មានសិស្ស និងនិស្សិតជាច្រើនពាន់នាក់ ដែលតែងតែរំពឹងគិតស្រមៃថា ពួកគេនឹងមានឱកាសទទួលបានអាហារូបករណ៍ទៅសិក្សាបន្តនៅបរទេសទៅតាមផ្នែក និងមុខជំនាញផ្សេងៗ ដែលពួកគេស្រលាញ់។ សព្វថ្ងៃនេះបើទោះបីជាមានឱកាស និងអាហារូបករណ៍ជាច្រើនត្រូវបានផ្តល់មកដល់ព្រះរាជាណាចក្រកម្ពុជាក៏ពិតមែន ប៉ុន្តែការទទួលពត៌មាន និងឱកាសនៃការឈូងចាប់យកអាហារូបករណ៍ទាំងនោះនៅមានកំរិតចំពោះសិស្ស និស្សិតខ្លះដែលពុំមានអ្នកណែនាំ និងធ្លាប់មានបទពិសោធន៍ក្នុងការដាក់អាហារូបករណ៍។
ទន្ទឹមគ្នានេះដែរ មានក្រុមយុវជនមួយក្រុម ដែលធ្លាប់មានឱកាសទទួលបានអាហារូបករណ៍ទៅសិក្សានៅបរទេស ហើយបានមើលឃើញពីបញ្ហានេះទើបបានរួមគ្នាជាក្រុមមួយ ហើយបានសរសេរសៀវភៅស្តីអំពីបទពិសោធន៍ និងវិធីសាស្ត្រដើម្បីទទួលបានអាហារូបករណ៍ពីរក្បាលឈ្មោះថា៖ “Win Scholarships Abroad” និង “Successful Application Forms”។
លោកសេង ពិសិទ្ធ អាយុ២២ឆ្នាំ ដែលជាសមាជិកអ្នកផ្តួចផ្តើមនិពន្ធសៀវភៅនេះ បាននិយាយថា “គោលបំណងសំខាន់នៃការបង្កើតសៀវភៅនេះឡើងគឺមិនមែនដើម្បីទាញយកចំនូលដូចការធ្វើអាជីវកម្មនោះទេ។ តែគោលដៅចំបងនៃការរៀបរៀងសៀវភៅនេះឡើងគឺដើម្បីចែករំលែកបទពិសោធន៍ និងជួយឲ្យកូនខ្មែរយើងចេះដឹងកាន់តែច្រើន”។
លោក បានបន្តទៀតថា៖ “នៅពេលដែលចេញទៅក្រៅប្រទេសច្រើនយើងឃើញសង្គម និងពិភពលោកកាន់តែធំ មានភាពរីកចំរើន ស៊ីវីល័យ និងអភិវឌ្ឍន៍កាន់តែខ្លាំង។ ពិសេសគឺបណ្តាយុវជនគេមានចំនេះដឹង និងការអប់រំយ៉ាងល្អប្រសើរ ដែលជាហេតុធ្វើឲ្យពួកយើងទាំងអស់គ្នាមានទឹកចិត្តចង់ធ្វើយ៉ាងណាដើម្បីជំរុញឲ្យកូនខ្មែរយើងទទួលបានឱកាសអប់រំ និងចេះដឹងដូចពួកគេដែរ”។
ថ្វីត្បិតតែសៀវភៅ Win Scholarships Abroad គឺមានត្រឹមតែ១៤០ទំព័រតែប៉ុណ្ណោះ ប៉ុន្តែវាបានរួមបញ្ចូលនូវទ្រឹស្តី បទពិសោធន៍ ចំនេះដឹង ការអនុវត្ត និងគន្លឹះសំរាប់ត្រៀមប្រលងយកអាហារូបករណ៍។ រីឯសៀវភៅ Successful Application Forms គឺជាសៀវភៅមួយក្បាលផ្សេងទៀតដែលភ្ជាប់មកជាមួយ ដែលសៀវភៅនេះគឺផ្តោតសំខាន់ទៅលើគំរូឯកសារ និងពាក្យសុំអាហារូបករណ៍របស់អ្នកដែលធ្លាប់ជាប់អាហារូបករណ៍ទៅបរទេស។
លោក លី ប៊ុនហេង អាយុ២៤ឆ្នាំ ដែលជាសមាជិកម្នាក់ទៀតក្នុងចំណោមអ្នកនិពន្ធសៀវភៅនេះទាំង៤នាក់ផ្សេងទៀត បានអះអាងថា៖ “មាតិការ និងខ្លឹមសារដែលបានតាក់តែងឡើងនៅក្នុងសៀវភៅនេះទាំងអស់គឺពុំបានដកស្រង់ ចម្លង ឬបកប្រែតាមឯកសារបរទេសណាមួយនោះឡើយ។ តែវាជាបទពិសោធន៍ពិតៗ និងគន្លឹះក្នុងការទទួលបានអាហារូបករណ៍របស់ពួកយើងទាំង៤នាក់ ដែលបាននិពន្ធសៀវភៅនេះឡើង និងបណ្តាគណៈកម្មាធិការដែលជាអ្នកជ្រើសរើសនិស្សិតអាហារូបករណ៍ពីស្ថានទូតនានា”។
លោក ប៊ុនហេងបានបន្តថា៖ “លក្ខណៈពិសេសម្យ៉ាងទៀតគឺ ពួកយើងបានប្រមូលទម្រង់ និងឯកសារដាក់ពាក្យសុំអាហារូបករណ៍ពីកូនខ្មែរយើង ដែលធ្លាប់បានទទួលអាហារូបករណ៍ទៅបណ្តាប្រទេសផ្សេងៗមកចងក្រង ដែលឯកសារ និងពាក្យសុំទាំងនេះគឺពុំមាននៅតាមអ៊ីនធឺណេត ឬងាយស្រួលក្នុងស្រាវជ្រាវរកបានគំរូទាំងនេះឡើយ”។
បន្ទាប់ពីនិពន្ធបានចប់សព្វគ្រប់ ហើយធ្វើការបោះពុម្ភមិនបានយូរប៉ុន្មានផង សៀវភៅទាំងពីរក្បាលនេះគឺពិតជាទទួលបានការគាំទ្រយ៉ាងខ្លាំងពីសំណាក់សិស្សនិស្សិតខ្មែរយើង។ ត្រឹមតែរយៈពេលបីសប្តាហ៍តែប៉ុណ្ណោះ សៀវភៅទាំងពីរច្បាប់នេះចំនួន១ ០០០ក្បាលត្រូវបានលក់ដាច់អស់រលីង។
យុវជន ឆាម ប៉េងហៀង អាយុ១៦ឆ្នាំ សិស្សនៅវិទ្យាល័យភ្នំស្រួច ខេត្តកំពង់ស្ពីនិងជាអ្នកដែលបានអានសៀវភៅទាំងពីរក្បាលនោះ បានលើកឡើងថា៖ “សៀវភៅនេះពិតជាមានលក្ខណៈល្អប្រសើរខ្លាំងណាស់ ព្រោះខ្ញុំបានដឹងពីគន្លឹះនៃការទទួលអាហារូបករណ៍ បូករួមទាំងមានការអនុវត្តផ្ទាល់នៅក្នុងសៀវភៅនេះស្រាប់ ធ្វើឲ្យខ្ញុំងាយយល់កាន់តែច្បាស់ពីដំនើរនៃការទទួលអាហារូបករណ៍។ កាន់តែពិសេសជាងនេះទៅទៀតនោះ វាមានគំរូហ្វម និងកម្រងពាក្យសំរាប់ប្រើក្នុងការបំពេញហ្វម របស់អ្នកដែលធ្លាប់ជាប់ទៅបរទេស ដែលកាលពីមុន ខ្ញុំមិនដឹងថាទៅសុំ ឬរកនៅទីណាបាននោះទេ”។
ប៉េងហៀង បានបន្តដោយជំនឿរចិត្តថា៖ “ខ្ញុំធ្លាប់ទទួលបរាជ័យក្នុងការដាក់អាហារូបករណ៍ ហើយខ្ញុំក៏ធ្លាប់មានគំនិតថាចង់បោះបង់ដែរ។ ប៉ុន្តែសៀវភៅទាំងពីរក្បាលនេះបានជំរុញ និងផ្តល់នូវជំនឿចិត្តដល់ខ្ញុំសារជាថ្មី និងកាន់តែខ្លាំងក្នុងការទទួលបានអាហារូបករណ៍នៅថ្ងៃណាមួយជាក់ជាមិនខាន”៕
No comments:
Post a Comment
yes