ក្រុមអ្នកប្រកបរបរដឹកភ្ញៀវកម្សាន្តនៅតាមដងទន្លេបាសាក់ ឬម្ដុំមុខវាំង រិះគន់ប្រធានសមាគមដឹកជញ្ជូនទេសចរផ្លូវទឹកភ្នំពេញថា គាប់សង្កត់លើពួកគាត់ និងបានប្រព្រឹត្តអំពើពុករលួយ។
អ្នកស្រី ហ៊ុន ចាន់ល័ក្ខ ម្ចាស់ទូក មេគង្គ ស្តារ (Mekong Star) ចោទប្រកាន់លោក លី ពុទ្ធី ប្រធានសមាគមដឹកជញ្ជូនទេសចរផ្លូវទឹកភ្នំពេញថា បានប្រើប្រាស់តួនាទីរបស់ខ្លួនគាបសង្កត់សមាជិកក្នុងសមាគមតាមរយៈប្រព័ន្ធច្បាប់ ដូចជាសំអាងថាទូកគ្មានស្តង់ដារ និងគ្មានអាជ្ញាប័ណ្ណ ឬអាជ្ញាប័ណ្ណអស់សុពលភាពជាដើម។
អ្នកស្រី ហ៊ុន ចាន់ល័ក្ខ បន្តថា លោក លី ពុទ្ធី ប្រធានសមាគមដឹកជញ្ជូនទេសចរផ្លូវទឹកភ្នំពេញ ពុំដែលបានយកច្បាប់ដែលមានចែងនៅក្នុងលក្ខន្តិកៈរបស់សមាគម និងទទួលស្គាល់ដោយក្រសួងមហាផ្ទៃ មកអនុវត្តនោះទេ៖ «ច្បាប់ដើមពីក្រសួងមហាផ្ទៃ ហើយអានេះលក្ខន្តិកៈនេះ ក៏ក្រសួងមហាផ្ទៃគេឲ្យដែរ។ តែដល់រួចមកហ្នឹង ប្រធានសមាគមនេះមិនបានរើសអ្នកក្នុងរចនាសម្ព័ន្ធនេះធ្វើការទេ។ ប្រធានសមាគមឯង ធ្វើការតែឯង អត្តនោម័តិតែឯង យកអ្នកដទៃមកធ្វើការដូចជាមន្ទីរទេសចរណ៍ចូលរួម ហើយទៅមន្ទីរសាធារណការហ្នឹងចូលរួម ខណ្ឌដូនពេញហ្នឹងចូលរួម ហើយគាត់ឆ្លើយថា សាលាក្រុងឯងហ្នឹងក៏បានចូលរួមដែរ ចូលរួមអីចូលរួមរៀបសណ្ដាបធ្នាប់កាណូតទេសចរណ៍»។
ឆ្លើយតបទៅនឹងការចោទប្រកាន់នេះ លោក លី ពុទ្ធី ប្រធានសមាគមដឹកជញ្ជូនទេសចរណ៍ផ្លូវទឹកភ្នំពេញ បដិសេធចំពោះការចោទប្រកាន់របស់ក្រុមអ្នកដឹកភ្ញៀវថា ពុំមែនជាការពិតនោះទេ។ លោកចាត់ទុកការចោទប្រកាន់លោកថា ពុំបានអនុវត្តតាមលក្ខន្តិកៈរបស់សមាគម ឬមានការគាប់សង្កត់សមាជិកក្នុងសមាគមនោះ គឺពុំអាចទទួលបាននោះឡើយ។
លោកហៅការថ្លែងនេះថា គឺជាចេតនាចង់ឲ្យសមាគមមានភាពរាំស្ទះក្នុងវិស័យទេសចរណ៍តែប៉ុណ្ណោះ៖ «អត់ត្រឹមត្រូវ គាត់និយាយតែបុគ្គលខ្លួនឯង ហើយភាគច្រើនគេប្រជុំណែនាំទាំងសមាគម ទាំងអាជ្ញាធរពាក់ព័ន្ធទាំងអស់ គេរៀបចំណែនាំទាំងអស់។ ប៉ុន្តែគាត់ម្នាក់ឯង គាត់ធ្វើអីស្រេចតែនឹងចិត្ត ហើយគាត់បានដើរទៅយកឈ្មោះសមាជិកកាណូតផ្សេងៗហ្នឹងយកទៅដាក់ឈ្មោះគេ ដើម្បីធ្វើការញុះញង់ម្ដងជាពីរដង»។
បើយ៉ាងនេះក្ដីលោក វន់ ពៅ ប្រធានសមាគមប្រជាធិបតេយ្យនៃសេដ្ឋកិច្ចឯករាជ្យក្រៅប្រព័ន្ធ។ លោកគិតថា ដើម្បីចៀសវាងកុំឲ្យមានវិវាទ គូជម្លោះគួរបើកការចរចាដោយយកច្បាប់សមាគមជាមូលដ្ឋានក្នុងការតម្រង់ទិសដើម្បីបញ្ចប់ភាពចម្រូងចម្រាសនេះ។
លោក វន់ ពៅ បន្តថា៖ «និយាយជាទូទៅសង្គមស៊ីវិល ឬក៏សមាគមគេមានលក្ខន្តិកៈរបស់គេ។ បើសិនជាសមាជិកមានការចោទប្រកាន់នៅចំណុចណាមួយដែលលក្ខន្តិកៈបានចែង សមាជិកត្រូវតែធ្វើទៅតាមលក្ខន្តិកៈ ហើយសម្រាប់លក្ខន្តិកៈត្រូវតែចែងច្បាស់លាស់អំពីភាពតម្លាភាពផងដែរ។ ភាពតម្លាភាពបានន័យថា រាល់មន្ទិលសង្ស័យរបស់សមាជិក គឺអ្នកដឹកនាំសមាគមត្រូវតែធ្វើការបំភ្លឺកុំឲ្យមានការសង្ស័យធ្វើការបំភ្លឺប្រកបដោយតម្លាភាព»។
បើទោះជាបែបណា ម្ចាស់ទូក ស្តារ វើល (Star World) លោក វ៉ាត់ ដារ៉ា ឲ្យដឹងថា ក្រោយពីទទួលបានអាជ្ញាប័ណ្ណជាផ្លូវការជាសមាគមដឹកជញ្ជូនទេសចរផ្លូវទឹកភ្នំពេញ ពីក្រសួងមហាផ្ទៃ កាលពីថ្ងៃទី២៩ ខែកញ្ញា ឆ្នាំ២០០៩ សមាគមនេះធ្លាប់ប្រេះឆាម្ដងរួចទៅហើយ តែពុំមានតម្លាភាពក្នុងប្រើប្រាស់ថវិកា។ តែទើបតែស្រុះស្រួលគ្នាឡើងវិញកាលពីថ្ងៃទី១ ខែសីហា ឆ្នាំ២០១២។ បើទោះជាបែបនេះក្ដីលោកថា ប្រធានសមាគម លោក លី ពុទ្ធី នៅតែពុំបានគោរមតាមរចនាសម្ព័ន្ធរបស់សមាគម និងតែងសម្រេចចិត្តដោយឯកច្ឆន្ទ ឬប្រើប្រាស់អំណាចក្នុងនាមជាប្រធានសមាគមអាកាត់រឿងតូចធំនៅក្នុងសមាគម។ ក៏ប៉ុន្តែអនុប្រធានសមាគម គឺលោក ស៊ីម រ៉ាវី អះអាងថា តាមសង្កេត ការរកឃើញថាប្រធានសមាគមគឺលោក លី ពុទ្ធី មានកំហុសដូចការចោទប្រកាន់នោះពុំមានឡើយ៕
No comments:
Post a Comment
yes