តុលាការខេត្តស្ទឹងត្រែង កោះហៅគ្រួសារអតីតយោធិន ទៅសាកសួរជុំវិញរឿងក្តីទំនាស់ដីធ្លីតាមបណ្ដឹងរបស់យោធភូមិភាគទី១។
ក្រុមគ្រួសារអតីតយោធិន១៦គ្រួសារ អះអាងថា ពួកគាត់រស់នៅលើដីទំនាស់តាំងពីឆ្នាំ១៩៩៣ ដោយមានការអនុញ្ញាតពីមេបញ្ជាការយោធភូមិភាគទី១ និងទទួលស្គាល់ពីអាជ្ញាធរមូលដ្ឋាន។ ក្រុមប្រជាពលរដ្ឋទាំងនោះ មានការព្រួយបារម្ភថា យោធភូមិភាគទី១ កំពុងតែប្រើប្រាស់ប្រព័ន្ធតុលាការ ដើម្បីបណ្ដេញពួកគាត់ចេញពីលំនៅឋាន។
យោធិនចូលនិវត្តន៍ និងរំសាយ១៦គ្រួសាររស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង នៅថ្ងៃទី២៤ សីហា ឆ្នាំ២០១២ បានចូលបំភ្លឺនៅចំពោះមុខតុលាការ ខេត្តស្ទឹងត្រែង។
ការកោះហៅបំភ្លឺនេះ ធ្វើឡើងតាមពាក្យបណ្ដឹងរបស់មេបញ្ជាការរងយោធភូមិភាគទី១ លោកឧត្តមសេនីយ៍ ហេង ខាំវណ្ណ ពីបទរំលោភកាន់កាប់ដីយោធភូមិភាគទី១ ដោយខុសច្បាប់។ ពលរដ្ឋទាំងនោះ អះអាងថា ពួកគាត់ខ្លាចបាត់បង់ផ្ទះសម្បែង ព្រោះថាយោធភូមិភាគទី១ កំពុងប្រើប្រាស់ប្រព័ន្ធតុលាការដើម្បីដាក់សម្ពាធលើប្រជាពលរដ្ឋ។
អតីតយោធិនអង្គភាពវិស្វកម្មយោធភូមិភាគទី១ លោក ថៅ ពី (ហៅ ធី) មានប្រសាសន៍ថា ពលរដ្ឋទាំង១៦គ្រួសាររស់នៅលើដីទំនាស់ តាំងពីឆ្នាំ១៩៩៣ ក្នុងទំហំដីជាងមួយហិកតារ។ លោករំលឹកថា កាលពីឆ្នាំ១៩៩៣ អតីតមេបញ្ជាការយោធភូមិភាគទី១ អនុញ្ញាតឲ្យពួកគាត់ចូលរស់នៅលើដីភូមិ ដែលមានទំនាស់ លុះដល់ឆ្នាំ២០០៥ យោធភូមិភាគទី១ មកដេញពួកគាត់ចេញពីលំនៅឋាន ហើយក៏កើតការប្ដឹងផ្តល់គ្នារហូតដល់សព្វថ្ងៃ។ លោកបន្តថា ពលរដ្ឋទាំង១៦គ្រួសារ ពេលបានឮថាមាននិស្សិតចុះវាស់វែងដី ពួកគាត់ក៏បោះបង្គោលរបងហ៊ុមព័ទ្ធដីភូមិរបស់ខ្លួន តែត្រូវបានកម្លាំងយោធភូមិភាគទី១ រារាំង រួចដាក់ពាក្យបណ្ដឹងទៅកាន់តុលាការតែម្តង។
លោក ថៅ ពី បញ្ជាក់ថា លោកមានការបារម្ភយ៉ាងខ្លាំង ពេលដែលទៅបំភ្លឺនៅតុលាការ៖ «មានឯកឧត្តមឧត្តមសេនីយ៍ទោ ហេង ខាំវណ្ណ និងឧត្តមសេនីយ៍ទោ ខ្លូត សំខាន់ សួរយើងផ្ទាល់ នៅចំពោះមុខតុលាការ ធ្វើឲ្យពលរដ្ឋភ័យខ្លាច»។
លោក ថៅ ពី បន្តថា រូបលោកបារម្ភថា តុលាការខេត្តស្ទឹងត្រែង អាចទទួលឥទ្ធិពលពីសំណាក់ទាហានយោធភូមិភាគ ហើយតុលាការហាក់មិនបានស្តាប់ចម្លើយរបស់ពលរដ្ឋច្រើនទេ។
ទន្ទឹមនឹងនេះ អតីតយោធិនម្នាក់ទៀត លោក ឌី វត្ថា មានប្រសាសន៍ថា លោកត្រូវបានអង្គភាពកាត់ឈ្មោះជាទាហានចោល បន្ទាប់តវ៉ាក្នុងរឿងទំនាស់ដីធ្លីជាមួយអង្គភាព កាលពីឆ្នាំ២០០៥ ដោយកាលណោះ ទាហានបានបង្ខំឲ្យគាត់រុះរើរបងចេញ ពេលនោះប្រពន្ធរបស់គាត់ទៅឃាត់ តែត្រូវទាហានយកបង្គោលរបងបុកត្រូវពោះ ដែលមានទម្ងន់រយៈពេល៦ខែផងនោះ កូនក៏ស្លាប់ក្នុងផ្ទៃតែម្តង។ លោក ឌី វត្ថា បញ្ជាក់ថា ទំនាស់ដីធ្លីនេះបាននាំនូវគុណវិបត្តិចំពោះគ្រួសារគាត់ ទាំងផ្លូវកាយ និងផ្លូវចិត្ត ត្បិតលោកធ្លាប់យកជីវិតទៅប្ដូរ ដើម្បីការពារជាតិ តែសូម្បីតែដីភូមិមួយដុំ ក៏យោធភូមិភាគទី១ មិនអនុញ្ញាតឲ្យគ្រួសារលោករស់នៅបានសុខដែរ៖ «តាំងពីឆ្នាំ២០០៥ ខ្ញុំប្ដឹងផ្តល់រហូតរឿងដី ខ្ចីបុលគេចងការគេ ដើម្បីអីដើម្បីកូន ឪពុកកើតមកក្នុងសង្គ្រាម ខំតស៊ូច្បាំងដើម្បីកូនបានសុខ ចុងបញ្ចប់កូនអត់អី នៅតស៊ូអីដើម្បីអី»។
ពលរដ្ឋឲ្យដឹងថា ប្រជាពលរដ្ឋទាំង១៦គ្រួសារ បានចូលបំភ្លឺនៅតុលាការបានចំនួន៦នាក់ ដោយមានដើមបណ្ដឹងលោក ហេង ខាំវណ្ណ និងលោក ខ្លូត សំខាន់ ជាអ្នកចាំស្តាប់ចម្លើយរបស់អ្នកភូមិនៅចំពោះមុខតុលាការ។ ចំណែកអ្នកនៅសល់ នឹងត្រូវចូលបំភ្លឺនៅតុលាការ នៅថ្ងៃទី៣០ សីហា ខាងមុខ។
យ៉ាងណាក៏ដោយ ប្រធានតុលាការសាលាដំបូងខេត្តស្ទឹងត្រែង លោក អៀង គីមថុល នៅថ្ងៃទី២៥ សីហា មានប្រសាសន៍ថា កាលពីថ្ងៃទី២៤ ពេលដែលពលរដ្ឋ រួមនឹងដើមបណ្ដឹង មកជួបតុលាការជាដំណាក់កាលត្រៀមទាញហេតុផលក្នុងនីតិវិធីរបស់តុលាការ។ លោកបន្តថា ការដែលដើមបណ្ដឹងមកឈរនៅចំពោះមុខចុងចម្លើយនោះ មិនមានឥទ្ធិពលដល់ការសម្រេចចិត្តរបស់តុលាការឡើយ។ លោក អៀង គីមថុល បញ្ជាក់ថា តុលាការខេត្តស្ទឹងត្រែង នឹងចាត់ការរឿងនេះនៅពេលបន្តបន្ទាប់ខាងមុខទៀត។
វិទ្យុអាស៊ីសេរី មិនអាចទាក់ទងសុំការអត្ថាធិប្បាយពីមន្ត្រីនាយទាហានយោធភូមិភាគទី១ លោក ហេង ខាំវណ្ណ និងលោក ខ្លូត សំខាន់ បានទេ នៅថ្ងៃទី២៥ សីហា ឆ្នាំ២០១២។
ទោះជាយ៉ាងណាក្តី តាមពាក្យបណ្ដឹងរបស់យោធភូមិភាគទី១ ចូលទៅតុលាការ បានលើកឡើងថា យោធភូមិភាគទី១ មានគម្រោងក្នុងការស្ថាបនាអនុសេនាធំរថពាសដែក ដោយស្នើឲ្យតុលាការដេញពលរដ្ឋទាំង១៦គ្រួសារចេញពីទីតាំងរស់នៅសព្វថ្ងៃ និងឲ្យតុលាការផ្ដន្ទាទោសពលរដ្ឋទាំងនោះតាមច្បាប់។ ក្នុងពាក្យបណ្ដឹងដដែលបានបន្តថា ពលរដ្ឋទាំង១៦គ្រួសារពិតជាបានរស់នៅលើដីនោះ តាំងពីឆ្នាំ១៩៩៣ ប្រាកដមែន តែដោយពលរដ្ឋសន្យាថា គ្រាន់តែរស់នៅបណ្ដោះអាសន្នប៉ុណ្ណោះ តែពេលអង្គភាពត្រូវការ ពលរដ្ឋបែរជាមិនព្រមចេញទៅវិញ។
ពាក្យបណ្ដឹងនោះបញ្ជាក់ថា ដីទំនាស់នោះបានចុះបញ្ជីសារពើភណ្ឌរួចហើយ នៅក្រសួងការពារជាតិ។
ផ្ទុយទៅវិញ តាមលិខិតស្នើសុំកាន់កាប់ដីធ្លីយោធភូមិភាគទី១ ស្នើទៅកាន់អភិបាលខេត្ត ចុះថ្ងៃទី០២ សីហា ឆ្នាំ២០០៧ បានបញ្ជាក់ថា ដីធ្លីរបស់យោធភូមិភាគទី១ មាន១២អង្គភាព និង៤២កន្លែង សរុបផ្ទៃដីមានទំហំជាង២០០ហិកតារ តែមិនឃើញមានបញ្ជាក់ពីទីតាំងកងអនុសេនាធំរថពាសដែក ដែលជាទីតាំងទំនាស់នោះទេ។
ទាក់ទិននឹងបញ្ហានេះ មន្ត្រីអង្កេតសមាគមការពារសិទ្ធិមនុស្សអាដហុក លោក ហូ សំអុល មានប្រសាសន៍ថា អាជ្ញាធរគួរតែដោះស្រាយបញ្ហានេះ ជូនប្រជាពលរដ្ឋឲ្យបានសមស្រប។ លោកបន្តថា ដីទំនាស់នេះ ធ្លាប់មានដីការក្សាការពារតាំងពីឆ្នាំ២០០៦ ចេញដោយប្រធានតុលាការខេត្តស្ទឹងត្រែង តែយោធភូមិភាគមិនគោរពតាមដីការក្សាការពារនោះឡើយ ដោយភាគីដែលគោរពដីការក្សាការពារនោះ មានតែប្រជាពលរដ្ឋប៉ុណ្ណោះ។
ភ្ជាប់ទៅនឹងបញ្ហានេះ លោក ថៅ ពី បង្ហាញក្តីសង្ឃឹមថា អាជ្ញាធរថ្នាក់ជាតិ និងតុលាការ នឹងអនុញ្ញាតឲ្យពលរដ្ឋទាំង១៦គ្រួសារ បានទទួលកម្មសិទ្ធិស្របច្បាប់លើដីទំនាស់នេះ។ លោកបញ្ជាក់ថា ក្រុមអធិការកិច្ចរបស់ក្រសួងការពារជាតិ ក៏ធ្លាប់រកឃើញថា ពលរដ្ឋទាំងអស់គួរមានសិទ្ធិទទួលបានចំណែកផលប្រយោជន៍ នៃការកាន់កាប់ដីនេះផងដែរ។
ក្រុមប្រជាពលរដ្ឋដែលជាអតីតយុទ្ធជនទាំង១៦គ្រួសារ បានកើតកូនពូនជាចៅជាច្រើននាក់ នៅលើដីទំនាស់ដែលពួកគាត់រស់នៅ។ ពលរដ្ឋអះអាងថា អ្នកទាំង១៦គ្រួសារ ដែលមានទំនាស់នោះ មានជីវភាពក្រីក្រជាងពលរដ្ឋមួយចំនួនទៀត ដែលមានដីពាក់ព័ន្ធនឹងបញ្ជាការដ្ឋានរបស់យោធភូមិភាគទី១ ពួកគាត់អះអាងថា ទំនាស់ដីធ្លីនេះធ្វើឲ្យពួកគាត់មួយចំនួនត្រូវគេកាត់រំសាយ អ្នកខ្លះត្រូវមេបញ្ជាការភូមិភាគទី១ បញ្ជូនទៅធ្វើការនៅកន្លែងឆ្ងាយ អ្នកខ្លះមានកូនជាប់ជាទាហាន ត្រូវមេលុបឈ្មោះចេញវិញ អ្នកខ្លះបង្ខំចិត្តរត់ចោលជួរ អ្នកខ្លះត្រូវឡើងសក្តិបែរជាមិនបានឡើងទៀតផង៕
No comments:
Post a Comment
yes