ប្រជាសហគមន៍ដែលចុះល្បាតប្រឆាំងបទល្មើសព្រៃឈើ ដុតឈើដែលគេលួចកាប់បំផ្លាញ
លោក សន យ៉ាន តំណាងប្រជាសហគមន៍ព្រៃឈើស្រុកស្នួល ដែលកំពុងគេចខ្លួន បានទូរស័ព្ទមកប្រាប់ថា គាត់និងតំណាងម្នាក់ទៀតគឺអ្នកស្រី មុំ សាគីម ត្រូវអធិការនគរបាលស្រុកចិត្របុរី គំរាមសម្លាប់ក្រោយពីពួកគាត់បានដុតឈើប្រមាណ៧ម៉ែត្រគុបចោល ក្នុងការចុះដើរល្បាតប្រឆាំងនឹងបទល្មើសព្រៃឈើចំនួន៥ថ្ងៃ។
គាត់អះអាងថា៖«លោក យ៉ាន ហៀង អធិការនគរបាលស្រុកចិត្របុរី បានទូរស័ព្ទមកគំរាមខ្ញុំថានឹងធ្វើឲ្យខ្ញុំក្រមួយពូជ ហើយថា របស់គេអាចរកបាន តែប្រយ័ត្នជីវិតរកមិនបានទេវ៉ើយ»។
លោក យ៉ាន ឲ្យដឹងទៀតថា ឈើ៧ម៉ែត្រគុបដែលដុតចោលជាឈើអធិការស្រុករូបនេះ ទើបបានជាលោកខឹងខ្លាំង ដល់ថ្នាក់គំរាមសម្លាប់លោក។
លោកថា៖« គំរាមប៉ុណ្ណឹងខ្ញុំមិនខ្លាចទេខ្ញុំសុខចិត្តស្លាប់ឲ្យតែការពារ ព្រៃបាន ប្រហែល៣ថ្ងៃទៀត ខ្ញុំនឹងទៅជាមួយប្រជាសហគមន៍ដើរល្បាតព្រៃទៀត។ ខ្ញុំឆ្ងល់ណាស់ខ្លួនជាអ្នកអនុវត្តច្បាប់តែមិនគោរពច្បាប់ បែរជាដាក់កម្លាំងការពារមនុស្សខូច គ្រប់ច្រកល្ហកនៅកន្លែងដែលនាំឈើចេញ ដោយគ្រាន់តែចាំយកលុយប៉ុណ្ណោះ។ ខ្ញុំថា បើមិនដាក់មន្ត្រីទាំងនេះនៅទីនោះ ប្រហែលជាឈើនៅច្រើនជាង»។
អ្នកស្រី មុំ សាគីម តំណាងប្រជាសហគមន៍ព្រៃឈើស្រុកស្នួលដែលកំពុងគេចខ្លួន បានប្រាប់តាមទូរស័ព្ទមកដែរថា មុននឹងប្រជាសហគមន៍សម្រេចដុតឈើទាំងនោះ គឺបានប្រាប់អាជ្ញាធរនិងរដ្ឋបាលព្រៃឈើអស់ហើយ តែនៅពេលដុតបែរជាចោទពលរដ្ឋថា ធ្វើខុសច្បាប់ហើយគំរាមប្តឹងនិងសម្លាប់អ្នកណាជាមេខ្លោងទៅវិញ ។
អ្នកស្រីបញ្ជាក់ថា ៖ «ខ្ញុំបានរាយការណ៍ទៅរដ្ឋបាលព្រៃឈើអំពីបទល្មើសព្រៃឈើដែលយើង រឹបអូសបាន តែគេថា គ្មានកម្លាំងគ្រប់គ្រាន់ដើម្បីទៅយកឈើនោះទេ ឲ្យពួកយើងដឹកឲ្យគេដល់កន្លែង ហើយដោយសារតែពួកយើងគ្មានមធ្យោបាយទើបសម្រេចចិត្តទាំងអស់គ្នាថា ត្រូវតែដុតចោលតែម្តង។ ខ្ញុំមានការបារម្ភ អំពីសុវត្ថិភាពរបស់ខ្ញុំ ពីព្រោះទាំងអាជ្ញាធរក៏ដូចជាឈ្មួញគំរាមខ្ញុំគ្រប់ច្រក»។
អ្នកស្រី បន្តទៀតថា ប្រជាសហគមន៍បាក់ទឹកចិត្ត បន្ទាប់ពីបានចុះធ្វើការប្រឆាំងនឹងបទល្មើសព្រៃឈើ ប៉ុន្តែអាជ្ញាធរមិនទទួលខុសត្រូវ ចំពោះទង្វើនិងតួនាទីរបស់ពួកគាត់។ អ្នកស្រីបន្តថា ៖«ខ្ញុំឆ្ងល់ណាស់ ហេតុអ្វីអាជ្ញាធរមិនគាំទ្រពួកយើងជាអ្នកការពារព្រៃ បែរជាទៅកាន់ជើងអ្នកដែលបំផ្លាញព្រៃវិញ ដោយបណ្តោយឲ្យឈ្មួញដើរគំរាមពួកយើងដោយសេរីថា នៅថ្ងៃណាមួយពួកអាការពារព្រៃនឹងឲ្យឯងងាប់ក្នុងព្រៃទាំងអស់ គ្នាព្រោះរំខានអញរកស៊ី»។
កាលពីថ្ងៃទី១ ដល់ថ្ងៃទី៥ ខែ មេសាពលរដ្ឋជាង១០០នាក់ មកពី៥ឃុំ ក្នុងស្រុកស្នួល បាននាំគ្នាជិះម៉ូតូ៨០គ្រឿង ដើម្បីល្បាតប្រឆាំងនឹងបទល្មើសព្រៃឈើ រួចរឹបអូសបានម៉ាស៊ីនអារឈើចំនួន៧ ដុតបំផ្លាញឈើ៧ម៉ែត្រគុប និងអាប៊ុលឈូសដី ១ គ្រឿង។
ឆ្លើយតបទៅនឹងការចោទខាងលើ នេះលោក យ៉ាន ហៀង អធិការនគរបាលស្រុកចិត្របុរីបានថ្លែងឲ្យដឹងថា លោកពុំបានគំរាមកំហែងប្រជាសហគមន៍ណាម្នាក់ទេ ហើយលោកក៏ពុំមានអ្វីពាក់ព័ន្ធជាមួយនឹងឈើដែលប្រជាសហគមន៍បាន ដុតបំផ្លាញនោះដែរ។ លោកប្រាប់ទៀតថា៖«ខ្ញុំគ្មានបានទៅគំរាមអ្នកណានោះទេ ខ្ញុំគ្រាន់តែថា ហេតុអ្វីបានជាទៅដុតឈើចោល នោះគឺជាទង្វើខុសច្បាប់ ហេតុអីក៏មិនទាក់ទងទៅរដ្ឋបាលព្រៃឈើ ដុតវាធ្វើអី ក្រៅពីនេះ ខ្ញុំមិនបានពាក់ព័ន្ធអ្វីទាំងអស់»។
លោក ឈឹម សាវុទ្ធ ជាមន្ត្រីសម្របសម្រួលគម្រោងរបស់មជ្ឈមណ្ឌលសិទ្ធិមនុស្សកម្ពុជាបានលើក ឡើងថា មូលហេតុដែលអាជ្ញាធរគំរាមប្រជាសហគមន៍ប្រឆាំងទៅនឹងបទល្មើស ព្រៃឈើនោះ ប្រហែលជាអាជ្ញាធរមានពាក់ព័ន្ធនឹងបទល្មើសនោះ ហើយធ្វើឲ្យប៉ះពាល់ប្រយោជន៍របស់ពួកគេ។ លោកកត់់សម្គាល់ថា៖«ប្រសិនអាជ្ញាធរមានឆន្ទៈទប់ស្កាត់បទល្មើស ព្រៃឈើនោះ គួរតែគាំទ្រសកម្មភាពរបស់ប្រជាសហគមន៍ដែលពួកគាត់បានធ្វើ មិនមែនប្រឆាំងនឹងពួកគាត់ទេ។ នេះ គឺជាសកម្មភាពមួយដែលបញ្ជាក់ច្បាស់ថា អាជ្ញាធរនៅក្នុងមូលដ្ឋាននោះ គឺជាអ្នកបំផ្លាញព្រៃឈើ»៕
No comments:
Post a Comment
yes