នៅក្នុងពិធីសមាជវិសាមញ្ញរបស់គណបក្សហ៊្វុនស៊ិនប៉ិច គេបានច្របាច់បញ្ចូលគ្នាជាមួយនឹងគណបក្សជាតិនិយម ដែលជាអតីតគណបក្ស នរោត្តម រណឫទ្ធិ នៅថ្ងៃទី២៥ ខែសីហា។
មន្ត្រីសំខាន់ៗរបស់គណបក្សជាតិនិយម ដោយគិតចាប់ពីថ្នាក់ខេត្ត ស្រុក ខណ្ឌ រហូតដល់ឃុំ សង្កាត់ ត្រូវគេបញ្ចូលទៅក្នុងរចនាសម្ព័ន្ធរបស់គណបក្សហ៊្វុនស៊ិនប៉ិច តែមួយជាផ្លូវការ ក្រោយពីសមាជបានអនុម័តរួច។
តំណាងរាស្ត្រ២រូប គឺលោក សៅ រ៉ានី និងលោក យូ ហុកគ្រី ត្រូវបានបញ្ចូលជាផ្លូវការក្នុងបញ្ជីឈ្មោះអ្នកជាតំណាងរាស្ត្ររបស់គណបក្សហ៊្វុនស៊ិនប៉ិច សម្រាប់ការបោះឆ្នោតសកល ឆ្នាំ២០១៣។ ចំណែកសមាជិកដែលនៅសេសសល់ ដូចជាក្រុមប្រឹក្សាខេត្ត ស្រុក និងឃុំ-សង្កាត់ ត្រូវបន្តរហូតដល់ឆ្នាំ២០១៤ និងឆ្នាំ២០១៧ ទើបចប់សព្វគ្រប់។
ការរួបរួមគ្នានេះ ត្រូវបានមន្ត្រីជាន់ខ្ពស់គណបក្សហ៊្វុនស៊ិនប៉ិច សង្ឃឹមថាសំឡេងរាជានិយម នឹងមានប្រជាប្រិយភាពឡើងវិញ។
មន្ត្រីជាន់ខ្ពស់នៃគណបក្សហ៊្វុនស៊ិនប៉ិច មានជំនឿថា ការច្របាច់បញ្ចូលគ្នារវាងបក្សរាជានិយមទាំងពីរ គឺគណបក្សហ៊្វុនស៊ិនប៉ិច និងអតីតគណបក្ស នរោត្តម រណឫទ្ធិ នឹងធ្វើឲ្យមានសន្ទុះឡើងវិញ ដូចកាលពីឆ្នាំ១៩៩៣។
លោក កែវ ពុទ្ធរស្មី ប្រធានគណបក្សហ៊្វុនស៊ិនប៉ិច បញ្ជាក់ថា ព្រោះតែការបែកបាក់កម្លាំងសាមគ្គីគ្នារវាងអ្នកស្នេហារាជានិយមនេះហើយ ទើបធ្វើឲ្យអ្នកដែលតែងគាំទ្ររបបរាជានិយម ត្រូវធ្លាក់ចុះ និងស្រកស្រុត។ លោក កែវ ពុទ្ធរស្មី បញ្ជាក់ជាថ្មីថា តាមរយៈរូបមន្តនៃការរួបរួមគ្នានេះ នឹងបង្កើនលទ្ធភាពនៃការគាំទ្រ ដែលអាចឈានឆ្ពោះទៅរកការប្រកួតប្រជែងអាសនៈ នៅក្នុងការបោះឆ្នោតសកលឆ្នាំ២០១៣ ខាងមុខបាន។
លោក កែវ ពុទ្ធរស្មី៖ «គណបក្សហ៊្វុនស៊ិនប៉ិច នឹងឈរជើងដូចដែលយើងធ្លាប់ជានិច្ចជាកាល ឈរតាំងពីថ្ងៃដំបូងនៃចលនាយើងនេះ គឺការបង្រួបបង្រួមដើម្បីកម្ពុជា ឯករាជ្យ អព្យាក្រឹត្យ សន្តិ និងសហប្រតិបត្តិ ដែលជាគោលការណ៍ទាំង៥យ៉ាង នៃមនោគមវិជ្ជាសីហនុនិយម»។
ការប្រកាសជំហរបែបនេះរបស់អគ្គមគ្គុទ្ទេសក៍ នៃគណបក្សហ៊្វុនស៊ិនប៉ិច ធ្វើឡើងនៅក្នុងសមាជជាតិរបស់ខ្លួន ដែលមានអ្នកចូលរួមប្រមាណ២ពាន់នាក់ នៅស្នាក់ការកណ្ដាលគណបក្សហ៊្វុនស៊ិនប៉ិច ក្នុងភូមិក្ដីចាស់ សង្កាត់បាក់ខែង ខណ្ឌឫស្សីកែវ។
លោក ញឹក ប៊ុនឆៃ ប្រធានប្រតិបត្តិនៃគណបក្សហ៊្វុនស៊ិនប៉ិច ដែលធ្លាប់ជាគូទំនាស់តាមផ្លូវតុលាការជាមួយអតីតនៃប្រធានគណបក្សរាជានិយមមួយនេះ គឺព្រះអង្គម្ចាស់ នរោត្តម រណឫទ្ធិ ទទួលស្គាល់ថា ក្នុងដំណាក់កាលចុងក្រោយនេះ ប្រជាប្រិយភាពរបស់គណបក្សហ៊្វុនស៊ិនប៉ិច រងផលប៉ះពាល់ និងស្រកស្រុតសំឡេងគាំទ្រយ៉ាងខ្លាំង។
ចំណែកលោក យូ ហុកគ្រី ព្រឹទ្ធបុរសមកពីគណបក្សជាតិនិយម ដែលជាអតីតគណបក្ស នរោត្តម រណឫទ្ធិ លោកគិតថា ការរួបរួមលើកនេះ គឺជាកម្លាំងដ៏រឹងមាំសម្រាប់គណបក្សរាជានិយម មួយនេះ។ លោកហៅការច្របាច់បញ្ចូលគ្នានេះថា គឺជាការរួមឈាមតែមួយ៖ «ការបញ្ចូលឈាមទាំងពីរនេះ នឹងមិនបង្កើតប្រតិកម្មអវិជ្ជមាននោះទេ ព្រោះយើងធ្លាប់រស់នៅជាមួយគ្នាដោយសុខសាន្ត ធ្លាប់ទទួលជោគជ័យរួម។ និយាយមួយបែបទៀត គឺយើងមានឈាមប្រភេទដូចគ្នា»។
មុនប្ដូរអាវឲ្យទៅជាគណបក្សហ៊្វុនស៊ិនប៉ិច ក្នុងពិធីសមាជវិសាមញ្ញ នៅថ្ងៃទី២៥ ខែសីហា ក្នុងស្នាក់ការកណ្ដាល នៃគណបក្សមួយនេះ គេឃើញថា រូបព្រះឆាយាល័ក្ខណ៍របស់ព្រះអង្គម្ចាស់ នរោត្តម រណឫទ្ធិ នៅជាប់នឹងអាវ ត្រូវគេបំពាក់ឲ្យសមាជិកជាច្រើន ដើម្បីចូលរួមក្នុងសមាជនេះ។
លោក សៅ រ៉ានី ប្រធានគណបក្សជាតិនិយម អះអាងថា វត្តមានរបស់សម្ដេចក្រុមព្រះ នរោត្ត រណឫទ្ធិ ទំនងអាចត្រូវបានគេតែងតាំងឲ្យធ្វើជាប្រធានបក្ស ដែលកើតចេញពីការបង្រួបបង្រួមនេះ នៅពេលណាការរៀបចំរចនាសម្ព័ន្ធផ្ទៃក្នុង និងដំណើរការបក្សរឹងមាំ។
លោក ផៃ ស៊ីផាន មន្ត្រីនាំពាក្យទីស្ដីការគណៈរដ្ឋមន្ត្រីបញ្ជាក់ថា គណបក្សគ្រប់គ្រងអំណាចនឹងចាប់ដៃគូបង្កើតរដ្ឋាភិបាលចម្រុះជាមួយបក្សនយោបាយណា ដែលគិតពីផលប្រយោជន៍ក្នុងក្របខណ្ឌធ្វើឲ្យប្រទេសជាតិមានការវិវត្តន៍ឆ្ពោះទៅមុខ៖ «គណបក្សប្រជាជនតែងតែរៀបចំរដ្ឋាភិបាលចម្រុះជាមួយដៃគូណា ដែលយើងអាចរួមគ្នាដើម្បីអភិវឌ្ឍ និងរួមគ្នាដើម្បីរក្សាស្ថិរភាព និងសន្តិភាព ដើម្បីឲ្យមានឱកាសឲ្យមានពង្រីក និងពង្រឹងសេដ្ឋកិច្ចយ៉ាងខ្ពស់»។
ក្រុមអ្នកឃ្លាំមើលបញ្ហាសង្គមគិតថា ចរន្តនៃការរួបរួមរបស់បក្សរាជានិយមនេះ អាចជាដៃគូប្រកួតប្រជែងដ៏ស្វិតស្វាញមួយជាមួយនឹងបក្សប្រឆាំង។
ក៏ប៉ុន្តែ លោក យឹម សុវណ្ណ អ្នកនាំពាក្យគណបក្ស សម រង្ស៊ី អះអាងថា មធ្យោបាយនេះនឹងមិនមែនជាឧបសគ្គណាមួយនោះទេ សម្រាប់ចលនាបក្សប្រឆាំងដែលនឹងលេចជារូបរាងក្នុងពេលដ៏ខ្លីខាងមុខនេះ។
លោក គល់ បញ្ញា នាយកប្រតិបត្តិនៃគណៈកម្មាធិការជាតិដើម្បីការបោះឆ្នោតដោយសេរី និងយុត្តិធម៌ នៅកម្ពុជា គិតថា បរិបទនយោបាយក្នុងដំណាក់កាលចុងក្រោយនេះ ហាក់មានការវិវត្តកាន់តែប្រសើរ។ តែបើទោះជាបែបនេះក្ដី លោកបញ្ជាក់ថា ការបែកបាក់កើតចេញពីការរួបរួមនេះ ក៏នៅតែស្ថិតក្នុងភាពផុយស្រួយនៅឡើយ ព្រោះតែការបែងចែកតួនាទី និងអាសនៈមិនចុះសម្រុងនឹងគ្នា៕
No comments:
Post a Comment
yes