មណ្ឌលគិរី៖ រថយន្តសាំយ៉ុង ១ គ្រឿង របស់អ្នករត់តាក់ស៊ី ពីមណ្ឌលគិរី ទៅភ្នំពេញ ដែលគេសង្ស័យថា ស៊ីឈ្នួលដឹកជញ្ជូនគ្រឿងសង្ហារឹមកែច្នៃ ត្រូវបានប៉ូលិសសេដ្ឋកិច្ចក្រសួងមហាផ្ទៃម្នាក់ នៅស្រុកកែវសីមាចាប់បញ្ជូនទៅកាន់ផ្នែករដ្ឋបាលព្រៃឈើ ស្រុកកែវសីមា ដើម្បីឲ្យជំនាញចាត់ការទៅតាមផ្លូវច្បាប់។
ប្រភពព័ត៌មាន របស់សមត្ថកិច្ចប្រាប់ឲ្យដឹងថា កាលពីថ្ងៃទី០៣ ខែកញ្ញា ឆ្នាំ២០១២ វេលាម៉ោង ៦:៣០ នាទីល្ងាច មានករណីឃាត់ចាប់រថយន្តសាំយ៉ុងមួយគ្រឿង ពណ៌លឿង ពាក់ស្លាកលេខ មណ្ឌលគិរី ២A-០១៩៧ ត្រង់ចំណុច ភូមិឆ្នែង ឃុំស្រែខ្ទុម ស្រុកកែវសីមា ដែលគេសង្ស័យថា មានការដឹកជញ្ជូនឈើប្រណិត និងថូផ្កាមួយគូកែច្នៃរួច ប៉ុន្តែការឃាត់ចាប់រថយន្តខាងលើនោះ គឺមានតែប៉ូលិសសេដ្ឋកិច្ចក្រសួងមហាផ្ទៃ តែម្នាក់ឯងប៉ុណ្ណោះ ពុំមានការសហការជាមួយមន្ត្រីជំនាញ និងអាជ្ញាធរ នៅក្នុងតំបន់នេះឡើយ។
ប្រភពបានឲ្យដឹងទៀតថា ប៉ូលិសសេដ្ឋកិច្ចក្រសួងមហាផ្ទៃម្នាក់នោះ ឈ្មោះ ជុំ តារ៉ាវុធ ជាអ្នកឃាត់រយះពេល ៤ ម៉ោង ដើម្បីចរាចរទារប្រាក់ពីម្ចាស់រថយន្ត ឈ្មោះ ពន់ សំណាង ចំនួន ១០០០ ដុល្លារ ប៉ុន្តែម្ចាស់រថយន្តព្រមព្រៀងត្រឹមតែ ៣០០ ដុល្លារ តែខាងបងប៉ូលិសសេដ្ឋកិច្ចក្រសួង បានចុះថ្លៃត្រឹម ៨០០ ដុល្លារ តែភាគីខាងម្ចាស់រថយន្តសាំយ៉ុង គ្មានលទ្ធភាព ក៏ឈានដល់ការអូសរថយន្ត មកកាន់អធិការដ្ឋាននគរបាល ស្រុកកែវសីមា នៅល្ងាចថ្ងៃដដែលអស់រយៈពេលមួយយប់ ទើបបញ្ជូនរថយន្ត និងឈើទៅផ្នែករដ្ឋបាលព្រៃឈើ ស្រុកកែវសីមា ដើម្បីរង់ចាំធ្វើចំណាត់ការទៅតាមផ្លូវច្បាប់។
ក្នុងករណី ស្តីពីការឃាត់ចាប់រថយន្តខាងលើនោះ មានថូផ្កា ចំនួន ១ គូ(ធ្នង់) និងឈើឡាំងជា ៤ ជ្រុង ចំនួន ១១ ដុំទៀត ជាប្រភេទឈើនាងនួន សរុបប្រមាណ ១,៦៤៧ ម៉ែត្រគូប ហើយឈើនេះ ត្រូវបានគេបង្ហើបប្រាប់ថា គឺជាឈើរបស់ លោក ព្រះរាជអាជ្ញារងម្នាក់ នៅខេត្តមណ្ឌលគិរី ឈ្មោះ សោ វុទ្ធី ជួលរថយន្តខាងលើដឹក ដើម្បីយកទៅប្រើប្រាស់ផ្ទាល់ខ្លួន។
ប៉ុន្តែបើតាមប្រភពព័ត៌មាន ដែលយើងទទួលចុងក្រោយពីមន្ត្រីសាលាដំបូង ខេត្តមណ្ឌលគិរី មួយរូបសុំមិនបញ្ចេញឈ្មោះ និយាយថា ចំពោះថូផ្កាចំនួន ១ គូ(ធ្នង់) គឺជារបស់ លោក សោ វុទ្ធី ព្រះរាជ្ញារងខេត្ត គឺគាត់យកទៅប្រើប្រាស់ផ្ទាល់ខ្លួន ប៉ុន្តែចំពោះឈើនាងនួន ចំនួន ១១ ដុំទៀត មិនមែនជារបស់ លោក វុទ្ធី ទេ ប្រហែលជាគេយកឈ្មោះ គាត់(វុទ្ធី) ទៅលាភហើយ។
ទាក់ទងនិងបញ្ហាខាងលើនេះ ភ្នាក់ងារសារព័ត៌មាន ប្រចាំតំបន់នេះ ចង់សុំការទំនាក់ទំនងទៅ លោក សោ វុទ្ធី ដែរ ប៉ុន្តែអត់ស្គាល់លេខទូរស័ព្ទគាត់។ លោក រឿង សុផាត នាយផ្នែករដ្ឋបាលព្រៃឈើ ស្រុកកែវសីមា បានបញ្ជាក់ថា រថយន្ត និងឈើត្រូវបានបញ្ជូនមកដល់ផ្នែករដ្ឋបាលព្រៃឈើស្រុក ហើយរង់ចាំតែចាត់ការទៅតាមផ្លូវច្បាប់តែប៉ុណ្ណោះ។ លោក បានបន្តថា ចំពោះឈើនៅក្នុងរថយន្តខាងលើនោះ មានឈើប្រណិតប្រភេទនាងនួន ធ្នង់ សរុប ១,៦៤៧ ម៉ែត្រគូប។
លោក ជុំ តារ៉ាវុធ ប៉ូលិសសេដ្ឋកិច្ចក្រសួងមហាផ្ទៃរងការចោទប្រកាន់នោះបានប្រាប់អ្នកសារព័ត៌មាន តាមទូរស័ព្ទថា លោក មានការរវល់៕
No comments:
Post a Comment
yes