ភ្នំពេញ: ប្រធានគណបក្សជាតិនិយម លោក សៅ រ៉ានី បានផ្ញើលិខិតថ្វាយសម្ដេចក្រុមព្រះ នរោត្តម រណឫទ្ធិ ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃទី២៧ ខែសីហា ឆ្នាំ២០១២ ដោយបានសម្ដែងនូវអំណរគុណចំពោះព្រះអង្គ ដែលបានយកព្រះហឫទ័យ គិតគូរបំផុត ចំពោះនិរន្តរភាព នៃអ្នករាជានិយម ដែលអាចបង្រួបបង្រួមក្លាយជាមហាគ្រួសារតែមួយ ប្រកបដោយថាមពលខ្លាំងក្លា។
ក្នុងលិខិត លោក សៅ រ៉ានី បានលើកឡើងថា "ជាការពិតណាស់ ការបង្រួបបង្រួមអ្នករាជានិយម អ្នកសីហនុនិយម ឲ្យក្លាយទៅជាកម្លាំងជាតិមួយ ប្រកបដោយសក្ដានុពលរឹងមាំ នៅក្នុងក្របខ័ណ្ឌ នៃគណបក្សហ្វ៊ុនស៊ិនប៉ិច។ ការរួបរួមគ្នាឡើងវិញនេះ មិនគួរត្រូវបានអូសបន្លាយពីមួយថ្ងៃទៅមួយថ្ងៃ ដោយរង់ចាំពេលវេលាជាអ្នកកំណត់បាននោះទេ។ ម្យ៉ាងវិញទៀត សម្រាប់ការបោះឆ្នោតជ្រើសតាំងតំណាងរាស្ដ្រនីតិកាលទី៥ នៃរដ្ឋសភានៅឆ្នាំ២០១៣ ក៏នៅសល់ពេលវេលាមិនច្រើនប៉ុន្មាន ដើម្បីរៀបចំកិច្ចការសំខាន់ដែលត្រូវធ្វើ ចំពោះមុខនោះដែរ"។
លោក សៅ រ៉ានី បានបញ្ជាក់ថា “គោលបំណងសម្រាប់ការរួបរួមគ្នាឡើងវិញ នៃគណបក្សរាជនិយមទាំងពីរជាបងប្អូណក្នុងកាលៈទេសៈនេះ គឺជាយន្ដការមួយស្របតាម សេចក្ដីប្រកាសរួម ចុះថ្ងៃទី២៤ ខែឧសភា ២០១២ នៅវិមានសន្តិភាព និងស្របតាមព្រះបន្ទូល សម្ដេចក្រុមព្រះ ពីអតីតកាល “សំឡេងដែលមានកុំឲ្យបាត់ សំឡេងដែលបាត់ត្រូវប្រមូលមកវិញ” ហើយក៏អាចទប់ស្កាត់បានសំឡេងរបស់អ្នករាជានិយម ដែលទៅចូលរួមគាំទ្រគណបក្សផ្សេងៗទៀត”។
មិនទាន់មានការឆ្លើយតបបែបណាពីសម្តេចក្រុមព្រះ នរោត្តមរណឫទ្ធិ ដែលកំពុងស្ថិតនៅក្រៅប្រទេស ជុំវិញលិខិតរបស់លោក សៅ រ៉ានី ខាងលើទេ។
ដោយសារតែជម្លោះផ្ទៃក្នុងគណបក្សនរោត្តមរណឫទ្ធិ និងមានការប្តឹងផ្តល់ឡើងតុលាការរវាងក្រុមអ្នកគាំទ្រសម្តេចក្រុមព្រះ និងលោកសៅរ៉ានី បានបង្ខំឲ្យសម្តេចក្រុមព្រះ នរោត្តម រណឫទ្ធិ ប្រកាសលាឈប់ពីឆាកនយោបាយ កាលពីថ្ងៃទី១០ ខែសីហា ឆ្នាំ២០១២។
ក្រោយមក លោក សៅរ៉ានី ក៏បានឡើងធ្វើជាប្រធានគណបក្សនរោត្តមរណឫទ្ធិ ដែលបានប្តូរឈ្មោះ ជាគណបក្សជាតិនិយម តាមរយៈសមាជ កាលពីថ្ងៃទី២៤ ខែសីហា ឆ្នាំ២០១២៕
No comments:
Post a Comment
yes