ប្រជាពលរដ្ឋជាច្រើននាក់ នៅឯស្រុកក្រគរ ខេត្តពោធិ៍សាត់ បានរិះគន់ចំពោះក្រុមគ្រូពេទ្យនៅមណ្ឌលសុខភាពស្រុកក្រគរ ថា មិនយកចិត្តទុកដាក់មើលថែអ្នកជំងឺ ដោយរវល់តែទៅធ្វើការងារនៅបន្ទប់ព្យាបាលឯកជននៅឯផ្ទះ។
២៦-សីហា-២០១២៖ ឪពុកម្ដាយចង់ពិនិត្យឈាម ត្រូវដឹកកូនទៅគ្លីនិក រួចដឹកមកមណ្ឌលសុខភាពវិញ នៅស្រុកក្រគរ ខេត្តពោធិ៍សាត់។
បុរសអ្នកភូមិឈ្មោះ សុខ ជាលី ជាប្រជាពលរដ្ឋនៅឃុំអន្លង់ត្នោត ស្រុកក្រគរ គាត់បានឲ្យដឹងនៅព្រឹកថ្ងៃទី២៦ សីហា ថា កូនគាត់មានជំងឺក្ដៅខ្លួនខ្លាំង គាត់សង្ស័យថាកូនគាត់គ្រុនឈាម គាត់បានយកកូនទៅមណ្ឌលសុខភាពស្រុកក្រគរ។ គាត់បន្តថា មិនទាន់ទាំងបានពិនិត្យជំងឺផង បុគ្គលិកពេទ្យបានតម្រូវឲ្យគាត់បង់ថ្លៃគ្រែដេកចំនួន២ម៉ឺន៨ពាន់រៀល។ ដោយគាត់មិនបានត្រៀមខ្លួនជាមុន គាត់គ្មានប្រាក់បង់ គេក៏ដេញឲ្យគាត់ទៅយកលុយមកបង់សិន ទើបគេព្រមទទួលព្យាបាលកូនគាត់៖ «ខ្ញុំនាំកូនមកសម្រាកនៅមណ្ឌលសុខភាពស្រុកក្រគរហ្នឹង។ គេតម្រូវឲ្យខ្ញុំបង់ថ្លៃកក់គ្រែ២ម៉ឺន៨ពាន់។ ចៃដន្យ ខ្ញុំទៅហ្នឹងម៉ោង៨យប់ ថ្ងៃសុក្រ ដោយអត់បានត្រៀមជាមុន គេអត់រវីរវល់អីដល់យើងទេ។ ដល់ស្អែកឡើង ខ្ញុំក៏ដាច់ចិត្តយកកូនទៅពិនិត្យឈាមនៅខាងក្រៅ ឃើញថា វាគ្រុនឈាម ខ្ញុំក៏យកកូនមកមណ្ឌលសុខភាពវិញ គេនៅតែធ្វើព្រងើយមិនរវល់មើលកូនខ្ញុំដដែល គេសួររកតែប័ណ្ណក្រីក្រ តែខ្ញុំអត់មានទេ»។
បុរសអ្នកភូមិម្នាក់ដែលសុំមិនបញ្ចេញឈ្មោះ ក៏បានឲ្យដឹងដែរថា មណ្ឌលសុខភាពស្រុកក្រគរ គឺមានតែសំបកផ្ទះប៉ុណ្ណោះ អ្វីៗទាំងអស់ គឺអ្នកជំងឺត្រូវទៅទិញពីខាងក្រៅ ដូចជាថ្នាំ ឬឧបករណ៍ដែលត្រូវប្រើប្រាស់ក្នុងការព្យាបាលជាដើម៖ «តាំងពីស្រោមដៃអីៗ គេឲ្យយើងទៅទិញពីខាងក្រៅមកឲ្យគេទាំងអស់។ ក្នុងមណ្ឌលសុខភាពគ្មានឧបករណ៍អីសម្រាប់បម្រើប្រជាពលរដ្ឋទេ»។
ប្រធានមណ្ឌលសុខភាពស្រុកក្រគរ គឺលោក គ្រី ជិន្ថា បានបដិសេធការលើកឡើងរបស់ប្រជាពលរដ្ឋ លោកពន្យល់ចំពោះបញ្ហាកង្វះខាតខ្លះៗក្នុងមណ្ឌលសុខភាពថា គឺមកពីប្រជាពលរដ្ឋមិនយល់ពីកត្តាបច្ចេកទេស ក្នុងការព្យាបាលរបស់គ្រូពេទ្យ៖«ជួនកាល ប្រជាជនគាត់អត់យល់ពេលដែលយើងឲ្យថ្នាំឲ្យគាត់លេបហើយមិនបញ្ចូលសេរ៉ូមឲ្យគាត់ គាត់ថាយើងមិនយកចិត្តទុកដាក់គាត់។ តែតាមពិត ជំងឺគាត់គឺមិនតម្រូវឲ្យដាក់សេរ៉ូមទេ។ ដល់អ៊ីចឹង គាត់ក៏យល់ថាយើងមិនព្រមព្យាបាលឲ្យគាត់ ដោយសារយើងចង់ឲ្យគាត់ទៅពិនិត្យនៅបន្ទប់ឯកជន តែតាមពិត គឺមិនមែនដូច្នោះទេ»។
ចំពោះការរិះគន់ថា គ្រូពេទ្យមិនរវល់ការងារក្នុងមណ្ឌលសុខភាព ដោយរវល់តែទៅមើលបន្ទប់ព្យាបាលឯកជនផ្ទាល់ខ្លួននោះលោកថា រឿងនេះពុំអាចកើតឡើងទេ ព្រោះក្នុងមណ្ឌលសុខភាពមានការបែងចែកវេនការងារប្រចាំការត្រឹមត្រូវ ព្រមទាំងមានប្រអប់សំបុត្រសម្រាប់ឲ្យប្រជាពលរដ្ឋធ្វើការរិះគន់ ដើម្បីកែលំអទៀតផង។
យ៉ាងនេះក្ដី លោកទទួលស្គាល់ថា គ្រូពេទ្យដែលធ្វើការក្នុងមណ្ឌលសុខភាពភាគច្រើន បានបើកបន្ទប់ព្យាបាលជំងឺក្រៅម៉ោង នៅឯគេហដ្ឋាន ដើម្បីរកកម្រៃបន្ថែមដោះស្រាយជីវភាពគ្រួសារដែលជាប្រការចៀសមិនរួច ដោយសារប្រាក់បៀវត្សរ៍បច្ចុប្បន្ននៅមានកម្រិត៕
No comments:
Post a Comment
yes