នៅមិនដល់មួយសប្តាហ៏ទៀតនោះទេ ការពិនិត្យបញ្ជីឈ្មោះ និងចុះឈ្មោះបោះឆ្នោត
ជ្រើសរើស តំណាងរាស្រ្តអាណត្តិទី៥ និងចូលមកដល់ ជាមួយគ្នានោះគណបក្ស សម រង្ស៊ី
និងគណបក្ស សិទ្ធិមនុស្ស ក៏បានប្រកាសជំហ៊ររបស់ខ្លួនថា
គណបក្សទាំងពីរនិងមិនដាក់អ្នកសង្កេតការណ៏ដើម្បីពិនិត្យមើលបញ្ជីឈ្មោះ
និងការចុះឈ្មោះបោះឆ្នោតឆ្នាំ២០១២ ដែលនឹងប្រព្រឹត្តទៅនៅថ្ងៃទី០១ ខែកញ្ញា
ដល់ថ្ងៃទី១២ ខែតុលា ឆ្នាំ២០១២ នោះឡើយ ។
សូមជំរាបជូនផងដែរថា មូលហេតុដែលគណបក្ស សម រង្ស៊ី និងគណបក្ស សិទ្ធិមនុស្ស
មិនដាក់ តំណាងរបស់គណបក្សទាំងពីរទៅចូលរួមសង្កេតការណ៏ ក៏ព្រោះដោយសារតែគណបក្សទាំងពីរ
យល់ឃើញថា នីតិវិធីនៃការចុះឈ្មោះ និងលុបឈ្មោះអ្នកបោះឆ្នោតនៅដដែល មិនមានការផ្លាស់ប្តូរគឺពោរពេញទៅដោយការសាំញ៉ាំ
ដែលបង្ករការលំបាកដល់ប្រជាពលរដ្ឋ ។
ជាមួយគ្នានោះលោក គួយ ប៊ុនរឿន តំណាងរាស្រ្តរបស់គណបក្ស សម រង្ស៊ី
និងជាអ្នកទទួលបន្ទុកកិច្ចការបោះឆ្នោតរបស់គណបក្ស សម រង្ស៊ី បានប្រាប់ឲ្យដឹងថា
ក្នុងរយៈពេលកន្លងមកនេះ ការបោះឆ្នោតដែលរៀបចំឡើងដោយអាជ្ញាធររៀបចំការបោះឆ្នោត ដែលហៅថា
គណៈកម្មាធិការជាតិរៀបចំការបោះឆ្នោត
គឺជាការរៀបចំមួយដែលមិនទាន់ធានាឲ្យមានលក្ខណៈត្រឹមត្រូវ សេរី និងយុត្តិធម៌
ហើយស្របទៅតាមបទដ្ឋាននៃអន្តរជាតិនោះទេ ។ លោក គួយ ប៊ុនរឿន បានមានប្រសាសន៏បញ្ជាក់ទៀតផងដែរថា
មួយវិញទៀតបញ្ជីរបស់អ្នកបោះឆ្នោត ដែលបញ្ជីអ្នកបោះឆ្នោតគឺមិនមានការចុះឈ្មោះសារឡើងវិញនោះទេ
គឺគេបានយកបញ្ជីបោះឆ្នោតចាស់ ហើយយកមកចុះឈ្មោះអ្នកដែលគ្រប់អាយុ និងអ្នកដែលខកខាន មកចុះឈ្មោះបន្ថែមតែម្តង
។
លោក គួយ ប៊ុនរឿនបានបន្តទៀតថា
បញ្ជីបោះឆ្នោតបច្ចុប្បន្ននេះជាបញ្ជីបោះឆ្នោតមួយដែលមិន មានតម្លាភាព
និងជាបញ្ជីបោះឆ្នោតមួយដែលមិនមានគុនភាព ហើយបញ្ជីបោះឆ្នោតនេះទៀតសោតក៏មិនមានសុវត្ថភាពផងដែរ
។ លោក គួយ ប៊ុនរឿន បានបន្តថា តម្លាភាពដោយយើងមើលឃើញថា នីតិវិធីនៃការចុះឈ្មោះនេះ
គឺបង្កើតឲ្យមានភាពស្មុកស្មាញ ធ្វើឲ្យបង្កការលំបាកដល់ប្រជាពលរដ្ឋ
ជាពិសេសគឺឯកសារសម្រាប់អ្នកបោះឆ្នោត ដើម្បីឲ្យបានទទួលសិទ្ធិក្នុងការចុះឈ្មោះបោះឆ្នោត
ជាពិសេសគឺអត្តសញ្ញាណប័ណ្ណដែលធ្វើជាមូលដ្ឋានគោលមួយ ក្នុងការចូលរួមការចុះឈ្មោះបោះឆ្នោត
និងយកទៅប្រើប្រាស់សម្រាប់ការបោះឆ្នោត ។
លោក គួយ ប៊ុនរឿន បានមានប្រសាសន៏បញ្ជាក់បន្ថែមបន្តទៀតថា មួយវិញទៀតពេលវេលានៃ
ការចុះឈ្មោះ និងពិនិត្យបញ្ជីឈ្មោះបោះឆ្នោតនេះគឺមានរយៈពេលខ្លីដែលធ្វើឲ្យប្រជាពលរដ្ឋមានការពិបាក
ហើយទន្ទឹមនឹងនេះផងដែរ ក៏ចំរដូវវស្សាថែមទៀត ដែលជារដូវប្រជាពលរដ្ឋខ្មែរធ្វើស្រែចំការ
ដែលធ្វើឲ្យប៉ះពាល់ដល់ការងាររបស់ពួកគាត់ ដែលធ្វើឲ្យពួកគាត់មិនមានពេលវេលាគ្រប់គ្រាន់ក្នុងការទៅពិនិត្យមើលបញ្ជីឈ្មោះ
និងចុះឈ្មោះបន្ថែមទៀតផងដែរសម្រាប់អ្នកមិនទាន់មានឈ្មោះបោះឆ្នោតនោះ ។ លោក គូយ
ប៊ុនរឿន បានបន្តទៀតថា ម្យ៉ាងក្នុងការផ្តល់ឯកសារផ្សេងៗ គឺបង្កការលំបាកដោយអាជ្ញាធរមូលដ្ឋាន
ដល់ប្រជាពលរដ្ឋ ដោយសារតែអាជ្ញាធរមូលដ្ឋានទាំងអស់នោះគឺទទួលបានការផ្ទេរអំណាចពីសមត្ថកិច្ច
គ.ជ.ប ទៅឲ្យក្រុមប្រឹក្សាឃុំ-សង្កាត់ ដែលជាអ្នកមានសមត្ថកិច្ចក្នុងការរៀបចំពិនិត្យបញ្ជីឈ្មោះ
និងការចុះឈ្មោះបោះឆ្នោតនេះផងដែរ ។ លោក គួយ ប៊ុនរឿន ថាទាំងអស់នេះហើយ
ដែលមិនបង្ហាញអំពីតម្លាភាព ហើយនៅចុងបញ្ចប់គឺចំណុចខ្លះយើងឃើញថាអាចធ្វើឲ្យ
ប្រជាពលរដ្ឋនៅថ្ងៃបោះឆ្នោតគឺមិនអាចរកឈ្មោះឃើញ និងទទួលបានសិទ្ធិបោះឆ្នោតថែមទៀតផងដែរ
។
អគ្គលេខាធិការងទទួលបន្ទុកកិច្ចការបោះឆ្នោតលោក គួយ ប៊ុនរឿន
បានមានប្រសាសន៏ឲ្យដឹង បន្តទៀតផងដែរថា នាពេលកន្លងមកនៅក្នុងបញ្ជីបោះឆ្នោត ប្រជាពលរដ្ឋជាច្រើនត្រូវបានលុប
ឈ្មោះ ហើយការលុបនោះគឺខុសទៅនិងច្បាប់ បានន័យថា អ្នកដែលមិនមានសិទ្ធិដែលត្រូវលុប
បែជាត្រូវលុប ហើយប្រជាពលរដ្ឋមួយចំនួនដែលត្រូវលប់គឺគេមិនលប់ទៅវិញ ។ ត្រង់ចំណុចនេះ
ហើយ គឺគេមិនបានអនុវត្តឲ្យបានត្រឹមត្រូវដែលធ្វើឲ្យបញ្ជីនេះនៅតែមានបញ្ហា ។
អគ្គលេខាធិការ រងគណបក្ស សម រង្ស៊ី បានបន្តទៀតថាចំណែកឯគុណភាព គឺបញ្ជីបោះឆ្នោតនេះនៅតែមានឈ្មោះស្ទួនគឺភាគច្រើន
។ ដែលករណីនេះគណៈកម្មាធិការជាតិរៀបចំការបោះឆ្នោត ហាក់បីដូចជាមិនទទួលខុសត្រូវចំពោះឈ្មោះស្ទួន
ឈ្មោះខ្មោច ឈ្មោះអ្នកដែលមិនមានសិទ្ធិនោះឡើយ ។ មួយវិញទៀតឈ្មោះជនបរទេសក៏មានច្រើនថែមទៀតនៅក្នុងបញ្ជីបោះឆ្នោតនោះផងដែរ
។ ទាំងអស់នេះហើយ បង្ហាញឲ្យឃើញថា
បញ្ជីឈ្មោះបោះឆ្នោតគឺមិនបានបង្កើតឲ្យមានសុវត្ថភាពនោះឡើយ
ហើយមួយទៀតនៅថ្ងៃបោះឆ្នោតគឺបញ្ជីឈ្មោះអ្នកបោះឆ្នោត បានធ្វើឲ្យប្រជាពលរដ្ឋរាប់ម៉ឺននាក់
រកឈ្មោះមិនឃើញ ដែលជាហេតុធ្វើឲ្យពួកគាត់មិនមានសិទ្ធិបោះឆ្នោតជ្រើសរើសតំណាងដែលខ្លួនពេញចិត្តនោះឡើយ
។
អគ្គលេខាធិការងទទួលបន្ទុកកិច្ចការបោះឆ្នោតរបស់គណបក្ស សម រង្ស៊ី លោក គួយ
ប៊ុនរឿន បានមានប្រសាសន៏បន្តទៀតផងដែរថា ប្រទេសកម្ពុជា គឺធ្លាប់បានទទួលការផ្តល់ជាយោបល់
ពីសំណាក់អ្នកជំនាញការ ខាងចុះឈ្មោះបោះឆ្នោត និងពិនិត្យបញ្ជីឈ្មោះឲ្យបានត្រឹមត្រូវ
របស់ UNDP ផងដែរ ។ ប៉ុន្តែនាពេលកន្លងមកនេះ អនុសាសន៏
និងលទ្ធផលនៃការសិក្សាស្រាវជ្រាវ របស់អ្នកជំនាញការរបស់ UNDP ដែលបានផ្តល់មកកម្ពុជានោះ គឺមិនត្រូវបានគណៈកម្មាធិការជាតិរៀបចំការបោះឆ្នោត
ក្រសួងមហាផ្ទៃ ក៏ដូចជារដ្ឋាភិបាល យកចិត្តទុកដាក់អនុវត្តតាមនោះឡើយ ។ លោក គួយ
ប៊ុនរឿន បានបន្តថា ប្រសិនបើគណៈកម្មាធិការជាតិរៀបចំការបោះឆ្នោត ក្រសួងមហាផ្ទៃ
ក៏ដូចជារដ្ឋាភិបាល អនុវត្តតាមអ្នកស្រាវជ្រាវរបស់ UNDP ដែលជំនាញខាងការចុះឈ្មោះបោះឆ្នោត និងពិនិត្យបញ្ជីឈ្មោះនោះ និងធ្វើឲ្យ បញ្ជីឈ្មោះមួយនេះធានាថា
មានតម្លាភាព គុណភាព និងធានាអំពីឈ្មោះរបស់ប្រជាពលរដ្ឋជូនពួកគាត់ដល់ថ្ងៃបោះឆ្នោតផងដែរ
។ ដូចនេះប្រជាពលរដ្ឋលោកមានទំនុកចិត្ត និងមិនមានការបារម្ភក្នុងការបាត់ឈ្មោះ ក៏ដូចជាការចុះឈ្មោះមិនបង្កការលំបាកដល់ពួកគាត់
ហើយនិងធ្វើឲ្យពួកគាត់មានការសប្បាយចិត្តថានៅថ្ងៃបោះឆ្នោតនោះឈ្មោះរបស់ពួកគាត់និងមានគ្រប់ៗគ្នា
។
ដូចនេះប្រសិនបើគណៈកម្មាធិការជាតិរៀបចំការបោះឆ្នោត មិនមានការកែប្រែនីតិវិធីនេះទេ
និង ធ្វើឲ្យការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១២
ដែលរៀបចំឡើងដោយគណៈ កម្មាធិការជាតិរៀបចំការបោះឆ្នោតនេះ មិនអាចជួយឲ្យការបោះឆ្នោតសកឆ្នាំ២០១៣
ប្រព្រឹត្តទៅ ដោយសេរី ត្រឹមត្រូវ នឹងយុត្តិធម៌ បានឡើយ ។ ហើយគណបក្ស សម រង្ស៊ី
គឺទាមទារយ៉ាងទទូច ឲ្យមានការកែប្រែនីតិវិធីដ៏ស្មុកស្មាញ នៃការចុះឈ្មោះបោះឆ្នោតនេះ
ហើយនិងផ្លាស់ប្តូរពេលវេលានៃការចុះឈ្មោះ
ព្រមទាំងផ្តល់ពេលវេលាគ្រប់គ្រាន់ក្នុងការចុះឈ្មោះបោះឆ្នោត
ដើម្បីឲ្យប្រជាពលរដ្ឋខ្មែរទាំងអស់គ្នាមានសិទ្ធបោះឆ្នោត មានឈ្មោះនៅក្នុងបញ្ជីឈ្មោះអ្នកបោះឆ្នោត
និង បានទៅបោះឆ្នោតដោយគ្មានឧបសគ្គ និងការរំខាន ៕
No comments:
Post a Comment
yes