សមាជិកក្រុមប្រឹក្សាឃុំមួយចំនួន មកពីគណបក្សប្រឆាំង នៅស្រុកល្វាឯម ខេត្តកណ្តាល ត្រូវមេឃុំហាមឃាត់មិនឲ្យលូកដៃចូលក្នុងកិច្ចការបោះឆ្នោត ជាពិសេស នៅក្នុងដំណាក់ការពិនិត្យបញ្ជីឈ្មោះ និងចុះឈ្មោះបោះឆ្នោតជ្រើសរើសតំណាងរាស្ត្រអាណត្តិទី៥ នៅឆ្នាំ២០១៣ ខាងមុខ។
ជំទប់ទី១មកពីគណបក្ស សម រង្ស៊ី និងជំទប់ទី២ មកពីគណបក្ស សិទ្ធិមនុស្ស នៃឃុំកោះកែវ ស្រុកល្វាឯម ខេត្តកណ្ដាល ប្រតិកម្មទៅនឹងការហាមឃាត់របស់មេឃុំគណបក្សប្រជាជន ដែលមិនឲ្យពួកគាត់ចូលធ្វើការនៅក្នុងសាលាឃុំ ជាពិសេស ការងារដែលពាក់ព័ន្ធនឹងការពិនិត្យបញ្ជីឈ្មោះ និងចុះឈ្មោះបោះឆ្នោត។
ការពិនិត្យបញ្ជីឈ្មោះ និងចុះឈ្មោះបោះឆ្នោត ចាប់ផ្ដើមពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២។ នេះជាការធ្វើបច្ចុប្បន្នភាពបញ្ជីបោះឆ្នោត ទុកសម្រាប់បម្រើឲ្យការបោះឆ្នោតជ្រើសតាំងតំណាងរាស្ត្រអាណត្តិទី៥ ឆ្នាំ២០១៣។
ជំទប់ទី១មកពីគណបក្ស សម រង្ស៊ី លោក ធុល បុរ មានប្រសាសន៍នៅថ្ងៃអង្គារ ទី៤ កញ្ញា ថា មេឃុំកោះកែវ មិនឲ្យគាត់ជាជំទប់ទី១ និងជំទប់ទី២ម្នាក់ទៀតរបស់គណបក្ស សិទ្ធិមនុស្ស ចូលក្នុងសាលាឃុំ ដើម្បីជួយធ្វើកិច្ចការជូនប្រជាពលរដ្ឋ ដែលមកពិនិត្យបញ្ជីឈ្មោះ ឬចុះឈ្មោះបោះឆ្នោតនោះទេ ចាប់តាំងពីថ្ងៃទី២ ខែកញ្ញា មក៖ «គាត់មិនឲ្យចូលធ្វើការទេ តាំងពី គ.ជ.ប ក៏គេប្រាប់ពួកខ្ញុំថា មិនឲ្យចូលធ្វើការក្នុងសាលាឃុំហ្នឹងដែរ ទោះបីជាខ្ញុំប្រើតួនាទីជាក្រុមប្រឹក្សាឃុំ ក៏គេមិនឲ្យយើងចូលដែរ»។
លោកបន្តថា មេឃុំបានគំរាមប្រើកម្លាំងសមត្ថកិច្ចចាប់អូសលោកចេញពីសាលាឃុំ បើសិនជាគាត់នៅតែទៅជ្រៀតជ្រែកការងារចុះឈ្មោះបោះឆ្នោតនោះទៀត៖ «ខ្ញុំនៅតែចូល តែគាត់បានគំរាមថា បើនៅតែចូល ប្រយ័ត្នគាត់ឲ្យប៉ូលិសចាប់ទាញដៃចេញពីសាលាឃុំ»។
មេឃុំកោះកែវ អ្នកស្រី ហួន មើ មានប្រសាសន៍ថា គាត់បានហាមឃាត់មែន ចំពោះកិច្ចការចុះបញ្ជីឈ្មោះអ្នកបោះឆ្នោត ព្រោះជានិច្ចការរបស់ស្មៀនឃុំ និងសមាជិកក្រុមប្រឹក្សាឃុំដទៃទៀត ដែលគេបានចុះបញ្ជីឈ្មោះជាអ្នកសង្កេតការណ៍ ចំណែកពួកគាត់ទាំងពីរនាក់នោះ មិនបានចុះឈ្មោះជាអ្នកសង្កេតការណ៍ទេ ដូច្នេះ ពួកគាត់មិនត្រូវទៅរំខានកិច្ចការរបស់គេឡើយ។ ចំពោះកិច្ចការរដ្ឋបាលផ្សេងៗ ដែលត្រូវធ្វើប្រចាំថ្ងៃនោះ គឺមិនមានការហាមឃាត់ទេ៖ «ហើយខ្ញុំក៏អត់មានបិទសិទ្ធិអីដែរ អារឿងការនោះ ខ្ញុំបិទសិទ្ធិតែម្យ៉ាង ដូចថា គេយកអត្តសញ្ញាណប័ណ្ណមកចុះឈ្មោះ គាត់ទាញយកទៅចម្លងអីអ៊ីចឹង អាហ្នឹងអត់បានទេ ព្រោះខាងលើគេហាមឃាត់»។
អគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា លោកពន្យល់ថា សមាជិកក្រុមប្រឹក្សាឃុំ-សង្កាត់ ដែលមិនបានចុះឈ្មោះជាអ្នកសង្កេតការណ៍ ហើយពួកគាត់ពុំត្រូវចាត់តាំងពីប្រធានក្រុមប្រឹក្សាឃុំ-សង្កាត់ឲ្យជួយពិនិត្យមើលកិច្ចការស្មៀនទេ គឺពួកគាត់មានតួនាទីត្រឹមតែចាំប្រជុំសម្រេចនៅពេលមានប្ដឹងតវ៉ា លើការចុះបញ្ជីឈ្មោះបោះឆ្នោត ឬប្ដឹងតវ៉ា ឬជំទាស់លើបញ្ជីបោះឆ្នោតដំបូងនោះ។
លោក ទេព នីថា៖ «ក្រុមប្រឹក្សាឃុំ-សង្កាត់ បើ៥នាក់ គឺត្រូវចាត់តាំងម្នាក់ឲ្យទៅត្រួតពិនិត្យមើលកិច្ចការរបស់ស្មៀនជាប្រចាំ ហើយម្នាក់នេះអាចធ្វើការផ្លាស់ប្ដូរបានតាមការសម្រេចរបស់ក្រុមប្រឹក្សាឃុំ-សង្កាត់។ បើក្រុមប្រឹក្សាចាប់ពី៧ដល់១១នាក់ អាចចាត់តាំងពីរនាក់ទៅតាមដានការអនុវត្តរបស់ស្មៀន ហើយក្រៅពីហ្នឹង គឺពួកគាត់ត្រូវធ្វើការធម្មតា ពួកគាត់អត់ទៅឡូកឡំជាមួយកិច្ចការចុះឈ្មោះរបស់គេទេ»។
ទោះយ៉ាងណា ជំទប់ទី២របស់គណបក្ស សិទ្ធិមនុស្ស លោក គង់ សុឃឿន មានប្រសាសន៍ថា ការរារាំងមិនឲ្យចូលរួមពិនិត្យ និងសម្រួលដល់កិច្ចការចុះឈ្មោះ និងពិនិត្យបញ្ជីអ្នកចុះឈ្មោះបោះឆ្នោតនេះ ជារូបភាពរើសអើងគណបក្ស និងជាការគំរាមកំហែងខាងនយោបាយនៅមុនការបោះឆ្នោត។
គណបក្សប្រឆាំងធំពីរ គឺគណបក្ស សម រង្ស៊ី និងគណបក្ស សិទ្ធិមនុស្ស កន្លងមក បានធ្វើពហិការមិនបញ្ជូនភ្នាក់ងារអង្កេតការណ៍ចុះឈ្មោះបោះឆ្នោតនោះទេ។ ការធ្វើពហិការនេះជាសារមួយទាមទារសុំឲ្យប្ដូរសមាសភាពដឹកនាំរបស់ គ.ជ.ប ដែលគណបក្សប្រឆាំងតែងតែរិះគន់ថា ស្ថាប័ននេះមាននិន្នាការទៅរកបក្សកាន់អំណាច៕
No comments:
Post a Comment
yes