ទិដ្ឋភាពនៅកន្លែងកើតហេតុ
ខេត្តកំពង់ចាម ៖ ក្មេងស្រីជំទង់ម្នាក់អាយុ១៤ឆ្នាំ រស់នៅស្រុកចំការលើ ត្រូវបានជនពុំស្គាល់អត្តសញ្ញាណម្នាក់ចាប់រំលោភសេពសន្ថវៈ និងកាប់ប្រហារយ៉ាងសាហាវព្រៃផ្សៃ ព្រមទាំងអារ.កសម្លាប់ ក្នុងខណៈពេលដឹកគោ២ក្បាលទៅឃ្វាលកាលពីវេលាម៉ោង១១ព្រឹកថ្ងៃទី១៧ សីហា ២០១២ នៅចំណុចអូរសោម ចម្ងាយពីផ្ទះប្រហែលជាង២គីឡូម៉ែត្រ ។
លោកអាន គឹមស្រីុ អធិការរងនគរបាលស្រុកចំការលើប្រាប់ឱ្យដឹងថា ក្មេងស្រីរងគ្រោះបានដឹកគោចេញពីផ្ទះយកទៅឃ្វាលនៅត្រង់ចំណុចខាងលើតែម្នាក់ឯងដូចសព្វដង រហូតដល់ពេលល្ងាច បែរជាឃើញតែគោដើរមកផ្ទះវិញទាំងអូសខ្សែចំណងតែបាត់មនុស្ស ។ លោកអធិការរងនគរបាលស្រុកចំការលើ បានប្រាប់បន្តទៀតថា ដោយសារតែបាត់មិនឃើញកូនត្រឡប់មកផ្ទះវិញឪពុកម្តាយ រួមនឹងអ្នកជិតខាងមានគ្នាប្រហែល២០នាក់ បាននាំគ្នាចេញទៅតាមរក។
សកម្មភាពតាមរកដោយបានឆ្លុះពិលបញ្ចាំងភ្លឺចេញពីកន្លែងមួយចូលទៅកន្លែងមួយកាត់តាមព្រៃវាលស្រែ រហូតដល់ម៉ោង១០យប់ថ្ងៃដដែល (១៧ សីហា) ទើបប្រទះឃើញសពកូនត្រូវគេសម្លាប់ដោយកាប់នឹងអារ.កត្រង់ចំណុចអូរសោម រួចក៏នាំគ្នាសែងយកទៅផ្ទះនឹងបានរាយការណ៍ទៅសមត្ថកិច្ច ហើយត្រូវបានលោកអិុត ដារ៉ា អធិការនគរបាលស្រុកចំការលើបញ្ជាឱ្យកម្លាំងក្រោមឱវាទចុះសហការជាមួយប៉ុស្តិ៍រដ្ឋបាលស្វាយទាប ចុះទៅស្រាវជ្រាវទាំងយប់ ។ លោកណោ ឌីណា នាយរងការិយាល័យនគរបាលបច្ចេកទេសខេត្តប្រាប់ថា ក្មេងស្រីរងគ្រោះត្រូវបានឃាតករកាប់ប្រហារត្រូវចំ៤កន្លែង ក្នុងនោះរួមមានគល់ចិញ្ចើម១កន្លែង, ក១កន្លែង អារដាច់បំពង់ខ្យល់ ដាច់មេដៃស្តាំ១ ដៃឆ្វេង១ ។ នៅកន្លែងកើតហេតុមានចម្ការដំឡូង និងវាលស្រែចម្ងាយពីផ្ទះប្រហែលជាង២គីឡូម៉ែត្រ ។
No comments:
Post a Comment
yes