតិអភិវឌ្ឍន៍ដែលបានដឹកសំភារៈបោះទីតាំងធ្វើការឈូសឆាយផ្ទៃដីដែលទទួលបានពីរដ្ឋាភិបាល។ម៉្យាងក្រុមហ៊ុនមិនបានប្រកាសប្រាប់ប្រជាពលរដ្ឋពីការអភិវឌ្ឍន៍របស់ខ្លួននោះដែរជាហេតុធ្វើឲ្យពួកគាត់ភ័យខ្លាចប៉ះពាល់និងបាត់ដីរបស់ពួកគាត់។
No comments:
Post a Comment
yes