ជម្លោះដីធ្លីរវាងសហគមន៍ជនជាតិដើមភាគតិចព្នងនៅខេត្តមណ្ឌលគិរី ជាមួយក្រុមហ៊ុនសម្បទានសេដ្ឋកិច្ចបារាំងឈ្មោះសុកហ្វីន ខេស៊ីឌី (Socfin-KCD) កើតមានឡើងវិញហើយ បន្ទាប់ពីអ្នកភូមិចោទប្រកាន់ថា ក្រុមហ៊ុនរំលោភកិច្ចសន្យាដែលបានព្រមព្រៀងគ្នា។
ប្រជាពលរដ្ឋជនជាតិដើមភាគតិចព្នងរស់នៅឃុំប៊ូស្រា ស្រុកពេជ្រាដា ខេត្តមណ្ឌលគិរី ជាង១០០គ្រួសារ នៅថ្ងៃចន្ទ ទី២៧ ខែសីហា ឆ្នាំ២០១២ អំពាវនាវឲ្យក្រុមការងារដីធ្លីរបស់រាជរដ្ឋាភិបាលវាស់វែងចេញប័ណ្ណកម្មសិទ្ធិដីធ្លីជូនប្រជាពលរដ្ឋ ដើម្បីបញ្ចប់ការរំលោភយកដីប្រជាពលរដ្ឋពីសំណាក់ក្រុមហ៊ុនសុកហ្វីន ខេស៊ីឌី។
សេចក្តីអំពាវនាវនេះ ធ្វើឡើងបន្ទាប់ពីប្រជាពលរដ្ឋជនជាតិដើមទាំងនោះអះអាងថា ក្រុមហ៊ុនបានរំលោភកិច្ចសន្យាបីចំណុចរវាងប្រជាពលរដ្ឋ និងក្រុមហ៊ុន ដែលបានចុះហត្ថលេខាកាលពីឆ្នាំ២០១០ ក្នុងនោះប្រជាពលរដ្ឋយល់ព្រមឲ្យក្រុមហ៊ុនឈូសឆាយដាំកៅស៊ូ លើដីចម្ការចាស់ និងដីចម្ការវិលជុំប្រជាពលរដ្ឋ ជាថ្នូរ ក្រុមហ៊ុនយល់ព្រមផ្តល់សំណងជាប្រាក់ ឬផ្តល់ដីជាថ្នូរនឹងដាំកៅស៊ូប្រវាស់ជាមួយប្រជាពលរដ្ឋម្ចាស់ដី។
ប្រជាពលរដ្ឋរស់នៅភូមិ៧ ឃុំប៊ូស្រា លោក ម៉ាលី ភិន មានប្រសាសន៍បញ្ជាក់ថា ប្រជាពលរដ្ឋជាង១០០គ្រួសារ បានយល់ព្រមយកកិច្ចព្រមព្រៀងដូរដី និងដាំកៅស៊ូប្រវាស់ជាមួយក្រុមហ៊ុនទៅតាមចំណែកដីរបស់អ្នកភូមិតាមគ្រួសារ ដែលក្រុមហ៊ុនបានកាត់សងប្រជាពលរដ្ឋវិញ ក៏ប៉ុន្តែរហូតមកទល់នឹងឆ្នាំ២០១២ នេះ ក្រុមហ៊ុនបានកាត់ដីដែលបានដាំកៅស៊ូរួចជូនប្រជាជនដូចការសន្យា ប៉ុន្តែបែរជាតម្រូវឲ្យប្រជាពលរដ្ឋចុះកិច្ចសន្យាជួលដីនោះពីក្រុមហ៊ុនវិញ ក្នុងកិច្ចសន្យា៦០ឆ្នាំ។
លោកបន្តថា ដីដែលក្រុមហ៊ុនថ្នូរជាមួយប្រជាពលរដ្ឋ គឺជាដីរបស់ប្រជាពលរដ្ឋកាន់កាប់ស្របច្បាប់ ដូច្នេះប្រជាពលរដ្ឋមានសិទ្ធិសុំឲ្យក្រុមនិស្សិតវាស់វែងដីធ្លីចេញប័ណ្ណកម្មសិទ្ធិដល់ពួកគាត់ តាមគោលនយោបាយរបស់រាជរដ្ឋាភិបាល ដូច្នេះប្រជាពលរដ្ឋមិនយល់ស្របចុះកិច្ចសន្យាជួលដីពីក្រុមហ៊ុននោះឡើយ៖ «ទាមទារឲ្យខាងនិស្សិតហ្នឹង វាស់វែងឲ្យដីយើងឲ្យពិតប្រាកដ។ ដីគេចែក ប៉ុន្តែក្នុងក្រដាសប្លង់គេហ្នឹង គេដាក់ជួលដីក្រុមហ៊ុនវិញ។ អ៊ីចឹង ពួកខ្ញុំទាំងអស់មួយឃុំហ្នឹង មិនពេញចិត្ត។ ដូចកាលមុនហ្នឹង ការរស់នៅមិនដែលចេះជួលដីពីណាណីទេ គេទាមទារសិទ្ធិយើងពីដើមមកអ៊ីចឹង»។
ក្រុមហ៊ុនសុកហ្វីន ទទួលម៉ៅការបន្តពីក្រុមហ៊ុន ខូវ ជី លី អភិវឌ្ឍន៍ (khov Chily Development) លើផ្ទៃដីសម្បទានសរុបជិត៣ពាន់ហិកតារ នៅឃុំប៊ូស្រា ដើម្បីដាំកៅស៊ូ ប៉ុន្តែប្រជាពលរដ្ឋ៧ភូមិ បានតវ៉ាជាបន្តបន្ទាប់ ដោយសារក្រុមហ៊ុនបានឈូសឆាយដីស្រែចម្ការ ដីចម្ការវិលជុំ ដីទីសក្ការៈ និងដីកប់សពដូនតារបស់អ្នកភូមិ។
វិទ្យុអាស៊ីសេរី នៅថ្ងៃចន្ទ ទី២៧ ខែសីហា មិនអាចទាក់ទងតំណាងក្រុមហ៊ុនសុកហ្វីន ណាម្នាក់ ដើម្បីអធិប្បាយសេចក្តីចោទប្រកាន់របស់ប្រជាពលរដ្ឋបានទេ។
យ៉ាងនេះក្តី មេឃុំប៊ូស្រា លោក យឿន សារីម ទទួលស្គាល់ថា ប្រជាពលរដ្ឋពិតជាកំពុងមានជម្លោះជាមួយក្រុមហ៊ុនមែន។ លោកបន្តថា បានរាយការណ៍ជូនអាជ្ញាធរស្រុករួចហើយ ដើម្បីដោះស្រាយបញ្ហានេះជូនប្រជាពលរដ្ឋ៖ «បើនិយាយទៅ រឿងអ៊ីចឹងមែន ប៉ុន្មានឆ្នាំហើយ ប្រជាពលរដ្ឋយកមានបីករណីពីមេឃុំចាស់ហ្នឹងតាំងពី២០០៨-២០០៩-២០១០។ រាយការណ៍ទៅស្រុក រាយការណ៍ពីរលើកហើយ ស្រុកក៏រវល់ដែរហ្នឹង»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តមណ្ឌលគិរី លោក គល់ មីឌី មានប្រសាសន៍ថា ក្រុមហ៊ុនត្រូវតែអនុវត្តកិច្ចព្រមព្រៀងដែលបានឯកភាពគ្នាជាមួយប្រជាពលរដ្ឋ។ លោកបន្តថា ប្រជាពលរដ្ឋមានសិទ្ធិជាម្ចាស់ដី ដូច្នេះប្រជាពលរដ្ឋមានសិទ្ធិស្នើសុំក្រុមការងារចុះវាស់វែងដីចេញប័ណ្ណកម្មសិទ្ធិជូនពួកគាត់៖ «ក្នុងគោលការណ៍បីរបស់ក្រុមហ៊ុន គឺក្រុមហ៊ុនមានគោលការណ៍ប្ដូរដីឲ្យពួកគាត់។ គួរតែគោរពកិច្ចសន្យានេះ ធ្វើម៉េចឲ្យពួកគាត់បានដីរបស់គាត់វិញ មិនមែនការជួលទេ»។
យ៉ាងនេះក្តី មេឃុំប៊ូស្រា លោក យឿន សារីម បានបញ្ជាក់ថា អាជ្ញាធរស្រុកពេជ្រាដា គ្រោងចុះជួបប្រជាពលរដ្ឋនៅមូលដ្ឋានមានទំនាស់នៅចុងខែសីហា នេះ ដើម្បីស្វែងរកដំណោះស្រាយបញ្ចប់ជម្លោះនេះ៕
No comments:
Post a Comment
yes